Kan zinga tu emaw hi eng tikah emaw chuan Hospital-a damlo riahpuiin kan awm a la tul mai thei. Chutih hunah chuan heng hi kan hre reng dawn nia… 1. Dam lo chu kan thlamuan tur a ni. Tar dam lo awmpui hian an hriatthiam ve phak loh Saptawng thumal eng eng emaw an bulah sawi fo loh tur. An natna hming emaw tiin ngaihtha lo takin an lo awm ru reng thei. Natna khirhkhan tak amah kan hriattir duh si loh anga ngaiin an lo mangang chiam thei. A natna dik tak chu thup a tul a nih lem loh chuan, a hriatthiam theih ngei tura simple-in tha takin kan hrilh tur a ni a, an enkawl dan kalphung pawh hriattir a, a damdawi hnathawh dan pawh mawlmang taka hrilhfiah an tul thin. 2. Dam lo hriat theih loh tawk vela in biak ruk ser ser loh tur. Dam lo chau tak muhil ni-a kan ngaih kha a lo harh ru reng thei a. Tih harh hlauh avanga zawi te te-a ti ti ser ser hian a chungchang sawiah a lo ngai palh thei. Tul miah lohvah ngaihthatlohna kan inthlen chiam thei. Fimkhur a tha khawp mai. Ama chungchang ni lo, amah ang deuha na chanchinte hi sawi kher a tul loh chang a awm thin. A lo dam leh tak dan sawia amah thlamuan nana kan sawi a nih lem loh chuan. 3. Ngaihsak hluau a tul ber lo thei. A hma-a duat em em ngai lovin a lo dam loh tak avanga over khawpa duat hi a awm ve thei. A tawk a awm tih hriat tur. An mamawh tihsak a, an harh changa kawm hlim satliah hi a tawk viau. 4. Inthlahrungin kan siam tur a ni lo. Damdawi man to thu te, senso a hautak thute sawi chiam chiam loh tur. A theih phei chuan kan senso zat leh damdawi man hi hrilh kher loh a tha zawk. Min zawh luih tlat paw’n a tlem lam zela sawi hi a fuh zawk. Natna tawrh tawh baka inthlahrung taka la siam zui hi a tha lo a ni. 5. Beiseina kan neihtir tur a ni. Dawt hlang hlak hrilha beiseina beidawnthlak fah chiam a fuh lo a, chutih laiin a rem dan ang anga beiseina siamsaka thlamuan a pawimawh hle.