Zawhna: Kum 21 mi ka ni a, hman niah pasal ka nei a, vawi khat sex kan hmang a.. Mahse a chhungten min duh lo a, min hruai let a. Zan khat chiah kan innei a, mahse ka rai ang tih ka hlau a, 72 hours ka ei a, ka raina tur a dang thei tak tak ang em? Tun hmain sex ka la hmang ngai si lo a, ka hrethiam lo. Damdawi ei chung hian ka rai tho ang em? Chhanna: I rawn sawi damdawi hi "iPill" an tih mai, emergency contraceptive pill, invenna tel lova sex hman palh vanga naupai venna damdawi an hman lar tak a ni. Doctor rawn lovin tam tak chuan an ei mai thin a, hei hi a fel lo. Damdawi ei reng reng chuan doctor te rawn hmasa zel thei ila a tha ber a ni. Tin, he damdawi hi nau lo pai palh tawha ei leh chuan harsatna a thlen ve thei bawk a ni. He damdawi hi ei rau rau chuan sex hman atanga darkar 24 chhungin hman ngei theih nise, a hlawhtlinna chance a sang (95%). An sawi danah chuan sex hman atanga darkar 72 chhung tala hman tur a ni a, chumi hnu lam anih erawh chuan a tangkai hran tawh lo a ni. Chutih rualin thi nei mumal lo i nih chuan a hlawhtlin leh hlawhtlin loh hre turin sex hman atanga thla khat velah tal pregnancy test tih a tha a, confirm nan Ultrasound pawh tih tel ngei ni bawk se. Kan sawi tak angin he damdawi i ei hian rai lakah chuan a veng thei ngei che a, mahse darkar 24 chhunga i ei pawhin a hlawhtlinna chance hi 95% a nih vangin a hlawhtlin loh theihna hi 5% a la awm tho a ni. Naupai venna damdawi hrim hrim (contraceptive pills) hi a zawng zawngah a hlawhtling chuang lo bawk. Chuvangin damdawi i lo ei a nih pawhin i rai leh rai loh confirm turin a thla khat hnuah zun test leh ultrasound chu lo ti thei la a tha ber.