Corruption tih hi tuipuiral tawng mah nise a awmzia hrilhfiah ngai lo khawp a Mizo tawng ang chiaha kan hman rim a ni. Kan tawnga a tlukpui ‘Hlemhletna’ tih te, ‘Eirukna’ tih aiin a sap tawng hi kan hmang ngun mah zawk nghe nghe; ngaihtuah chian chuan heti tak mai he thumal kan hmang rim hi a lawmawm lem loh maithei. Corruption/Hlemhletna hi sawifiahna hrang hrang a tam hle a, mawlmang te a an sawifiah dan chu ‘Mi mal hlawkna/hamthatna tura sorkara thuneihna dik lo taka hmang’ tih a ni. Mi tin pawm tlan vek theih tur hrilhfiahna a awm theih loh vang aniang UN hnuaia pawl pakhat, corruption do tura ram hrang hrangte thawhhona United Nations Convention Against Corruption (UNCAC) chuan Corruption awmzia sawifiahna lam an buaipui duh lem lo a, an dan bu leh an thuziakah a hrilhfiahna hmuh tur a awm lo. Sawi fiah chiam ai chuan hlemhletnain a huam chin te, a inven dan tur leh a do dan tur buaipui mai hi a tangkai zawk, an ti. Corruption chi hrang hrang an sawite chu : Thamna te, mahni ta ni lo sum leh thil dang ruk/hman/neih te, mi thil neih chhuh sak te, mi thuneihna palzut sak te, induhsakna uchuak/insawipui/intihpui te, felhlel taka politics thila induhsakna... leh a dangte hi a ni. Hengte hi thuneihna hman dik lohna (corruption lan chhuahna) langsar zualte an ni. Tunhma kan pi leh pute hun lai kha chuan Mizote hi hnam rinawm ti a chhal ngam kan ni ve a, Sapho pawh khan an ring tawk viau thin. Mahse, Sapho haw hnuah India hnuaia kan lut ta a, keimahni zir loh a nih rualin min awptuten an zir lo em em bawk si a, kan hnam ze mawi tam tak kan hloh zui ta a, kan rilru put hmang a inthlak danglam zel a, kum 70 pawh a vei hmain corruption hluarna society kan ni der ta mai a ni. Lui tui fim tak pawh tuihawk luang lut tlem tein a tinu thuai thin angin mi rinawm leh mi dik, hlemhletna laka fihlim tam tak kan ramah hian awm mahse mi rinawm lo, eiruk ching, mi pamham te avangin kan hnam ze mawi leh thianghlim tak kha a lo bawlhhlawh ta hle a nih hi. A hre zawkte sawi danin UT-a kan awm hnu atangin corruption hi a hluar ta hluai a, tun thleng hian ngai kan awh thei tawh lo a ni. UT kan nih atanga kum sawmna chiah, 1982 kha Mizoram Synod-in Corruption Do kumah a puang ta hial a. Chung hun laia kan dinhmun chu politician langsar tak Pu Lalsawia (CEM leh MP pawh lo ni tawh) chuan ti hian a ziak a, “U.T.-ah chuan budget kalpui dan enin eirukna hluar lo thei a ni lo..tangka lam thuah buaina a awm hlei thei lo..kan bawrhsap hluite ho pawh nasa takin an buai a, an pawisa hmanna an han chhui ngial a, engmah hremna chu an nei thei ta lo...tangka maktaduai tel hial pawh engmah lo mai mai a hman (central sorkarin) a phal avangin miin an zawngchhang a, tihsual a lo awm thei meuh lo a ni tih an hre ta a... UT kan nih laia insak leh pawisa hmanna reng reng chu tun thleng hian a chhiat zia leh a tlaktlai loh zia chu kan hmu theuhin ka ring,” tiin. Hun a lo kal zel a, remna leh muanna a lo thleng a, State dinhmunah hlankai kan ni zui a. Mipui thlan sorkarin sum ruahman leh hman danah thuneihna sang zawk a lo nei ta a, corruption pawh a hluar zel a. Ram hruaitute leh official-te zingah thuneihna hmang dik lo sawi tur an pung tial tial bawk. Hman deuha PRISM hruaitute sawi dan chuan, District Council hun lai khan Mizoram mipui hriata bengchhenpui chin eirukna Cheng 1 (Re. 1) a awm an ti a; U.T. a kan awm lai (1972-1986) khan Cheng nuai 119.43 (Rs 119.43 lakhs) a awm a. State a hlankai kan nih atanga 2010 thleng khan chutianga mipui hriat thama langsar eirukna chu Cheng nuai 4119.72 (Rs 4119.72 lakhs) a tling dawrh a ni. Corruption hi rilru lam thil a ni a, ngaihtuahna diklo lo lan chhuahna a ni. Hlemhletna laka fihlim lo chu eng ang mi pawh nise an rinawm thei tak tak lo. Corruption hluarna ram apiang an rinawm lo ti zawng pawhin a sawi theih. Chuti a nih chuan, Mizote hian engtik lai atang khan nge hnam rinawm nihna kan hloh tan le? A hun chungchangah ngaihdan a inang lo viau ang. Kumpinu sorkar an haw hnuah eizawnna thar a lo piang zel a, sum leng vak a lo tam ta deuh deuh bawk a. Corruption dotu pawl PRISM President Vanlalruata'n, “Corruption hi keimahnia ro kan inrel a, lal leh upate rorelna leh zawlbuk inthununna hmanga kan inawp lai khan a awm ve a nih pawhin a tlem hle ni tur a ni a... British-in min awp lai pawh khan sawi tur a vang hle a. British awpna hnuaia awm chunga India in thuneihna a ngah chhoh zel hnu khan sawi tur a tam tial tial a. India in min awp tak tak hnu hian a pung ta hluai hluai niin a lang,” a tih hi a pawmawm thei viau awm e. Kawng hrang hranga hma kan sawn zel rual hian corruption kalphung pawh a inthlak ve zel a, eiru-te eiruk dan pawh a felfai tial tial (a systematic tial tial) a. Sorkar hnathawk leh politician fing tak takte hian chhui chhuah hleih theih lohin mipui sum sawhhek te, dan hmanga hrem theih chiah loha eiruk te an thiam ta khawp mai. Senior journalist pakhatin, “1980 chho atang khan sorkar hnathawkte hian systematic taka eiruk an ching chho tan a, tunah phei chuan dan hmang pawha hrem theih loh turin an ziak bo thiam tawh,” a tih hi a dik hmel viau a ni. “Corruption a hluar,” kan tih fo lai hian eirute hrem an ni ngai meuh lo thung. Chumi awmzia chu eirute hian an a ruk tak taka ei dan an thiam bakah sorkar inrelbawlna (governance) a that loh vang a ni ngei ang.