Zawhna: Ka pu, tun lai hri leng Covid-19 vei tawhte hian an vei nawnthei tawh lo tih hi thu dik a ni em? Vei nawn theih lo ni ta se, a la vei lote aiin vei nawn theihna chance an nei tlem zawk em?

Chhanna: Covid-19 hi khawvelin kan hmelhriatna a la rei lo hle mai a, a ziarang, a chet dan, a kai theih dan, a lan chhuah dan leh enkawl dan te thlengin mi thiamte pawhin thutlukna nghet cherhchawrh an la siam hlei thei lo chu a ni ber e. Khawvel hmun hrang hrangah mi thiamte’n ngawrh takin an zir a, a tihdamna damdawite leh, a invenna vaccine siam chhuah thuai kan nghakhlel vek a; mahse, vawiin thlengin mi thiamte pawhin an la hmu chhuak chuang lo a ni.

Natna thlen thei hrik hi bacterial, fungal leh viral tiin an then hrang a. Heng hrik – bacteria, fungus leh virus te hi an inang lo va, bacteria rau rauah pawh a hrik azirin an danglam vek a ni. Entir nan, TB natna thlentu, Mycobacteria-te hi khawvelin a control tawh emaw a tih laiin a hrik kha insiam danglamin (mutation) a thahna damdawi, Anti tubercular drugs tha tak takte thah theih lohin a insiam danglam leh thei a ni (multi-drug resistant TB kan tih hi).

Virus bikah chuan thenkhat chu vawi khat kan kai hnua kan kai nawn theih tawhloh a awm a, sentut hri (measles) hi chumi zinga example tha tak chu a ni. A vawi khatna atana kan taksa a tihbuai khan kan taksa sipai (immune system) chuan a lo do a, damlohna a thlen chungin a thah remna hmanrua an lo siam thei a. A hnuah kai leh mah se chu hmanrua chuan a lo that nghal zel a, kan vei nawn thei ta lo a ni. Chutiang immunity chu Active Immunity tiin kan sawi thin.

Virus dang kan hriat lar tak, HIV hi erawh kum 40 chuang kan hmelhriat tawh chungin he hri laka immunity hi kan taksain a siam thei tlat lo thung. A hrik thahna, Antiretroviral drugs tha tak tak awm mah se dam hlenna a la awm thei chuang hek lo va, a invenna vaccine pawh vawiin ni thlengin an la hmu chhuak thei lo a ni. Hrik rau rauah hian virus hi a te ber a ni a, insiam danglam (mutation) a awlsam fo thin. Covid pawh hi virus a nih vangin a darhna hmun azirin a ziarang a danglam thei niin an sawi (strain dang).

Tun Covid hri leng hi a kai tawh dam leh an tam em em a, chuti a nih chuan a kai tawhte hi an taksa sipaiten a thahna hmanrua antibody an siam tura ngaih a ni a. Chutiang avang chuan Plasma Therapy an tihte pawh hi a enkawlna atan an hmang fo reng a ni. Plasma therapy-ah chuan a vei tawh dam lehte thisen timur (blood cells) hmang khan a vei tharte treatment an pe tihna a ni ber. Mahse, he therapy ngei pawh hi zaah za a hlawhtling chuang lo.

Covid kan lo kai a, kan dam leh a nih chuan eng emaw chen chu immunity kan nei turah a ngaih thei a. Mahse, he immunity hian kai nawn lehna (re-infection) risk a tibo kher em tih hi zawhna lian tak a ni. Tun hnai khan khawvel hmun thum velah case tlem te reinfection case hmuh thar a ni tlat mai a. Hei hian mi thiamte pawh a tibuai hle. US Nevada-a mi case phei hi chu a hmaa a vei aiin a serious zawk niin an ziak leh nghal a. Chuvang tak chuan reinfection chance hi a awm ngei ni chuan a lang. Zirchianna la neih mek a ni a, a bak sawi thui tur a tam hrih lo.

Hetiang hi Covid-19 ziarang a nih hrih avang hian a vei tawh dam lehte pawh hi an fimkhur chhunzawm reng a ngai tihna a ni ta phawt a. Inthlahdah nana hman chi a ni hauh lo tih kan hriat a pawimawh hle. Kan sawi tak angin he hri hian khawvel mi thiamte lu a tihai hle. A tihdamna damdawi leh invenna vaccine an hmuh chhuah hma hi chuan mipuite hi kan fimkhur chhunzawm a, an sawi fo New Normal Living nunphung a kan inher danglam thuai a ngai hle.

Han sawi belh ta lawk ila. He hri do kawngah hian state hausa zawkte pawh an buaina a han nasat meuh chuan state resource-in a daih tak tak thei lo. Damdawi in khum a full avanga inenkawlna nei lova mualliam an awm fomai a. Chutiang dinhmun chu thleng ve thei reng kan nih avang hian he hri hi kai ve lo tura theihtawp kan chhuah tlan a ngai a ni. Tuna kan inenkawlna hmun, Covid Care Center (CCC) nise kan indaih lo titih chu a ni ta ber a. Update thar berah khan Zoram Medical College, Designated Covid Hospital (DCH) ni bawkah Covid case enkawl lai 75 an awm a, khum saw 160-180 vel awm angin sawi a ni a. Kan tam telh telh chuan inenkawlnain min daih lo thuai thei dawn a ni.

Hei tak hi medical lama thawkte’n kan hlauhthawn chu a ni. Europe ram thenkhat, a tuar nasa zualahte phei chuan a enkawlna ventilator-in a daih ngang loh avanginc hhungkuaa he hri veite pawh enkawl ber tur duhthlantirte a ngai hial a nih kha! Buaithlak zual chu Covid ni lo case dang serious an awm reng a, critical care mamawh, Covid vei lem lote enkawlna tur hi a hranpaa kan reserve a ngai bawk si a, chutiang avang chuan Civil Hospital leh Private Hospital te pawh an fimkhur zual phah nasa reng a ni.

Mipui zawkin he kan harsatna lian zawk tawh theih hi kan hriatthiam a, a inven kawngah hma kan lak nasat a tul hle mai. Pawn kan chhuah te, mi zinga kan awm reng reng chuan mask hi regular takin vuah ila, kut tihthianghlim ngun ngai pawimawh bawk ila. Sorkarin chhiat ni leh mipui punkhawm theihna dang atana inkaihhruaina a siamte hi har hle mah se zawm tum hram hram ila. |ul lovah lenglam mai mai lovin, kan chhungte leh thenrual ngei ngei pawh tlawhpawh loh i tum hram hram ang u. Dawhthei taka kanfimkhur tlan chuan kan dinhmun a chhiat hmain a tihdamna damdawi emaw, a invenna vaccine emaw pawh an lo hmu chhuak hman mial mai thei asin!