Citizenship (Amendment) Bill chungchang bawk hi sawi leh ta ila. Kan hriat angin party hrang hrangten beisei angin hma la lo mahse zirlai pawlte leh tlawmngai pawlten an vei em avangin hma an la ta hlauh a. Hmarchhak bial rau rauah pawh he Bill dodal nasa bera ngaih kan nih phah a, a tihzia khawp mai. Dik tak chuan a tir te atang khan kan political party-te hian he bill chungchangah hian hma an la nep mah mah. He bill an siam tirh a, ngaihdan sawi theihna hun an hawn lai te khan khatih laia Mizoram sorkar khan a ngaihthah lui a ni ber a. PRISM hi (Political party an nih hmain) a tir te atanga vei leh au chhuak hmasa ber an ni awm e.
May 12, 2017 khan Law minister hoin he bill chungchangah hian meeting koh a ni a, chumi tum chuan party leh NGO zawng zawng lenna chief minister ho a meeting koh an rel a. Mahse, khatih laia chief minister khan a ngaihsak vak lo nge, meeting chu a ko ta mai lo a. A hre ber tura ngaih Mizoram MP pahnihte pawhin thawm an neih kan hre lo bawk. Chung lai chuan Assam lamah chuan an buaipui viau tawh a nih kha. Vanneihthlak takin ZNP president-in a rawn vei thar a, PRISM party-in an buaipui zui reng bawk a, zirlai pawlten an buaipui zui a. Inthlan te a hnai chho a, loh theih lohin party lian pahnih - MNF leh Congress pawhin an vei ve phah ta, a tih theih awm e. Kan thlan lalte hian kan ram leh hnam himna hi an vei tawk lo thin a, hnam thil pawimawh takah pawh party inchirhthehna remchang ringawt an zawng thin hi a pawi khawp mai.
Nikum kum tawpah kan inthlang a mipuiin beiseina sang tak nen MNF an thlang tling a, sorkar ngelnghet tak a lo ding ta a. Chutihlai chuan Lok Sabha-ah Citizenship Amendment Bill chu BJP sorkarin a put lut a, pass a ni ta rup mai a. Rajya Sabha-ah pass tura chhawp chhuah tum mek a nih laiin Mizo hnam neitu bik a inngai em em MNF sorkar hian engtin nge hma a lak chhoh dawn tiin mipuiin kan thlir thup a. Mi tam tak rin lawk angin chief minister Delhi zinin prime minister leh home minister a kawmnaah he Bill hi kaltlang pui lo turin a ngen tih te kan lo hria. Hmai chhan ngei a a zuk sawi kha ropui hle.
Mahse, an lo bengkhawn tawk lo nge BJP sorkar hian he bill hi Rajya Sabha-a pass tura chhawp chhuah a la tum zel mai a. Chief minister ngenna hi an thenga thawngah a lut lo tih a chiang hle. Thla hlui khan hmarchhak biala BJP thlawptu tualto party hrang hrang (NEDA) sawm vel zet an inhmukhawm a. Chung zingah chuan AGP (Assam), NPP (Meghalaya) leh MNF te hi a khaipa deuh an ni a. Media lamah MNF president hian a huho a prime minister dawr leh phawt a rawt tih te kan lo hmu a. Hetia han ngaih mai chuan Pu Modi-a leh BJP hotu lawkte khu titipui a hmin chi an nih hmel loh. An ngaihdan sawhsawntir tur chuan hmarchhak biala an party sawi nghing tur zawnga hmalak a ngai niin a lang. Chutiang zawnga hmala tur chuan Mizo mipuiin MNF hi kan beisei.
Eptu party - ZPM leh congress party-ten Citizenship (Amendment) Bill dodal nan NEDA chhuahsan ngam turin (MNF) an nawr reng a. Politics thil leh party inbeihna a nih avangin an bengkhawn lem lo ni pawhin a lang. Mahse, tunah chuan Delhi-a BJP sorkar nawrna atan kawng dang a awm tawh lo niin a lang a, NEDA chhuah san a vau ngei ngei a hun tawh. Tun ang huna an vau ngam lo a nih chuan MNF hian BJP an zawm nghet hleah mi tam takin an ngai thei a, chu chu nakin lawka MP inthlan hunah an chhiatpui thei bawk. MP inthlan sawi takah chuan party lian pahnih MNF leh congress hian Chakma leh Tuikukte vote hi tlinna atan a pawimawh tih hi an hre chiang khawp a, tunah phei hi chuan tihlungawi loh an hlau ru tawh viau anga, an tlawn ru viau tawh maithei bawk.
