Zawhna: Ka pu, kum 85 ka ni mek a, mipa ka ni a, Pathian zarah zunthlum, thisen sang leh natna benvawn ka nei lo, pem te tak te ka neiha hnai a lakin ka khua a sik leh mai thin thung. Chumi bak natna benvawn ka nei lo. Ka harsatna zawk chu: Covid-19 vaccine mipui hnena pek tan lam deuh Dt 16 April 2021 khan min jection ve a, ka ban bul vei lamah a ni a, awm dan tur tlangpui an sawi te pawh ka hria a, ni 3 ni atangin ka ban bul koki leh ban puam hi chet hlekin a na a, a kham ut ut a, rit ka chawi thei lo. Ka in enkawl dan - a tir lamah tui vawtin dep rawh, chumi hnuah tui lumin an ti a, chu chu chhunah vawi - 2, tlaiah leh zanah vawi 1 ve ve, tuilum chuan ka dep thin, na ngawih ngawih a ni lo, mahse engmah ka ti thei lo. Zan mut pawhin dah ngai ngaia dah, chet sawn lehin a na thin a, tun ni 10.06.2021 hi a ni 55-na a ni ta. Ka zawhna hi min hrilh theih chuan ka lawm em em ang.

Chhanna: Hri venna Vaccine eng chi pawh mai hi za ah za (100%) a hri laka min veng nghal thei (effectiveness) a awm mang lo. Chutiang bawkin za ha za a him (safe) a awm mang lo bawk. Chumi awmzia chu eng vaccine pawh hi, a la tu te zinga mi tlemte chu hri lakah an la derthawng thei tho tihna a ni a, chutiang bawkin vaccine vanga insawiselna side effect eng emaw chhe te tal an nei vek ang tihna a ni bawk. 

Vaccine tam zawk hi taksaa chiu luh ngai (injectible) chi an ni a. Inchiu reng reng chuan tihfuh loh palh a awm ve fo a, a chiuna emaw chiu dan fuh tawk loh vang te a ni thei bawk a. A chiuna hmun (hmuamhma) vung te, a thenah phei chuan hnai la te hial pawh a awm thei. A vung hrim hrim hi chu a common phian bawk. Inchiu vanga tihrawl han vung emaw rawl te pawh a awm fo bawk. I insawiselna ang hi upa lamah chuan a common duh phian bawk a, a hmuamhma fel lo (local reaction) anih piah lamah hian chet han khawr deuh khan ruh chuktuah (joints) lam te pawh a nghawng thei bawk ang.

Tun tum Covid vaccine-ah pawh hian chutiang local reaction chu a tam zawkin an nei niin a lang a, mahse a na deuh telh telh tih bak chu harsatna dang nei lo a tam zawk an nih a rinawm. Inchiuna hmuamhma a tuilum emaw tui vawt a deh tih lai zawk hi a fuh lo chu niin a lang. Chiu zawha thi chhuak chhunzawm a awm lem loh phei chuan engtia ma tih loh tur zawk a ni a. A lo vung palh deuh anih pawhin na chhawkna kan chawh mai zawk thin. Amahin a rawn reh chhunzawm ve leh mai zel. Engmah ti thei lo leh chet vela na a siam reng chuan thil dang harsatna engemaw tak i nei tel anih duh hmel viau. Ruh lam thiam doctor (Orthopedic Surgeon) lo inentir thei la a tha ka ti hle mai.

Vaccine lam chungchang zawhna a ni bawk a, remchangah la in kan hriat tur pawimawh ka tih te kan thailang nghal ange. Vaccine hi chi hrang pali angin an then a, a siam chhuah kawngah hian an uluk em em mai a, research phase tam tak a pal tlang tawh hnuah an hmang chauh thin a, a then phei chu mihring in volunteer te ah human trial nei hmasa in a him leh him loh an en hmasa thin a ni. Mi nawlpui tana hman ngam tura khawvel in a ngaih tawh chin hi chu a him hle a ngaih phawt tur a ni.

Thu kan hriatna reng reng hi a dik tawk em? Tu hnen atanga lo chhuak nge tih hi kan chian hmasak a tha hle mai. Sorkar hian a mipuite tana vaccine him lo thei chi chu hman tura a chhawp chhuah a rinawm loh. Mithiamte’n uluk taka an siam, an buatsaih, mihring hman atan him tura an rin ngam tawk chin tawh lo rin loh leh vel hi a changkang lo a ni. Vaccine hi hri laka min vengtu a ni a, kan lak tawh hnua hri kan lo kai leh palh anih pawhin a natna kha a thawk nep tawh thin a, a zualkai thei lakah thui tak min veng a ni. Covid Vaccine la kan tam poh leh a nawlpui kan him zual sauh dawn a, hlau lovin a la thei chuan i la char char mai ang u.