Buai reng renga hna ka thawh a, nupui fanaute tan pawha hun ka neih mang loh thin lai hian he thawnthu hi ka hre chhuak thin a, hun ka insiam lui leh hram thin. %%%%%%%%% DARKAR KHAT LEK Pa pakhat chu hah takin tlaiah a lo haw a. Hun pangngai aia tlaia haw ngai ziah khawpa thawhrim a ngai fo chuan a thinte a tirim deuh hlur tawh mai. A fapa kum 5 mi chuan kawngkaah a lo hmuak a. “Pa, thil ka zawt duh che a?” “Aw, eng nge ni?” a ti bak deuh hluk a. “Pa, darkar khatah hian engzat nge i hlawh ang,?” “Chu chu enge i hriat ve a tulna? Engatan nge min zawh?” a ti vin hlur a. Hah mah nak alaiin! A fapa chuan, “Ka hre duh hrim hrim, mawh, darkar khatah hian engzat nge i hlawh ang?” tiin a la zawt leh talh a. “Darkar khatah dollar 20 ka hlawh, i hria em!” a hma aia vin zawk mahin a ti khur khur a. Naupang chu beidawn hmel takin a kun ta ngaih a. A lo dak chhuak leh a, “Pa, dollar 10 min lo puktir la,” a rawn ti ta reuh a. A pa chu a thinrim leh zual ta zak mai a. “Ka hlawh zat i hriat duh chhan chu inkhualtelemna tur thil holam mai mai i lei duh vang lek maw lo ni a! I pindanah kal la, mu nghal rawh! Mahni duhzawng chauh hi in ngaihtuah a. Nilengin hah em emin hna kan thawk a, chutiang naupang chhe thil ngen mai mai ka buaipui hman lo che,” a ti vin ta hlur mai a. Naupangte chu ngawi rengin a pindanah a lut a, kawngkhar chu a khar ta a. A pa chu thutthlengah chuan a’n thu hnawk a. A fapa thil dil chu an ngaihtuah nawn thin a, a thinrim telh telh ta mai a. Hah takin hna a thawk a, inah pawh awm hman mang loin anmahni chawm nan ban hun pangngai aia tlaiah haw fo ngai khawpin a thawkrim a ni a. Pawisa dil duh vang mai maia a hlawh zatte a’n lo hriat duh ve khanglan chu le! Darkar khat hnu vel chuan a inngiahtuah fim ta deuh a. A ti lutuk deuhin a inhre ta a. A fapa chuan ni dangah pawh pawisa a dil fo azeng pawh a ni lo a, dollar 10 man thil engemaw mamawh riau a lo nei ve a ni mai thei asin! A fapa pindan lam chu a va pan a, kawngkhar chu a’n hawng dek dek a. “Bawiha, i muhil tawh em ni?” a va ti a. “Aih, Pa, ka la meng,” “Nichin khan ka thin kha a chhe deuh thut a, vawiin ka hnathawk ka hah deuh a ni. Kha dollar 10 chu ka pe ang che,” a ti ta a. Chuveleh a fapa chu a rawn zuang tho a. “Pa, ka lawm lutuk,” tih pahin a lukham hnuai chu a dap a, pawisa chuar tawh tak chu a rawn phawrh ta niah mai a. A fapain pawisa dang a lo nei tho tih a’n hmuh chuan a pa chu a thinrim leh dawn ta mai a. Naupang chuan a pawisa chu a’n chhiar ta niap niap a. A pa chu a en chho ha a. A pa chuan, “Kha, i neih reng kha, engati nge a dang min dil belh vel a?” a lo ti leh hlur a. A fapa chuan, “Ka nei daih lo a, tunah chuan ka nei daih tawh a,” a lo ti mai a. “Pa, tunah chuan dollar 20 ka nei ta. I hun darkar khat lek ka lo lei thei ang em?” a ti ta reuh a. Nangmah thlahlel em emtu, i nuna mi pawimawh em emte nena ‘darkar khat lek’ hun hlimawm hmang turin hun i nei ni tin thei hram lawm ni le?