India ram puma covid19 invenna pek tan niah Mizoram chhunga a la hmasaah ka tang ve tlat a nih chu!

Covid19 vaccination launching program hi Mizoramah chuan hmun pangaah hman a ni a. Zing dar 9 atangin keiniho chuan Kulikawn Hospital-ah, Principal Director hovin hun kan hmang a. Pu Modi-a’n, “A pek tan theih e,” a tih veleha pek hmasak tura tih sate chu Group D an ni a. He invenna hi thil thar a nih avang leh, rinhlelhna leh sawi nawina thu a darh nasat deuh avangin kan Group D staff-te chuan an hlau a. Kei pawh ka thlamuang zan bik chuang lo. “Doctor-in la hmasa se, kan ngam ve ang,” an ti deuh tlat a. A buaipuituten kei chu min nawr bet ta a ni ber. “Nangin i lak chuan mipui zirtir zui nan pawh a tha dawn,” tiin min han bawl deuh bawk alawm maw le!!

Thil thar, mi tam tak la tih loh, a hlauhawm dan hriat kim si loh hmachhawn hi a huphurhawm ve fo a. Mi lo dai fo tawh hi chu a zuamawm ve deuh thin. Khuangchera pukah mi tam tak an lut tlang tawh tih hre chunga 1985 kuma ka luh ve khan ka hlau miah lo. Ka luhpui kha lo lut tlang tawh sa a ni bawk a, a hnungah khan ka huai viau a ni. Covid19 vaccine la hmasatu nih erawh confi sarh a har ve viau reng a ni.

Inchiu hlau mi ka ni. KM High School kan kal laiin school ah sakawrekhrik danna inchiu tur a ni a. An inchiu sup sup lai chuan inchiu ve tawh ni awm takin ka awm der a, ka ban ka vuan a, a nat thute ka sawi vel a. Ka haw ve ta daih a. A tukah min man chhuak a, a hranpain Dawrpui Vengthar sub-centre-ah tu tute nen emawa an khalh chhoh zinga mi kha ka ni tawh. Inchiu hi ka cho viau lo. Chutah pawh damdawi thar lehnghal!

“Covid19 vaccine pek hnu lawkah TV-a an kawm laiin nu pakhat a thi,” an tihna video te ka hmu ve a. “Vaccine lak atanga ni 2 hnuah hmeichhe pakhat a thi,” tihte leh thuthang mak pui pui a awm laiin India ram pumah pek tan tur ni a lo thleng ta tho si a. Mi tin rilruah phurna leh hlimna, zamna leh hlauthawnna a insual a.

A dawh hmasatu nih kha a châkawm loh ve bawk a ni. Zan hnih kal ta khan District Immunization Offficer-in invenna ka lak duh leh duh loh min zawt tawh a. “Nang nin in lak chuan...,” ti bawkin min rawn bawl pah tawh bawk a. He vaccine chungchang hi ka zir belh ta a, ka la châk lutuk ta chuang lo.

Mahse, chiu hmasak berah chuan ka tang ta tho va. Hlau ve deuh rilru tho chung chung chuan ni 16.1.2021 zing dar 11:10-ah, hmahruai turin ka inphelh sek ta kha a nia! Lung chu a phu ru ve det det mai.

Invenna buaipuite an zei thlarh mai a. Health worker hmeichhe fel tak chuan fiah fel fai takin, “Tunah hian Covid19 invennain ka chiu dawn che a, a hlauhawm lo a. Inchiu zawhah engtin emawa i awm chuan i sawi vat dawn nia,” min han ti te te a. Min chiu ta a. A na lem lo. Inchiuna thenkhat hi chiu laia na tak a awm thin. Covid19 vaccine inchiu chu a na lem lo tih hre hmasatu ka ni ta phawt.

Min chiu zawh chuan khum 6 awmna pindan thianghlim tak, kawr var nena inthuam thap vaccination team ten hlim hmel pu sarh chunga min lo dawnsawnnaah min hruai lut a. Pindan ka luh chiah dar zat an lo chhinchhiah nghal a. Darkar chanve inngaihchan tur a ni. Ka let tawp dawn nge, ka hai chiai chiai dawn nge, ka luak a chhuak dawn nge tih chu ka ngaichang ta ran a.

