Tun tum chu zawhna chhang lovin ngaih pawimawh zawng ka han thai lang ve mai mai ang e. Mizote hi kan hnam nunphungah chhungte leh thenrual inngaihsak hi kan chhawmnung tha hle mai a. A bikin vairam lamah phei chuan a dawngsawngtu tan a hlu lehzual hle. Damloh nikhuaa inkan te, inbuaipui te, thisen pek ngai thut pawha buaipuitu Welfare leh Zirlai Pawl lo awm thinte hi a thlamuanthlak hle a ni. Chutih rual chuan damlo kan inkan dan hi kan inbihchian deuh chu a tha hle mai. Damdawi ina awm ngai meuh nih tawh chuan taksa a chak lo hle tihna a ni a, natna do theihna Immunity a hniam a, a bik takin Intensive Care Unit (ICU) meuha dah ngaite phei chu an immunity a hniam hle. Natna hrik an kai hma bik a, bengchhengte hian an hriat loh karah stress nasa tak a thlen thei bawk a ni. Natna hrik tam tak hi boruak atanga inkaichhawn theih (air-borne disease) a ni a. Chutiang avang chuan damlo kan turte hi chuan natna eng emaw vei chung chuan (hritlang awmna angte) damlo na zualte hi chu kan lo thei ila a tha hle. Damdawi in emaw, Nursing Home ang emaw chi reng rengah chuan Hygiene tha leh tha lo hian damlote dinhmun a hril thui hle a. Ram changkang zawkahte phei chuan damlo kan turte hi kutkawr, hmaikawr leh lu khuhna an hmantir thlap zel a. ICU lut turte phei chu hrik thahna hmangin an kap ‘fumigate’ hial thin a ni. Tin, ri bengchheng siam an phal lo va, damlo awmpuitu tur pawh hi mi pahnih aia tam an phal mang mang lo a ni. Damlo na zual kan kan hian inluh chhawkte ching thei ila, damlo bul hnaia mihring awm luai luai hian harsatna a siam belhchhah thei a, zai zawh hlimte phei chu anmahni hmuh kher tum lovin an chanchin pawh an chhungte zawt mai thin ila, chu chuan damlote a pui zawk a ni. Thenkhat chuan tawngtaisak kherte kan duh a, a that viau rualin General Ward a awm an nih phei chuan a bul hnaia damlo awmte tan hnawksak kan ni thei tihte inhriat a tha khawp mai. Thlarau changsang deuh kan nih pawhin thawm zawi thei ang bera tawngtaisakte ching thei ila, duhthusamah phei chuan damlo hnenah “Zanin dar 7 hian nangma tan liau liau ka lo tawngtai dawn nia,” te hi ti mai ila, a finthlak zawk mah. A hma lama kan lo tarlan tawh angin damlo awmpuitute hi an hah duh khawp a, chumi hre chung chuan damlo kan dawnin a awmpuitute chhawk dante ngaihtuah ila, hun reilote chhung pawh kan chhawk theih chuan a hlu hle a ni. Damdawi lei ngai leh khawi kalsak zawngte hian chhawk an mamawh fo thin a ni. Damlo kan hi a damlo leh awmpuitute tana kan tangkai dawn hran loh chuan awm rei loh ching ila, phungthluk vang ngawta inkan satliah nilovin anmahni tana engemaw ti zawng tala kan tangkai theih dan tur te ngaihtuah chungin inkan zawk ta ila, a hlu lehzual ngei ang. Tin, damlo serious an awm hian a kawtah te emaw kan phusa luai luai thin a, mi dang tan kan hnawksak duh viau mai. Kan damlo kan te ngawt ni lo, damlo dang lo awm ve te tana hnawksak lo zawnga awm kan zir hi chu a hun ta khawp mai.