Nupa, hun rei tak lo cheng dun tawh pawh hi kawng engkimah ngaih dan leh duh dan a inang vek thei lo. Tha tih zawng te, mawi tih zawng te, tui tih zawng te a inang lo nuaih mai. Khawng lehlamah chuan hetianga kan ngaih dan leh duh dan hrang nuaih hi a thatna lai a awm ve tho mai. Kan hmeltha tih zawngte hi inang ta thup se, ngaihzawng inchuhin kan intibuai nuaih nuaih mai thei.

Hetih rual hian thil thenkhatah erawh ngaihdan siam kher ngai lo a, ‘a ni chu ni, ni lo chu ni lo’ ni mai ang chi hi a awm ve a. Entir nan, meihawl hi a nihphungah a dum a ni a, ‘Ka ngaihdan chuan a dum lo, a var a ni’ tih talh chi a ni lo. Tun hnaiah PMGSY hnuaia Ngaizawl khaw kawng siamna chu Assembly Speaker-in contractor hnen atangin cheng nuai za a laksak tih thuthang a awm mek a, nasa takin voice record a darh a ni. Hetih lai hian Assembly Speaker chuan Pathian hming chhalin tu pawisa mah Naia khat pawh a laksak loh thu a sawi ve bawk a, thu inkawlkalh lianpui a awm ta a ni. Speaker hian he sum hi a lak loh chuan a puhtute hian dawt an sawi tihna a ni a, Speaker hian sum hi a la a nih chuan an puhna hi a dik tihna a ni leh mai.

Tun thil chauh lo pawh kan ramah hian thil (issue) lian pui puiah inpuhtawnna a lo awm tawh thin a, a puhtute leh a puha te nasa takin an inhnial a, mipuiin thu dik kan hre lo fo mai. Tun tuma Speaker eirua puhna pawh hi a thamral leh mai ang a, mipui hian thudik tluantling kan hre lo leh mai ang tih a hlauhawm khawp mai. Mipui hian thudik hriat hi kan chanvo a ni a, inpuhtawnna kara a ngaihna hre loa kan hawihai fo mai hi a fel lo tak zet a ni.

Congress sawrkar hmasak tum pawh khan SSA sum lapse chungchangah khatih laia Education minister leh opposition MLA pakhat chu nasa takin an inhnial a, pakhatin, “SSA sum hi a lapse a ni,” a ti a, pakhatin “A lapse lo, a lapse chuan MLA atangin ka bâng ang,” a ti bawk a. MLA atanga bân huamin an in cho dun a, an tannaah khan dik an inti ve ve a ni. 

A chhui chiang turin MLA pakhat an ruat a, mipui chuan, “Chhei raw… Tu takin dawt sawi ang maw? Tu zawk tak bâng ang maw” kan ti a. Amaherawhchu, chhuichianna report a lo chhuak a, kan chân loh khanah min sir tlukpui ta daih mai. A chhuichiangtu chuan, “50-50 in an dik ve ve, a lapse tih pawh hi 50% a dik a, a lapse lo tih pawh hi 50%-in a dik,” a ti ta daih mai. A lapse chuan a lapse a ni mai a, a lapse loh chuan lapse lo ni mai awm tak, 50%-in an dik ve ve tih daih mai kha a mak viau mai. 

Khami tum khan MLA emaw, Minister emaw kha bâng hrim hrim se tih lam aiin thu dik tak kha hai lanin awm se tih kha mipui duh leh beisei ber zawk chu a ni. Hei tak hi ram changkang zawk nena kan inan lohna lian tak pawh niin a lang.

Ram changkangah chuan thil liantham, ram hnuk khawih thilah inpuhtawnna a awm reng rengin a tawpah dikna hai lanin a awm thin. Keini ram anga a tawng huai huai, a tawng chak chak, tawngkam thiam thiam insawi fihlim zung zungna ang hi a ni ngawt lo. Thangkhat lian liam taah khan USA President Bill Clinton chu While House a hnathawk pakhat, Monica Lewinsky nen chesuala puh an ni a, a tirah chuan Clinton kha a tang ve viau a; mahse, chawl loin an chhui zui zel a, an um zui ngat ngat a, inpuang lo thei loin a hual chep a, a tawpah thu dik a sawi ta nge nge a, American mipui hnenah ngaihdam a dil ta a nih kha. Bill Clinton khan ngaihdam dil lo se bân (impeach) a ni ngei ang. Kan rama thil thleng nise thu a saisa leh nuaih ang a, inpuhtawnnaah a tawp leh ringawt mawi thei.

Thil dik loa inpuh hi a tuartu tan hmingchhiatna a ni a, a puhtu lahin tul lo takin mipui an tichiai bawk a, thil tha lo tak a ni. Chuvangin, thil lianthamah inpuhmawhna a awm reng rengin thu dik hai lanin awm zel se duhthusam a ni. Dikna hmuh tur awm loa inpuhmawhna lian tham a zuzi zel chuan kan ramah hian mi pamhamte an pamham tawlh tawlh ang a, dikna duha tuihalte an tamchhawl mai ang. 

Eirukna leh ram hnuk khawih thil lian thama inpuhmawhna a thamral leh mai thin hi a pawi a, sawi leh sawi hnu, mipui hian thu dik hriat kan châk a, chu chu kan chanvo a ni bawk. Kan chanchinbumite hriam (efficient) tawk loh vang nge, judiciary lam fel tawk loh vang? Nge, kan kalphung (system) that tawk loh vang zawk? Nge, mipui hian tei rei kan peih lo a, ngaihsam taka thil kan theihnghilh leh zung zung  vang zawk, hetia issue lian pui pui, a hun laia kan phulpui hlut pawh a zuzi leh tak mai thin ni?