Hrisel hlutzia hrethiam tur chuan damloh ve a ngai an lo ti thin a, a dik hle mai. Chhungkua hrisel tak, damloh pawh tawk ngai meuh lo, damdawiin la lut ngai lo tan chuan damloh hrehawm leh hautak zia te hi hriatthiam a har viau mai thei. Doctor-te hming hre thei phian, damdawi in inentir dan sawi zuah zuah thei chin hi chu a tlangpuiin damloh harsatna lo tawk ve fo tawh an ni duh hle. Chutih rualin inentir dan kalphung lo hre bel tawh te hi damlo dang tan an tangkaiin an thlamuan thlak duh em em thung.

Natna leh damlohna te hian hman remchan hun leh hun lo te a thliar lem si lo va, a damlo zawka te ai mah hian a enkawltu chhungte tan hian hun insiam remte hi a hautak duh hle awm e. Chutiang avang tak chuan damlote leh an chhungte tan, a bik takin natna benvawn, khumbet meuha damlohna veite tan midang kantu, chhawktu hi an hlu takzet a ni. Heti zawnga ngaihtuah phei chuan chhungkaw hung deuh te, unau ngah deuh te, a bik takin damlo enkawl kawngah phei chuan mipa aiin hmeichhia hi an lo tangkai nasa mah zawk fo mai a, fa neih tam promote te pawh hi kan population tihpun lam ai mahin harsat huna an tangkai theih dan zawng hian ka lo thlir fo thin.

Natna benvawn te, zaipui tuar, khumbet meuh damlohnate hi hun leh tha mai bakah sum leh pai a heh hle mai a. Khawpui lama awmte hi chu engtin tin emaw kan la inpaizawn dan kawngte a la awm thei a. Thingtlang lam mi, khawsak harsa zual deuh tan te phei hi chuan natna khirh vei te hi a rapthlak (ka tawngkam hman hi a hriam mah mah em ka hre law) ngawtin ka ring. Doctor rual thingtlang khaw hla zawka free/special clinic-a kan feh chhuah hian natna khirh nei, khawpui lama check chian a enkawl ngaite kan hmu fo thin a. Khawpui pan kan han sawipui hian a hautak tur zia an hriatthiam vang te pawh a ni anga, “Khawpui pan lovin damdawi min chawh mai ta che,” ti tawk hi an awm fo reng a ni.

Kum eng emaw kalta khan thingtlang kan feh chhuahna ah nu valai damlo, hnute cancer intan ni ngeia ka hriat hi Aizawl pan thuai turin ka hrilh a, a theih loh thu min hrilh tawp. A hnu feah Civil Hospital, Aizawlah a rawn inentir leh a, kan clinic ah ultrasound ka lo en sak a, a thin (liver) ah a cancer a lo tai darh vek tawh a, zai chi ziazang a ni tawh lo tih ka hmuh khan ka rilru a tihrehawm ngei mai. Chutiang bawkin khawthlang lama ka damlo en, a pum chhung thisen zampui puar ka hmuh chhuah pawh Aizawl pan hma se chu tih dan la awm thei tur kha, kan let hnu rei vak lovah Civil Hospital Casualty ah a rawn chatthla der tawh bawk (a thisen zam puak vangin).

Kan khawpui damdawi inahte hian damlo natna khirh tuar tam tak an awm reng a, an inenkawlna senso hautak chu thuhran, a awmpuitute pawh hah tak tak, thlaktu nei mumal lo an awm fo mai. Han hahchawlh lailawkna tur nei mumal lo, chhungte pan tur nei mumal lote pawh an awm fo. Damdawi in lama thawkten theihtawp chhuahin an senso turte pawh Sick Fund an dawn khawm atangin an pe fo; mahse, a daih tak tak thei lo. Heng mite hi engtin nge kan chhawk ang tih hi ka sawi tum tak ber chu a ni. Tun hnaiah mi awm thei leh khawsak awlsam zawk kan lo thahnem ve tial tial a, krismas leh kumtharah thilpek kan intihhmuh a, a lawmawm hle mai. Kohhran leh khawtlang lam pawh hetiang zawng hian kan thangharh zel a, intihhmuh kawngah chuan thil lawmawm tak a ni.

Veng tinah biak in hmunhma tha tak tak kan nei a. Heng kan biak inte hi damlo awmpuitu hahchawlhna hmun atan room hnih khatte hi reserve thei ta ila. Kohhran emaw khawtlang (YMA) lamah pawh an damlo enkawlte chhawk turin in Volunteer thei hi kan awm teuhin ka ring bawk a. Kan room reserve ah damlo chhungte an rawn hahchawlh chang pawha ei tur lo buatsaih sak ngai pawh nise kan tih theih lohna chhan tur hi ka hre hauh lo; rawngbawlna pawimawh tak a va ni dawn em kan ti hluai a ni. Tun hnai khan Falkawn Referral Hospital lama damlo buaipuitute manganna ang deuh thu post Facebook lamah te ka lo chhiar bawk a. Mi thilphal leh inpe tak takte hian damlo enkawltute hahchawlhna tur te hi siamsak ta se, an duhsakna dawngtute tan a va hlu dawn em!

Mi dang tana ke kan pen theih dan kawngah hian Mizote hi kan score sang khawpin ka hria a, phai lama damlo leh mitthi buaipui kawngah te, thisen pek kawngah te, mi harsa zawk tanpui kawngah te, kan ram ngeia Rehab Home leh Damdawi in tanpui kawnga sum leh pai leh tha thawh kawngah te hian kan inpekna hi a sang hle niin ka hria. Kan thil leh hmunhma neihte hi damlo harsa zawkte tan tangkai zawka kan hman theih hi ka beisei tlat a, kan Pathian rawng kan bawl theih dan kawng pawimawh leh hlu tak niin ka ring bawk a ni. Chhiartute’n in ngaihtuahna han seng chhunzawm teh u!