Dr Hrekima Titi

COVID LAIIN HAUSA AN PUNG

Dr. C. Lalhrekima - Jul 17, 2021

“A pe tam ber,” titu Lal Isua khan a ngaisang dawn em mai! 

Covid hian thil chhia chauh a thlen lo e. Covid avanga mihringte inhmangaihna luangchhuak leh mi thilphalte thinlung puak keh hi a hmuhnawm asin!

Mission veng naupangin an unaua an khawl bawm chhu kehin, an neih zawng zawng chu LTF kaltlangin Covid do nana an hlan a nih chu! Veng dangah pawh hetianga naupang che chhuak hi an awm thu ka chhiar tawh. Thawhlawm bawma a neih chhun dar tangka dere pahnih thlak ri kauh kauhtu, “A pe tam ber,” titu Lal Isua khan a ngaisang dawn em mai! 

Mi hausa thilphalte hi a nia Lal Isua’n a fak ka rin chu! 

Covid avangin zirlaiten sikul an kal thei lo a. Changkang takin online class an kal a ngai a. Chhungkaw tam tak tan erawh buaina a tling. Khaw tam takah harsatna a awm. Fiamthu huangah, “Khaw pakhata online class la turte chu signal awmna laiah an zirtitute nen an inhmu khawm leh thap thin,” an tih kha! 

Chumi harsatna hria chuan Zonet hian Project Acedemia tih hming vuahin, zirtirtu leh zirlaite tan free wifi connection an tihsak a nih chu! Aizawlah hian mi 1,400 hnenah an thlunsak dawn a, a man neia an thlunsak tur ni se, pakhat tan Rs. 3,500 zel sen ngai tur a ni. Rs. 4,90,000.00 a ni phawt! Heti zat thlun thar an tum avang hian a band width-in a zawh theih nan awfis pui lamah khawl thar an bun belh teuh bawk! A man zat ka hre zel tawh lo, a tam ang! Zonet chet dan hi ropui tak a ni. 

Nikum leh kumin chhung khan Covid do nan leh enkawl nan Zarkawt Kohhran chuan sum fai,  Rs. 12,71,902.00 in an luang chhuak tawh tih nimin (16.7.21) khan ka hria (Zarkawt kohhranin min lo ngaidam se, tar lan an duh ka ring hauh lo). Anni chauh lo pawh hi kohhran dang dang, heti zat thuak leh a aia tam daiha che chhuak tawh pawh an awm ngei tuh ka hria. Covid avanga kohhran kaltlanga malsawmna kan dawn hi a ropui asin! 

LG company-in ZMC ICU ami tur bungrua, cheng nuai 24 hu an hlan thu ka chhiar bawk. Pui tak a ni! 

Covid avanga mite thinlung thilphalna lo par chhuak mawi em em entirna tlemte chauh ka sawi lang a. Hetianga che chhuak hi mi dang tam tak an awm. Veng tinah mi tam takin LTF tan, 3C tan, 4C atan tiin an phal tawk an chhung khawm ruih ruih reng a. Pawl hrang hrang leh kohhran hrang hrang luan chhuahna zozaite hi chhinchhuah khawm a chakawm hial mai! Thingtlang atanga a thlawna sem tur chawhmeh lo lut zozaite hi a man chhut ila, a tam ngawt ang! 

Mi hausain Covid dona leh enkawl nana thil an pek hian mi thenkhat chuan, “Ti awm an ni alawm, an hausa em mai!” an ti leh mai thin. Mi hian sum an ngah avangin ‘thilpek pe awm’ an ni a nih pawhin an pe vek  ngawt chuang lo. Mi thilphal chauhin hetiang hi an ti thin.

Nuai tam tak leh cheng tlemte petu thinlung hi a ropui asin! Malsawmna min vurtu hian hmuhnawm a tingawtin ka ring.

Hausakna hi sum ngah zawnga teh chu niin ka hre lo, mi thilphal apiang hi mi hausa chu an lo ni e. Covid avanga harsatna kan tawh karah mi hausate an lo lang e. Hausa pawh an pung zel tlat! Mizoram hian mi hausa kan lo va ngah em!

Share now