Rannung tereuh te, thomitchhaih hi ni hnih chauh a dam a, a dam chhunga a thiltih ber chu mi tihbuai a ni an ti thin. Mihring a hmuh phawt chuan a zar buai a, an mit chhungah luh a tum a, a zar buai ngei ngei thin. A dam chhung ni a rei loh tehlul nen, a dam chhung tawi teah pawh mi tibuai reng rengin a hun a hmang tlingtla thak a nih chu. 

Mihring kan nunhonaah pawh hian mi fel tak tak, mi dangte tana mi tangkai tak, mi dangte tanpui peih em em an awm laiin mi thenkhat erawh chu mite tana harsatna siam ching, mite tanpui a hneha an tana khawlhkham siam ching an awm leh thin. Sawrkar hnathawk, officer zingah ngat pawh hian hawihhawm tak, dawr nuam tak, mi dangte harsatna sutkiansak zung zung thin an awm laiin thenkhat erawh mi dangte tana harsatna siam ching an awm leh thin. Chung mite chuan mi dangte harsatna chin fel dan kawng 90 hre khiau mah se, a theih loh dan kawng 10 chu an hmu lian lui tlat a, an ching pawr peih em em bawk a, mi dangte tan khawlhkham an siam lui thin. Hetiang mite hian mi dangten hamthatna an dawng tur kha an itsik emaw tih mai tur a ni. Mi dangten hamthatna an dawn khan an hlawh a kiam phah dawn pawh a ni si lo. 

Hman deuh khan kan thianpa pakhat chuan an service chungchangah dinhmun tha zawk beiseiin office an dawr thin a. An thil nawr kawngah chuan officer pakhat, dinhmun sang tak chelhtu chuan khawlhkham a siamsak tlat mai a, an file-in chu pa dawhkan a thlen chuan builung tawk ang maiin an khawk hlauh ta mai. Theihtawp an chhuah chung pawhin hma an sawn hleithei lo. Kum khat hnuah chu officer chu a pension ta a, chu mi hnu chuan kan thiante file pawh chu tluang takin a kal a, an hlawhtling zui ta a ni. Chu officer vang chuan kum khat dawn chu an khawtlai phah ta tho tho a, kan thianpa chuan, ‘Ka tan chuan central jail-a mi tang zawng zawng ai pawhin he officer hi a sual zawk. Jail tang mi thenkhat chuan zu ruih vang te, rilru harh fim loh vang tein thil sual an ti a, he officer hi chuan rilru harh fimin min tikhawtlai lui a ni,” a ti tawp mai. Officer fel tak tak an awm laiin kha officer kha erawh englai mahin kan thianpa thinlungah chuan a tla na thei tawh kher lo ang.

Lal Davida kha Israel lalte zingah chuana mite ngaihsan hlawh ber a ni hial ang. Lal Isua meuh pawh kha, ‘Sakeibaknei, Juda hnama mi, Davida bulpui’ tia sawi ngat a ni. Davida thih atanga kum sangkhat a liam hnuah Tirhkohte Thiltih ziaktu hian Davida chungchang hi a khaikhawmna ang deuhin tawi tein a rawn thai lang leh a, “Davida zawng, Pathian rorelsak angin a dam rualpuite rawng a bawl zawhah khan a muhil a” a ti a, a tawina vang vang a, hriat rengna thlanlunga in ziakah chuan hei aia thu ngaihnawm hi a awm chuang dawn em ni? Mi thenkhat chu kan thih hnuah kan chanchin hi rawn ziak ve ta se, ‘A dam rualpuite tan tangkaina a nei mang lo. Ama tan a nung a, amah inhaivur reng rengin a dam chhung hun a hmang liam ta’ an rawn ti mai lo’ng maw? Mahni tana kan thiltih hi a thamral mai a, mi dang tana kan thil tha tih erawh mi thinlungah a cham reng tawh thin.

Tin, khawvel mi ropui kan tihte hi mi dangte tana nung a, mite tana inpe ral raih hi an ni ber thin. Ropuina hi in leh lo neih thatah te, sum leh pai neih tamah te hian teh tur ni ta se, Mother Teresa te, Abraham Lincoln te, Mahtama Gandhi leh Nelson Mandela te khan tlar hnung ber pawh an luah pha hauh lo ang. Mahse, heng mite hian an dam rualpuite rawng an bawlsak a, an tan an inseng ral a, mi tam tak tan malsawmna thlentu an ni a, khawvel awm chhungin an hming hi a dai tawh kher lo ang.

Mi hausa, sum leh pai ngahtak, in leh lo tha pui pui neite pawh hian chuti takin an thil neih hi an hlimpui chuang lo. Khua a lo rei chuan an in leh lo ropui tak te, an thlam changkang tak te pawh ngaiah an nei ve mai mai tho. Thil reng reng hi ngaia kan neih tawh chinah chuan chuti takin kan hlimpui tawh lem lo. Mi hausa tak pawh nise, mi dangte tana luang chhuak ngai lo chu an hlim lo fo thin. 

Kan dam chhung tawi teah hian Davida anga kan dam rualpuite rawngbawlsak thintu nge kan nih a, thomitchhaih ang maia mite tana harsatna thlen thintu zawk?