Mite dinhmun leh an harsatna tawh mék emaw an lungngaihna emaw pawh, hriatpui hmasa hauh loa demna thu kha tak tak hmanga thu déngkháwng tak tak hmanga kan den sup sup cháng hian he thawnthu hi ka hre chhuak ziah thin.

Ka sawi ‘thawnthu’ hi, hmãnah sap tawnga ziak ka chhiar fuh tawh a. Eng tin tin emaw internet kawng sírah ka chhar thar leh hlawl mai a. Ka’n letling tlai khawhnu leh a ni e…

Chawhnu thlang her vêl a ni tawh àwm e. Chû dàktawr chu hmanhmawh êm êmin a thawhna damdawi inah chuan a rawn tlàn lût a. Kawngkhàr te chu a khãr ri thuai thuai mai. Mi dang, damdawi in chhúnga lo awm ve, a thawktu ni lote chuan mak an ti hlê a, a ti rálti lek lek hial!

Dárkár khat dáwn liam tâ khán, chû dàktawr chuan damdawi in atangin phone call a dawng a—hmanhmawhthlâk thila zai ngai an awm thu—‘ASAP’ (As Soon As Possible) lam thil a ni. Ani chuan chawchhùn takngial pawh ei loin a thawmhnaw a thlâk sawk sawk a; an in atanga damdawi in awmna, dárkar khat chuang motor-a tlàn ngaia thui chu, minute 45 pèl âwrh chauhin a thleng hman hial.

Inzaina pindan lam chu a pan ding nghâl a. A kawtah chuan pa valai angreng tak mi pakhat hi inzaina pindan páwnah chuan a lo vei a lo vei a. Dàktawr chuan chu pa a hmuh rual chuan mipa naupang, hmanhmawh thila zai ngai pa a ni tih a hre thiam nghâl mai.

A kiang a va thlen chuan chù pa chuan a lo àn khum nghâl chiam mai a: ‘Eng i ti nge, tûn ang hunah i rawn thlen chhê chhê chauh a? Hetiang êm êm hian i damlote i lo ngaithah thin rêng em ni? Ka fapa nunna hi thih leh dam kárah tak tak a awm tih i hre nange?’ a lo ti hlawk hlawk a.

Dàktawr chuan thaw lâk paha nui sáng chungin, ‘Ka pu, ka tih palh, ka thiam loh a ni e. Damdawi in chhúnga ka awm loh lai, ka duty loh lai a ni a. Damdawi in atanga phone call ka chhàn zawh rual rualin ka theih tâwpa hmanhmawhin ka rawn tlàn nghâl a ni e. Ti khán lo ngawi la, lo awm hahdam la, ka hnà chu ka’n thawk nghâl ang e,’ tiin a chháng a.

‘Lo ngawi la a!?’ Chù pa thinrim aw-kî chu a sáng khawp! ‘I fapa hi ka fapa dinhmun angah hian ding ve ta se, ngawi rengin i awm hlè hlê ang maw? Lo thi hman ta se, eng thil nge i tih tâk ang a?’ a tih chhunzawm leh a.

Dàktawr chuan chu pa thinrim tak chu a nuih leh sáng a, ‘Bible-a Job-a sawi kan hmuh ang khán, vaivuta siam kan ni vek a, vaivutah vêk kîr leh tùr kan ni alãwm. “Pathian hming chu fakin awm rawh se,” ti mai tùr kan ni zâwk asin. Dàktawrte hi nunna pawtseitu leh thih leh dam kára thuneitu kan ni rêng rêng hleinêm, ka pu. Pathian hnênah i fapa tán lo tawngtai la, kei leh ka thawhpuite paw’n Pathian zárah kan theih tâwk kan chhuah ve thei ang,’ tiin a chháng leh a.

Dàktawr chuan inzaina pindana luhsan tuma a inher lai chuan, chu pa chuan, ‘Kan tawn ve loh thila zilhna thu inhrilh hi chu a awlsam alãwm,’ tiin a phun zui leh bûl bûl a.

Dárkár fé an inzai hnu chuan dàktawr chu inzaina pindan atang chuan hlim takin a lo chhuak a. An zai zawh chiah, mipa naupang pa hnênah chuan, ‘Pathian zárah kan inzai tluang thei a; i fapa nunna chu chhanhimin a awm e! Zawhna dang i neih chuan nurse-ho i lo zâwt mai dáwn nia…’ tiin a kalsan a. 

Chu pa chuan inzaina pindan atanga nurse lo chhuak a hmuh hmasak ber chu a pan ding nghâl vat a. ‘Kha dàktawr han màwl êm êmzia kha!? Ka fapa chungchánga zawhna ka neih pawh a ngaithla hman lo mai ni loin mî zu kalsan nghâl nal nal a! A rawn thlen tlài nèn nèn…’ nurse hnênah chuan a lo ti var a.

Nurse chu a insúm thei ta lo a. Mit tui parawl kuang chungin, ‘Ka pu, kan dàktawr kha hre thiam hrãm teh khai. Nizàn mai khán a fapa motor-in a sú a. Ká pawh chhawn loin a boral nghâl a. I fapa zai a ngai tih hrilha kan va phone lai paw’n a fapa vùina hmunah a la awm asin! Tûnah hian nang chuan i fapa i la chang bîk a. Kan dàktawr kha chu in lama a hàw leh nghâl a ngai a… A fapa neih chhun vùina an la hmang zo si lo a…’ a ti ta a!

Enga ti nge mite thil tawn leh an dinhmun kan hriat hma hauh hian kan dem hrep a, kan rèl chiam a, thiam loh kan chantír nghâl ngawt thin mai le? Eng nge a dinhmun, eng harsatna nge a tawh méka eng nge a lo paltlang tawh, tih pawh hre loa mi dang dem ngawt hi, kan hri vei mék veiawm tak pakhat niin a lang.

Khà pa pawh khân dàktawr dinhmun a hriat hnu kha chuan, ‘Dàktawr mãwl tak’ a ti tawh bîk hauh lo ang le!