Tunlai chu MLTP Act leh MLPC Bill chungchang kan buaipui tlang a, ram hruaitute leh political party hrang hrangten politics rawngkaia thiam taka inbeihna atana an hman mek laiin mipui nawlpui pawhin kan tuipui tlang a, ngaihdan nghet tak nei sa, mahni ngaihdan sawhsawn tum chuang loten kan sawi luai luai a, a changin kan inhnial bawk a. Hetia zu khap bur la duh leh dan hmanga zu tihzalen duhte kan inhnial luai luai lai hian a pawimawh ber zawk ‘Dan rorelna’ hi kan ngaihtuah tel a tha khawp mai. Mipui thlan lal MLA rualte hi dan siamtu leh vil zuitu, a Sap tawngin ‘Legislator’ an ni a, mipuite himna tur leh hamthatna turin dan an siam ang a, dan siamtu an nih angin an zah tur a ni a, an lekkawh (Enforce) tur a ni bawk; zawm a hlawh loh a nih chuan a mualpho tur chu dan siamtute an ni. Dan reng reng hi bawhchhiat theih loh khawpa tha famkim a awm lo a; mahse, lekkawh that loh vang liau liaua bawhchhiatna a nasa a nih chuan sorkarin a tih tur a tih loh vang a ni ang. Dan siam chungchangah hian thlirna hrang hrang a awm thei a, thusawi lar tak pakhat chu “Laws are made to be broken” (Dante chu bawhchhiat tura siam alawm) tih hi a ni. Ram hruaituten dan an siam reng reng hi bawhchhe tawk an awm ngei dawn tih a chiang sa a, bawhchhiat theih loh dan a awm a nih chuan dan mak tak a ni ngei ang. Mahse, palzut tawk leh bawhchhe tawk an awm dawn tho tih vanga dan siam loh ngawt chi a ni lo a, ram tana tha tur dan siam tura thlan an nih ang ngeiin an siam zel tur a ni zawk a. Zawm a hlawh theih ngeina tura hmalak zui zel pawh an mawhphurhna a ni bawk. Chutiang zawnga chhut chuan kan ram hruaitute leh mi thenkhatin MLTP Act in zawm a hlawh loh thu an sawi thin hian a mawhphurtu chu a siamtute leh a lekkawhtute anmahni an ni tihna a ni ang. Mipui thiam loha puh daih hi mahni hmaiphih fai tumna mai a ni. India constitution a khua leh tuite chanvo bulpui (Fundamental rights) zinga hmasa ber chu ‘Mi tin intluktlanna’ tih a ni - dan hmaah chuan mitin kan intluk tlang vek tur a ni. Mahse, a tak takah chuan dan palzut thei leh dan chunga leng anga ngaih theih tur kan ramah hian an tam khawp mai. Aizawlah hian traffic rules bawhchhia ka hmu zauh zauh thin a, dan hmanga pawisa chawitir an tam laiin traffic police-in an man tak loh a, an en liam mai mai pawh ka hmu thin. Khawpui chhunga insak dan tura sorkarin dan a siam bawhchhe lui pawh an tam mai. Hengte hi chu a la holam zawk a, thuneitute zingah heng aia dan khauh zawk pawh pawisa lo an tam hle. MLTP Act kan vui liam mek pawh hi a tir te atangin mipui mimir chung lama mite leh thuneitute zingah palzut lui an awm reng a, he dan khauh tak hian a kawng a zawh theih loh chhan chu mi thiltithei zawkte chunga dan lekkawh a nih loh thin vang a ni fo. A te ber atanga a lian ber thleng hian he dan hian min hrut rual vek ta se chu a hlawhtling ngawtin ka la ring fan. American dan hremi lar tak Dale Carpenter chuan, “Khua leh tuiten dik tak leh thlei bik nei lo a dan lekkawh theih a nih an rin loh miau chuan dan rorelna hnuaiah an awm lo tihna a ni ang a. Dan avanga mi corrupt tak takte rorelna hnuaiah mipuite chu an awm tihna a ni zawk,” a ti. Ngun taka chhut chuan keini pawh hian corruption vangin dan rorelna hi kan ring zo lo a nih hi. Mizo mipuite hian dan kan zawm that tawk loh chhan hi enge ni ve ta ang le? Ram hruaitu atan inthlan lai atanga dan palzut ching kan thlan tlin hlawm vangte hi a ni thei ang em? Ram inrelbawlna tha (Good governance) hnuaiah chuan mitinin dan leh hrai an pawisa a, dan palzut thei khawpa chungnung bik an awm lo a, dan rorelna hnuaiah mitin an intluktlang thin. Greek mi fing Aristotle chuan, “Ram dinhmun tha leh ngelnghetah chuan dan hmaah mitin an intluktlang vek,” a lo ti a. Dan palzut ching ram hruaitu an awm hian ram a buai thin avangin United Nations pawh hian dan hmanga rorelna (Rule of law) hi a ngai pawimawh hle a kum 2012 khan member ram hrang hrangte nen thupuan chhuah intawm (UN General Assembly Declaration on the Rule of Law at the National and International Levels) an nei nghe nghe a ni. Dan zawm hi khua leh tui tha nihna a nih mai bakah kan ngaih pawimawh a kan zawm that hian kan vaia that tlanna tur zawk a lo ni. Chutihlaiin, democratic ram kan nih avangin mipui tawrhna thlen thei tur dan emaw mi tlemte inhaivur theihna tur dan emaw mipui tam ber duh loh zawng dan emaw siam a nih chuan khua leh tuiten dodal theihna chanvo kan nei thung. Entir nan, mipui nawlpui tawrh tur leh mi harsa zawkte chhiatpui tur ngaihtuah miah lo a chhiah thar lak tum a nih chuan mipui thuneihna ram kan nih avangin dodal ngei ngei tur zawk a ni ang. Chutiang zelin sorkara la tel ve ngai miah lo mipuite hian sorkar hmalakna tha lo leh an dan siam him lo tur dodal ngam hi kan tih tur zawk a ni. Kan ramah hian dan zawm hi phurrit anga ngaih chang kan nei fo thin a, pi leh puten an hun laia khawtlang inawpna dan an zawm that em em laiin keini an thlahte hi chuan dan ngaih pawimawh loh luih hi kan ching ta viau thung hi thil mak tak chu a ni. Dan zawm tura inzirtir thar a ngai tihna pawh a ni thei ang. Tunhma Saphoin min awp lai kha chuan kan pipute kha rinawm taka dan zawm thin an nih avangin hnam rinawm leh rintlak takah min ngai ve thin a. Mahse, India hnuaia kan awm hnuah hian politics-in kan hnam nunphung nasa takin a khawih danglam a, hetia a hlemhletna chi hrang hrang a lo hluar tak hnuah phei chuan kan hnam ze mawi tam tak kan hloh tawh a. Eirukna leh hlemhletna chi hrang hrangte hi dan pawisak lohna a ni a, chutiang mi chu kan chunga thuneitute an ni lawi si a nih hi. A tawpna atan chuan pi leh pu huna kan hnam ze mawi tak takte kha kan neih let leh a, he ram hi ram nuam tak a siam kan duh tak zet a, he hnam hi hnam rinawm leh rintlak nih leh kan duh a, kan ramin hmasawn zel se kan duh tak tak a nih chuan Good Governance ziarang pawimawh tak Rule of Law (Dan hmanga rorelna) hi kan hruaituten a tak taka an kalpui a ngai a ni.