Phai lam media hrang hranga an tarlan danin he Citizenship (Amendment) Bill hi naktip emaw nakthaiah emaw hian Rajya Sabha-ah pass tura chhawp chhuah leh tum mek niin a lang a. Lok Sabha-ah a tlang tawh a, Rajya Sabha-ah a tlang leh a nih chuan Afghanistan, Pakistan leh Bangladesh atanga lo pem lut - Hindu, Buddhist, Jain, Sikh, Kristian leh Parsis tan India khua leh tui nih theihna kawng awlsam a inhawng dawn tihna a ni a. Heng ram atanga lo lutah hian Kristian tihtham an awm lo a, Bangladesh atanga lo lut ru kan rama awm Chakma (buddhist-te) tan kawng a inhawng dawn tihna a ni a, mi dang lo luh zelna tur kawng a inhawng thei dawn bawk a, hei hi kan tana pawi lai tak tur chu a ni.
Sorkarna fawng chelhtu MNF party ber hian tha an thlah ta deuh ni a a lan laiin tunhma atanga ram leh hnam humhalhna atana inpeih at reng thin MZP in tha thlah loin hma an la zui zel a, a thlamuan thlak viau. Tlawmngai pawl leh zirlai pawlten a huhoin hma an la tawh a, tun thleng a party zawng zawngte tangruala hma an la la lo hi a dik thei lo. Sorkar hmasaah party leh tlawmngai pawl zawng zawng huapa hmalakna a tlawlh tawh a, tun sorkar tharah pawh thawm a la awm ta chuang lo a, kan party lian pahnih hian hnam thilah hian kal ngam chin tawi te chauh an nei tihna a ni mai lo maw? Kohhran hruaitute meuh pawhin an vei a, tawngtai rual hial an rawt tawh a ni a, chuti chunga (BJP an hlauh vang nge) rorel lai party-in party hrang hrang leh tlawmngai pawl huikhawm a, hnam pum huapa hma a la duh tlat lo hi thil mak tak a ni.
Chutihlaiin, he Bill hi Rajya Sabha-ah buk ni ta se, tuna party hrang hrang sukthlek dan thlir chuan BJP hian pass pui tur khawp thlawptu a neih a rinawm chiah lo. An thawhpui Shiv Sena leh JD (U) ten he bill thlawp lo zawngin an vote dawn tih an sawi tawh a. Rajya Sabha-ah hian member 245 an awm mek a, BJP hian he bill thlawp tur hian member 123 tal an mamawh a. BJP hian MP 73 an nei a, an tanrualpui party thenkhatin an thlawp dawn loh avangin bill thlawptu hi MP 87 vel an nih hmel a. A thlawp lo tur chiang sa hi 127 an tling tura ngaih a ni a. Chutihlaiin, BJP hian theihtawp chhuah a an beih chuan a tlang thei tho, hawi lam chiang lo vote 30 chuang te hian BJP an puih huk chuan a tlang daih thei bawk.
Hmarchhak biala chengten heti taka kan duh lo chunga BJP in he bill pass luih a tum hi chhan lian tak tak a awm. Hmarchhak bial hian atang hian Lok Sabha-ah MP seat 25 an awm a, BJP president hian kumin inthlanah hian seat 25 ah hian BJP in seat 21 lak an tum thu a lo sawi tawh thin a. Bangladesh atanga lo pem lutte hipna atan he bill hi an hmang niin a lang. Lo pem lut tam tak hi muslim ni mahse an thatpui an inring tihna a ni a, an dahkham erawh a sang viau awm e.
Prime minister Modi-a hian New India tih hi a sawi zauh zauh a, kum 2022 atangin India Thar thlentir tumin hma an la mek a. Tun hma atangin RSS ho hian India ram hi Hindu rama leh tumin an bei reng a, sakhaw dang an ngaithei lo hle a ni. Pu Modi-a hi RSS member ni thin a ni a, BJP hi RSS hnuaia mi (an political wing) a ni bawk. Chuvangin, he bill hi hindu sakhua tana hmalakna nen a inzawm tlat tih hai rual a ni lo. Heti khawpa kan duh lo chunga an kaltlang pui a nih chuan kan hnam leh sakhaw himna turin kan hruaitute hian huai takin hma an la ve turah kan ngai a. Tunhmain duhthlanna pawh hmang loin India ah rin luh kan ni a, barhlui dan min siam luihsak zel a nih chuan BJP hian Mizote aiin ram dangmi a duh zawk tihna a ni ber ang.