Test dawnah hlau vak lo tan phawt teh. Covid19 kai leh kai loh rizal nghah zet chu a nuam lo viau ang. Thil chiang lo a tam viau hian nun hi manganthlak duh. Covid rizal nghah hian hlau vak duh suh, thil thleng thei a tam lo lutuk! Thil pahnih chauh a thleng thei, hri kai tih an hmuchhuak thei a, kai lo tih an hmuchhuak thei bawk. 50 - 50 a nih chu! Ngawi teh, hri kai lohna chance hi tha deuh a nia, Mizorama test tawh zawng zawng 3,64,008 (22.5.21 zing)-ah za zela 2.75 chauhin hri an kai. A rate a hniam lutuk! Hlau vak duh lo phawt teh. 

Rizal a lo chhuak ta a. I kai loh chuan buaina tur a awm lo, fimkhur zui zel thung la. 

I lo kai ta hlauh a nih pawhin hlau duh chuang suh. Covid19 kai zawng zawng zinga zaa 81 vel chu engtinmah awm lo emaw, natna tuar nasa lo an ni (CDC). Zaa 81 zinga i telna chance a sang ber phawt. An tam ber miau a. Engtinmah i awm loh avangin, “False positive ka ni ang, hri kai miah lo min khung hrang a ni, test hi a dik lo a niang,” tiin inkhawngaihin dem tur zawng vel duh suh. Rilru a hrisel lo duh zawk. I nat loh avangin a dik lo tihna a ni kher lo. I nat loh avangin lawmthu sawi hmak zawk ang che. 

Thudik inhrilh tlang law law hian nun a hahdam zawk aw! Cancer zep tumte hi a hahthlak! Covid19 kai zinga zaa 14 vel chu an na ve hle a, zaa 5 chu na chhia, ngaihtuahawm tak an ni thin. (CDC) Mizoramah chuan Covid kaite hi damin an chhuak deuh vek a nih hi. Ventilator hmang tawh hial pawh dam leh an tam mai. Ni 22.5.21 zing lam thleng khan Mizoramah mi 10,024 in he hri hi an kai tawh a, mi 30 an thi tawh. Zaa pakhat pawh tling lo an thi ve a nih chu. Dam chhuak zinga tel turah inngai tawp la, ngui duh hauh suh. 

Hri i kai ve miau si chuan na teh chiam lo mah la, centre-ah emaw, inah emaw khung hran i ni ngei dawn a. Thlaphang chuang suh ang che. I hmaah mi tam takin an lo tuar chhuak tawh. I tuar chhuak ve thei chiang. 

A khawharthlak ve deuh mai thei e. Hlauhthawnna lo nei ve mah la, i demawm lem lo ang. Taksa lam tha viau mahse, rilru lam hi a nghawng ve duh riau a. Dah hran i nih laia i rilru hriselna tur thu tlem kan chah ve ang che aw, i lo hlawkpui mial takin! 

Chet tam a tha. Hmun zim teah mah ni se, ni tina hun hman dan tur insiam lui la. Mu zawi suh. Chhuatte nawt la, darthlalangte tifai la. Che lui tlat la, mi dang tan tangkai tum rawh. Nun awlthawng lutuk, mu mai mai nun hi a hlim thei lo, Covid vei lo tan pawh!

Insawizawi rawh. Insawizawi hian taksaah min tihlim theitu ‘endorphins’ a insiam chhuak. Hlim nan leh taksa chak nan insawizawi hi dam nan a tangkai a nih chu.

Mal tlat suh. Mi dang be ve la. Inhnaih chilh a rem lo a nih pawhin hmai tuamin titipui tur zawng la. I awmpuite zingah thian thar siam hlauh rawh. Nakin thlenga thian tha ber la ni zui tur in ni daih thei. Mal tlat duh suh. Pawn lam mi nen pawh a inkawm theih hi, phone kal tlangin. Chhungkaw group-ah, thian ho zingah, titi la, nui ve tho la, mi dang ngaihsak ve hlauh rawh. 

Lehkha chhiar rawh. Bible ken luh ngei tur. Chhiar tam rawh. Rilru leh thlarauin a ngeih. Lehkhabu tha dang pawh chah rawh. Pawn lama buai reng renga awm laia i chhiar hman loh chhiarna tur hun i ngah e. Finna a awm lehnghal. Pathian pawlna hun i nghah hlauh zawk a nia. 

Intifai rawh. Tuman min hmu lo tih vangin ha nawh loh phah lo la, hmai phih fai la, inbual fai reng rawh. Hmeichhe tan phei chuan lipstick tlem nen, inchei uluk ve tlat rawh. Fai hi dam nan a tha a, rilru a tiharh bawk. 

Ei that a tul. Thil rim hre lo mah la, ei tur tui leh tui lohah buai lo la, chaw ei tui lo viau mahse, in chaw dawn chu chhe deuh mahse, i taksa tan, i dam nan, ei tur awm apiang ei lui tlat rawh. I ei tur hmuh chhun ang hmu pha ve lo, Covid vei lo zingah an tam tihte ngaihtuah daih la. 

Ning suh. Nin leh nin loh hi mahni thu a ni. Ning mah la, ni 10 tal chu i inkhung tho dawn sia, ning duh lo law law rawh. Miin an ngaihsak che a, an be sek che a, i tha em? an tichhen a. Ninawm lamah a kal thei. Ning suh. Ngaihsaktu i nei a nih kha. 

