Dr Hrekima Titi

Dendrite Power

Dr. C. Lalhrekima - Sep 13, 2014

Dendrite Power

Dendrite rui thin rawlthar an rawn hruai a. A hnim thin chhan ka zawh chuan, “Power kan nei thei a, thilte hi kan dawi alh thei,” a ti a. “Iau, a va ropui awm ve! Dendrite leina ka pe ang che ang a, ka hmaah hian hnim la, ka dawhkana lehkha hi i tihalh theih phawt chuan Dendrite hi ka hnim ve tawh ang a, chutiang power neihte chu ka chak ve tho alawm,” tiin pawisa ka phawrh a. A nui tut tut a, “Ka duh lo, mahni chauhin kan hmu thei a,” a ti ta tlat a. _______________________ Thatchhe awm ngaihna hre lo, ruih ve hrim hrim chak, tlin sang mang si loho chin chhuah mah nise Dendrite hnim hi an la intihhmuh ve zel a. Dendrite an hmuh mai loh leh Correcting Fluid te an hnim ta zel mai. Hengte hi thil inang, ruih dan in ang, hlauhawm dan inang an ni. Dendrite, Petrol leh Correcting Fluid-te leh hetiang ang chi ho ruih theih thil dang te hi ruihtheih thil thliar hrannaah chuan Inhalants an ti a.Hman sual sawi nan pawh Inhalant Use Disorder an ti. Hip ruih ve theih, ngaih ve theih bawk a ni. A ruih erawh a nuam lem lo khawp mai. Dendrite hi a tlawm a, hmuh a awlsam a, khap a ni hran lova, in tinin kan mamawh a ni a, lei a harsa lem lo. Thuhruk a awlsam a, ruih a awlsam a, rui ve duh tho pawisa nei mang si lo zingah a hluar duh. Cheng sawmhnih panga (2011 a siam rate!) leh rawmawl chhia neih chuan nilengin a ruih theih der! Rawltharho zingah engemaw han ruih ve hrim hrim hi pa riau leh ropui ve riaua ngaihna a awm fo. Inchhung boruak nuam ti lo, chhehvela hlimna hmu thiam bawk si lo, khawtlang nun nawmna pawh pha si lo, thlarau nun lam tuai thar taima si lo zingah Dendrite hnim rui thin hi an tam niin an sawi. Tin, Dendrite hnim chingho hi naupan lai atanga luhlul, mi bum leh dawt sawi ching, rukruk hreh lo, rilru hah leh thinrim ru teuh, sikul nuam ti lo leh dem kai bik nia inngaiho an ni thinin zirmite chuan an sawi bawk. Dendrite chu han hip luh veleh chuap kal tlangin thisen zamah a lut nghal a, rang takin thluak a thleng zui nghal thin. Chu chuan luak a tichhuak deuh nghulh a, phurna a siam zui bawk. Mahse phurna chuan rei a awh lova, an lo nguai zui a, an luak zui bawrh bawrh thei bawk. Tawng a muang a, an seh chilh a, an inthazo lova, an kal pai khat khat a. Rilru a fim lova, chhia leh tha hriatna a buai a, ngaihtuahna a tibuai a, nikhaw hre lo hialin an awm thei. Dendrite hnim chingho hian an ruih laiin mi an dawi theiin an insawi thin. Chumi thiam ve chak avanga ti ve thin an awm. Dendrite chu an han hnim a, chutah le, an kut tizumin mi tukhumah an han kawk ngur ngur a, an duh duhin an dawi kualin an duh duh an tihtir thei emaw an inti ta tlat nia! He thil hi dawi awzawng a ni lo ve. Atna tenau a ni zawk. Dendrite ruihna khan rilru a tibuai a, ngaihdan mak pui pui an nei a, thil ni miah lo nia hriatna a siam vang zawkin power neia inngaiin an inhre dawi a ni. Khawilama dawithiam !! Atna a thlen avanga enkawl zui ngai kan nei nual. Miin vuak hlum an tuma inhriaa tlanchhe vak mai te pawh ka hmu tawh. Zan thla engah pheikhawk siamtu pawnchhe hman hnu niawm tak mai chu duham em emin ka leh hnarin an han hip kawk kawk a. Chutah le, thiltihtheihna mak pui a lo thleng a. Lungleng em ema kan lo kurpui thin chhawrthlapui ngei mai chu chaih theiin an inhre ta tlat a, naupang lehkha chaih chaih ang mai hian an hnuk kualin an inhre leh ta tlat pek a! Hei hi Dendrite an ruih avanga thil an hmuh phir thin leh thil hmuh sual leh ngaihdan dik lo an neih thin inkawpin a siam a ni a. Super Power a ni awkawng love. Atna hloin a tihat avanga an rilru buai ngaihdan insiam chawp ani. Chutiang zel chu a ni eng emaw tialh thei tlata inhriatna te kha! Mahni chauh hmuh theih Dendrite power chu atna a nih chu! Pathianin thiltihtheihna min pek sa piah lama power dang awlsam tea neih belh duhna thatchhe rilru hi paih a tha. Damdawi hmanga eng thiltihtheihna emaw neih tum zelte nun hi a buai thin. Thahnemngaihna leh thawhrimna nena thiamna neih belh tura zir belh a, insawizawi tauh tauh chunga power neih belh hi a hrisel a, a hlawk a, a tlo a, a tak zawk ngai e.
Share now