Dr Hrekima Titi

Dil chhuah Vrs Thawh chhuah

Dr. C. Lalhrekima - Apr 12, 2014

Dil chhuah Vrs Thawh chhuah

Hman nia pa pakhat thusawi kha ka ngaihtuah zui ta fo mai. Patling sa nghet tha tak, kum 50 mi vel, sum dawnnaa hlawhtling tak hian eng eng emaw sawi dun duh a neih avangin min rawn pan ve a. Kan titi naa kal zelah chuan heti hian zuk ti a : “Hriselna hi Pathian hnenah ka dil ngai lo. Hrisel dan tur min zirtir a, hrisel loh dan tur sawi sa a nei a. Mei ka zuk a, zu ka in a, ka insawizawi peih si loh a, ka hriselna tura ka tih ve tur ka tih peih loh chuan hriselna dil ngawt hi awmzia a nei lo. Hrisel ka duh chuan hriselna tura Pathian thu pek awm sa te, mi thiamte thusawi hi ka zawm mai tur a ni,” zuk ti mauh a! Kan nunah hian duh leh mamawh kan ngah khawp mai. Pathian hming hi kan lam chamchi a, engemaw hlekah Pathian hi kan pun thuai thuai a. Mahse, “Pathian hian mahni inpuite a pui thin,” an tih kha maw le. Mahni lama tan lak ve tum si lo a, Pathian puihna vantla beisei ngawt mai thin hi a dik ber dawn tak emaw ni? te ka ti rilru zui ta reng a. Hrisel ka duh chuan hrisel tura nunphung tha ka zawm mai tur a ni. Dam rei ka duh chuan dam reina tura Pathian thuin min hrilhte hi zawm mai tak ila, dil hranpa pawh a ngai lo ang, aman min tiam sa vek tawh tak asin tihte chu ka ngaihtuah ta zel a. Kan duh duhin kan tal a, kan duh duh kan eiin kan in a, kan duh duhin kan khawsa a, chumi nunin a hrin chhuah engemaw harsatna kan han tawh hian chunglam atanga ‘damna vantla’ kan beisei leh si thin. Hriselna leh damna dilin kan tawngtai leh vak a. A chhangtu tur ni ta ila a phurawm loh ve thin khawpte hian ka ring deuh a! Kan Pathian lah hi a tha khawp a, kan phu miah loh malsawmnate pawh min la pe zui ta zel bawk a. Hrisel phu lo tak tak hi kan la dam sen lul a, kan theih tak emaw tiin kan nungchang kan thlak duh lo vel a. Mahse a tawpah chuan kan tlin loh hun kan tawng fo. Nun uluk lem lo, vanduaina la tawk langsar hrih lote nun chuan mi thenkhat a cho phawk a, a vengtu lam ngaihtuah hauh loin, ‘a pawi vak lo aniang, ani pawh a la hrisel viau khi,’ tiin kan inhnem a. Mahse phengphehlepa khua a tlai hnuah meuh zawng a pawi tur a pawi zo tawh. Chutiang a thlen chuan lungawi takin tuar ve mai ila chu a hriatthiam theih. Mahse kan phu hauh loh beiseiin Pathian kan au leh chung hlawm si. A thatna hmachhuan hian a dil lam hi kan taima hlawm a nih ber hi! Kan dil ang kan hmuh loh lahin Pathian lakah kan vui leh hluam hluam a. “Tawngtaiin awmzia a nei lo..Pathian hi a awm tak tak lo a niang,” te kan ti leh hlauh thin. Kan duh hmu tur hian kan thawh a ngai. Kan mamawh nei turin kan beih ve a ngai. Tawngtai a ngai lo tihna lam a ni lo e. Kan dil leh tho dawn chuan kan duh nei tur khan lo che hmasa ve ila maw le! Kan thawhna te, kan beihnate malsawm tur zawk hian kan tawngtai tur a ni dawn lawm ni? Thawk peih si lo, malsawm phu si lo hian malsawmna kan beisei leh hlawm vek mai si a. Thawh chhuah ve lam aiin dil chhuah hi kan duh tawk ni awm a ni.
Share now