Tumah ngei duh suh. Enkawltute khan an hlauh hmel che tiraw? Nangmah ang mi tam zawk an la enkawl theih nan an fimkhur zawk a nih kha. Hrethiam hlauh rawh. Hlauh hmel deuh che, ngei hmel deuh che, ten hmel deuh che, khawih thiang lo leh hnaih thiang lo ang maia melhtu che an awm zel mai thei, fiamthu ngeiawm deuha fiam pawh i hlawh mai thei, i dam tawh hnu thlengin. Ngei duh suh. Mi ngei leh huatna hian kan rilru a tichhe mai mai. In tawrhna an hriat loh vang leh an thiltih an hriat loh vang a ni e. An thiltih hre lo chu ngaihdam tur a nih kha, Isua hnung zuiin!

Miin an huat che hlau suh. Covid vei tawhho rilru țhatzia ka hria. Anmahni avangin miin an kai ve ang a, an tuar ve ang tih an hlau ber. An contact-te rizal chhuah hmaa mu mang lo an awm. Dem leh huat hlau suh u. Tuman kan demin kan haw dawn lo che u. In sual vanga kai in ni lo. Mi dangin an lo kai ve a nih pawhin nangmahni vang a ni lo e.

Dam tum tlat rawh. Hlaua beidawng a, a chhe zawng inbel tlat chuan dam a har. Ngaihtuahna chhia, nun nguai, nun hlim lo hian taksa ral dotu thlengin a tizawi ve a, dam a har. Inngaihtuah harh la, a êng zawngin thil thlir tlat la. I taksaa raldotu (Immune system) an chak duh bik. Rilru huaisen taka dam tum tlat hian awmzia a nei teh mai a nia!

Lawm tlat rawh. Covid19 vei bik vanga lawmthu sawi a har a nih pawhin, i vei hnu pawha buaipuitu i la neih zel avangin lawm la. I nat chhiat loh avangin lawm la. Ngaihsaktu leh tawngtaipuitu i ngah tak sawt avangin lawm la. Sawrkar lakah, ambulance driver lakah, enkawltu che lakah, khawtlang leh kohhran lakah, chhungte leh thiante lakah lawm rawh. Lawmna tur hi ngaihtuah zau thiam apiangin an ngah. Lawm nachang hria apiang an dam. 

Vui dur durho nun hi a hahthlak, kawng dangah pawh. Vanduai bikte hi intih dur dur loh tur. Khawvelah Covid19 kai ve mi 16,64,51,351 (as on 22.5.21) an awm a nia! Khawvela dam ve manah khawvela thil thleng, mi tawn ang kan tawng ve a ni mai. Dam man a ni ve tlat. Thi tawhte khan an tawng lo. 

Habakkuka phei chuan vanduaina chi tin reng pawh tawk mahse a lawm zel tur thu a sawi. A vanduaina thuah khan a lawm bik kher lo ang, lawm chhan dang a nei alawm. “Ka  chhandamna Pathianah ka lawm cheu dawn a ni,” a ti. Covid vei mah ila, min khung hrang mah se, thi dawn hial mah ila, chhandamna min siamsaka chatuan nunna min pek dawn tlat avangin Pathianah lawm tho tur a nih dawn chu! Habakkuka rilru hi chu a hrisel tek tek a nia! A depressed lo tawp ang! 

Thih hi hlauh viau loh tur a ni. Goa-a awm Mizo nulain Covid hneh nana rilru huaisen pawimawhzia a ziah ka chhiar a. A rilru hrisel ka tih em em chhan pakhat chu, a thih pawha a ruang an tihdan tur thlenga dam dapin a inngaihtuah thei a, thuchah fel tak a siam mai thei kha a ni. A chi-ai lo tlat. A dam chiang khawp. 

Eng nge chi-aina tur chhan awm? Vawi khat kan pian hian vawi khat kan thi ngei dawn. He thudik awmsa hi tihkhai viau tur a ni lo, sawi ngam loh tur pawh a ni lo. Covid vanga thi lo zawng pawh hi eng vang emaw chuan kan la thi vek dawn. Rilru leh thlarau hi buatsaih lawk hrim hrim tur, tu tan pawh! 

Engmah hi hlauh viau duh tur a ni lo. A tuite chu ri hum humin phul bulh bulh mah sela, a fawn nasat avangin tlangte hi nghing dur dur mah sela, kan hlau chuang hek lo vang. (Sam 46 : 3) A ni, thihna hlim kawr ruam zawh mah ila, thil tha lo reng reng ka hlau lo ang; Nang ka hnenah i awm si a; i talhtum leh i tiangin min thlamuan thin a ni (Sam 23:4)

Covid tuifawn (1st wave, 2nd wave, 3rd wave) hi ri hum humin phul bulh bulh mah sela, khawvel pum pui hi min sawi nghing dur dur mah sela, he thihna hlim kawr ruam kan zawh lai pawh hian, kan hnena awm tlat Lalpa leh a talhtum (hmelma min beihsaktu) leh a tiang (kan vawn chhan tur, min khalhtu) chu thlamuanpui tham a ni tak asin! 

Hlau vak duh teh suh khai! Min awmpuitu hi a pâ em!