Chu pindanah chuan oxygen bur an inchhawp a. AEFI KIT an dah bawk a. Chu chu Adverse Events Following Immunization Bur tihna a ni a, invenna lak hnua eng emaw thil thleng awm thei enkawl nghalna tur bur a nih chu. A chhungah chuan rikrum huna hman chi damdawi, adrenaline leh steroid leh inchiuna hnanrua a awm a. Thawhah thuta hip nghal tur oxygen a awm sa vek bawk. Damdawi hrim hrim hi ‘penicillin hua’ tih ang chi khan huat palh theih a ni. Chutiang a lo awm thuta inenkawlna tur inchhawp vekin vaccination team chuan min vil ran mai a. A thlamuanthlak hle.

Engtin mah ka awm lo zel a. Thla kan la a, inchiu zo thar lo lut vete nen fiamthu kan thawh a. Kan hlim ta phian a. Darkar chanve a ral chuan ka that leh that loh min zawt a, ka that thu ka sawi hnuah ka chhuah theih tawh thu min hrilh a. Pindan pawnah chuan Zonet leh DDK lamin min lo nghak a. Inchiu hmasa nih takah chuan eng eng emaw min lo zawt a. Ka that thu leh vaccine lak chu thil hlauhawm a nih loh thute ka sawi ve luam a.

He vaccine hi Oxford University, UK-in AstraZeneca tih hming pua an siam chhuah, Serum Institute of India-in Covishield tih hming pua a siam zui a ni a. Chimpanzee ek atanga adenovirus an lak chhuah, an siam danglam hnua mihringa pek theih tura siam a ni. Covid19 virus tak tak kha a ni lo. He adenovirus siam danglam hi mihring taksaa a luh khan Covid19 hrikin a siam chhuah thin protein ang deuh kha taksaah a insiam ang a, chu chu taksa raldotute khan Covid19 emaw tiin a hnehna tur ralthuam, antibodies a siam ang a, chu antibodies kan lo neih sa chuan Covid19 hrik tak tak a lo luh hunah pawh a lo hneh dawn a ni. Chu chu a hnathawh dan tur chu a ni.

He covid19 vaccine hi vawi hnih inchiu a ngai. Ni 28 naah a vawi hnihna chiu leh tur a ni. Vawi hnihna inchiu atanga kar 2 atanga kar 4 hnuah min veng theitu tak tak chu kan taksaah kan nei chauh dawn. Chumi hma zawng chuan inven dan kan thiam sa kha thlahthlam loh tur a ni.

He vaccine hian zaa za min ven thlap theih dawn loh avangin vaccine la tawhte pawhin invenna kan hman thiam tawh sa, hmai tuam, kut sil, mi dang hlat kha chhunzawm reng tho tur a ni. A him thei ang ber zela nun hi a fuh zel tho tho dawn.

He invenna lak hian nghawng dang neuh neuh a nei ve thei. Inchiu zinga awma pakhat zel chuan inchiuna lai na, sen, lum vet vet te, taksa na, nuam lo them thum te, chau deuh, khawsik lek lek, lu na, luak chhuak leh ruh leh tihrawl na deuh an nei thei a.

A dang sawma pakhat vel bawkin inchiuna bawk deuh lung, khawsik, luak, hrawk thip, hritlang hnaptui leh khuh an nei thei bawk a.

Luhai, chaw ei tui lo, pum na, zak hnuai thal thoh, thlan tla buah buah leh vun bawl thakte mi thenkhat, mi tlem tein an nei thei bawk.

He vaccine hi thil thar a nih avangin heng bak hriat lawk lohte pawh a thleng thei tho e. Insawiselna neih chuan thawktute hriattir vat tur a ni a. Na chhawkna pawh lo ei ve mai theih a ni bawk e.

Zaa za min veng dawn lo mah se, nunphung tikhaihlak thuap thei natna laka thui tak min ven dawn avangin invenna a awm ta hi thil lawmawm tak a ni.

Natna khawharthlak tak lak atanga invenna damdawi chu a awm ta a. He invenna lak leh lak loh hi mi mal duhthlanna a ni thung e.