Aizawl Zotlangah sawn ka Ni Tlani a awm a. Thil zawng zawngah a dawihzep lo na a, natna chungchangah hi chuan a ngaihtuahna hian a thleng thui hman thin a nia!!

Min rawn phone a. “Ka zun a in nasa lutuk. Hetiang hi em ni kal thlak ngaite awm dan?” a rawn ti leh nghal pawp mai pek a. Tum dangah pawh, “Ka cancer tihna em ni? Ka cancer ngei tawh a nih hi!” te hi a rawn ti thuai zel.

A hlau thuai a. Mahse, fak em emna ka nei. Thil hrilhfiahin a awih mai a, a hlau zui lo mai thin tlat a ni. Hlauh tur leh hlauh loh tur hrilh hian a awih hmak a, tih tur hrilhin a zawm mai. Cancer a nih loh thu hrilh te, kal thlak ngaite awm dan a nih kher loh thute hi han hrilh ila, a dam leh mai a. A aia hriate thil sawi hi a awih a, zawm tur sawi hi a zawm mai. Hriselna thuah a chiai thuai a, a inenkawl vat a. Dam nana a tih tur hi a ti nghal mai. A hlauhna hian thuawihna a chhawm tel tlat hi a fakawmna a ni. A cancer-te hi kan tidam tam tawh a nia!

Mi dawihzep tam tak hi chuan thu kan awih lo tel ta thin a. Kan dam thei lo a, kan mut a tui thei lo. Kan hriselna atana tih tur min hrilh ti duh chuang lo, eng emaw hleka manganga phi ruai lawi si kan tam. Rinhlelhnaa khat, mi thiam sawi awih duh chuang si lo, eng emaw hleka hlau khu leh ruai site hi an awm. Mi tam tak dawihzep hi chu kan intifing si a, kan fing tawk si lo. Hlauh tur dik hlau si lo, hlauh loh tur hlau site hi kan tam a nia!

Mi thusawi awih mai a hahdamthlak chang a tam mai. Pathian thu awih maite hi a tha mai. Natna chungchangah te, khawvel thilah te, thlarau lam thilah pawh ‘rinna dik’ nei mai hi an hahdam chawk. Pathian Thu pawh hi kan hmuhchhuah a ni lo a, Isua an khenbeha a thawhleh lai paw’n kan awm hek lo. Mahse, ‘hmu lova ring maite’ hi chhandamin an awm dawn chu a ni si.

Hlauh neih hi dawihzep tihna a ni vek lem lo. Hlauh zawng a inang lo thin. Hlauhna hian a tha zawngin nun a kaihruai thei. Hlauh nei miah lo hi an awm hauh lo ang. Hlauhna avangin fimkhur ila, hlauhna avangin nun uluk ila kan tifuh mai ang. Hlauhna avangin he leiah leh khawvel lo la awm turah kan hahdam phah thei tlat nia!

Hlauh loh tur hlau, hlauhawm a nih loh thu sawi pawha awih duh si lote nun hi a thlamuang thei tlat lo. Hlauh tur dik a awm. Dawihzep dan tha a awm.

Pathian hlauh leh Pathian tih hi dawihzep dan tha ber a ni. Miin Pathian a hlauh chuan a thu awihin a duh zawngin a awm tur a ni. Chu chu a tan a tha. Pathian hlau inti si, a thuawih chuang si lo hi kan tap kan tap mai zawng a nih hi. Pathian pawh hlau tawh lo nun phei chu tihngaihna a awm tawh lo.

Hlauhna avanga nungchang tihdanglam theih hi dawihzep dan tha ber dawttu a ni. Hlauh ngah si, dawihzep si, hlau lo tura nungchang dik neih tum chuang si lote nun hi hahthlak tak a ni.

Hlauh tur dik hlauh hi dawihzep dan tha a ni. Hlau lo tura min titu thuawih ngam khawpa dawihzepte hi a tha tlat! Hlauh tur dik hlaute nun hi zuk thlamuang zawk tlat a!

Mi tinin hlauh tur dik kan hlauh theuh hunah, ‘Hlauhawmbera’ thu kan awih vek hunah kan ram tlu chhe mek nia lang hi a ding chhuak leh chauh ang.