Dr Hrekima Titi

DEM MAI TEH SUH

Dr. C. Lalhrekima - Aug 30, 2014

DEM MAI TEH SUH

Ka thianpa nupui sun hian a sun urh deuh a, mi mak tih tur zawng tak takte hian a awm ta thin a. A huat ber lah chu, “Mi pawhin nupui an sun a, he tin an awm kher lo,” tia zilhtu leh demtu an ni. ‘Mi’ a ni lo a, amah a ni a, amahin nupui a sun a ni a, a sun dan chu a sun dan a ni mai a. Mi dang nen tehkhin a duh thak lo.   Kan fing hlawm khawp a, thilte hi kan hre khawp a. Mi nunah hian inrawlh kan tum a, kan lo relpui ve a, thurawn leh fuihna te hi kan chhakchhuak zung zung hlawm mai a. Hei hi thil sual a ni lo. Induhsakna a ni reng a. Mahse kan va puih tumte hian an hrethiam mawh khawp. Mi hrethiamtua tang duh bik lote pawh hian hriatthiam chu kan lo mamawh ve vek tho si a nih hi! Tu pawh mai hian hriatthiamna hi kan lungawipui fo. Mi dinhmun kan hriatthiam a, an thlirna kan tawmpui thiam chuan inhauhna turte hi zuk tlem thei a! Kan hriatthiam avangin an awm dan zawng zawng chu, “A tha e, a dik e,” kan tihpui tur erawh a ni kher lo. An thlirna atanga thlir pui phawt hian puih an tulna hriat a awlsam a, puih dan tur pawh a ngaihtuah thiam theih a, puihna pawh an dawngsawng thiam thin. Mahni dinna hmun sawn hauh lova lo rik ve lung lung te, thlirna tlang dang atanga thlir tum hauh lova sawi ve puat puat te, mahni pindan chhung atanga mi dang lo dem viau te, thuthmun sawn hauh loa ngaihdan tumtlang pui lo sawi ve zut zutte hi a finthlak loh. Mi harsatna leh an dinhmun tak hre chiang ngawt lova lo dem ve maite hi kan awlsam khawp. Zawh fiaha zir chian ve hma hauhin ngaihdan rum pui pui kan vaw thla ve pawp pawp thin fo. Kan zirchiang peih lo a nih chuan ngawih mai a tha. Hrechiang loa sawi ve talh kan duh a nih pawhin a tha lama sawi phawt a him. Nupui sun hlim hnem tur chuan nupui sun tawh bawk an tha. Sun ve hauh loin, “Mi pawhin nupui an sun a, heti’n an awm lo,” va tih ve ngawtte hi an thin tirimtu lek kan ni thei. “Nupui sun chu a na asin, upain, ‘dar lehlam sahthlak ang’ an ti a, chu chuan a hrilhfiah zo lo. I na a, i tuar hi i demawm loh e, kei pawn ka tuar zo lo tep tep thin alawm..,” tia nupui sun tawh, a dinhmun ang lo paltlang tawhin an titipui tan a, an titi kal zelah tawrh dan tha zawk a share chhoh khan an pawm thiam duh bik. Mi rilru put dan leh an dinhmun tur ang ngaihtuah hauh loa Pathian thu hmanga inzilh leh chiamte hi a sawt mawh khawp. An thlirna atanga thlirpui thiam chunga Pathian thu sawipui erawh an ngaihthla thiam tho. Mi dinhmun dik tak leh an harsatna paltlang hriatpui miah loa buklung lo khaisak a, lo hmuhsit leh lo dem mai te, lo thinhrik leh lo enhran a, lo rel ve zut zutte hian hliampui kan tawrh belhtir thei. Mi thlirna atanga thlir duh hauh loa mahni ngaihdana teh a, talhfiak lek chhuaka mi hlap maite hi a finthlak loh. Kan la tawn ve loh leh kan hriatthiam loh zawng tak thlenga zuk inngaihtuah thiampui hi zir theih a ni. Ka khawvel hi khawvel awm chhun a ni lo a, mi dang hian khawvel hran an nei ve a, an khawvel leh an thlirna chu a zahawm vek tih hi hriat tur a ni. Mi hi lo ral dem nghal mai thin teh suh. Kan zavai hian puih ngai vek kan ni. Puih ngai si hi kan chapo viau vek bawk si. Demtu kan mamawh lo a, rorelsaktu kan mamawh lo. Hrethiama min puitu a ni kan mamawh theuh ni. Puih tum chuang lo demtu ringawt phei chu kan mamawh lo khawp mai.
Share now