Zirna thenkhatin mobile phone hi natna inkaidarhna a ni ve thei an ti. Hospital-ah daktawr leh damloten kan hmang lo thei si lo! Mobile phone atangin Covid-19 inkaichhawng sawi tur la awm lo mah se, phone-ah hian natna hrik a awm teuh thin tih erawh hriat chian a ni. Covid-19 hi plastic-ah a dam rei an ti lehnghal!

Damdawi ina phone khawih tlem hian Covid-19 a darh tlem phah ngei e tih chianna fak awm lo mahse, phone tihthianghlim ngei hi Covid-19 laka invenna tha tak tur a ni ve tlat.

Phone kan khawih tam si, kan hmui hmai hnai tak takah kan chelek a, kan chil per a kai teuh ang! Kan inkhawih pawlh fo lehnghal. Tui leh sahbawnin a sil ve ngawt theih si loh!

Fimkhur a ngai ve khawp mai, a bikin damdawi ina thawk te, damdawi in kai leh damlo kan leh kalpuite tan! Fimkhur dan tur an sawi kan sawi chhawng ang e.

1. Damdawi in leh damlo bulah phone hman tlem tur.

2. Phone hi inhman tawm loh tur a ni a, inkhawih tawm loh tur a ni, ngaihthlak chhawnna thlengin.

3. Mobile phone hi tihthianghlim ve fo tur a ni.

Phone tihthianghlim dan tur:

1. Phone chu tithi la, a tuamna kawr (tuam chhawng tan) hlip la, hrui inzawm a awm chuan hlip vek la.

2. Hruk faina siam sa (wipes, camera lens hruk faina ang chi) i neih chuan kim takin hru fai phawt la, (Chutiang i neih loh chuan puanthem faiin hru la). I hrukna chu bawlhlawh bawmah paih nghal ang che.

3. Puan fai la la, a hmawr chu tihthianghlimna tur (70% isopropyl alcohol telna hand sanitizer emaw, clorox disinfecting wipes emaw)-in tihuh la, chu chuan phone hma lam leh hnung lam hru chhuak vek ang che (Covid-19 lar hma chuan zu fir telna hian phone hruk an remti lo a; mahse, tunah chuan Apple leh Samsung hian fimkhur taka hruk fai nan zu fir telna hman hi an remti tawh an ti).

4. Phone-a kua awm reng vengah i tihfaina tui kha tihluh loh tur a ni.

5. Phone hi direct-in tihhuh loh tur a ni. Spray-in emaw phuh sur sur loh tur a nih chu. (Puan hmawr huha hruk tur kan tih kha)

6. Phone kawr chhawng chu i vuah leh duh a nih pawhin ‘hand sanitizer’ bawk khan tihthianghlim ve bawk tur a ni.

7. Phone tihthianghlim nan ‘bleach’ hman loh tur.

8. Chutia i tihzawh vekah chuan fai takin sahbawn nen i kut i sil leh dawn nia.

Thu dang: Him riaua kan inhriat lai hian kan fimkhur lo palh ang e aw! Kan zi deuh hut hut mah mah lo maw? Test a ‘negative’ zel tih hi thlamuanpui lutuk chi a ni lo an tih tlat chu!

Chhuak vak tlem la, i chhuahin hmai tuam la, mi dang hlat la, i kut phahah khuhin hahchhiau lo la, kut sil fai zing la, khawlaiah chil chhak suh aw. Dam la, fimkhur la, kan ram a dam a ni mai.