Zawhna: Ka pu, kum 30 mi nau thla 3 pawm ka ni a, ka fa hmasa ka neih atang hian ka ke phah leh kutphah hi a na nasa lutuk a, bawngsa ka ei phei chuan a zual thin. Ka fa pahnihna ka neih atang phei chuan a na zual em em a, ka kawng chin hnuai lam phei hi chu hnathawk sil thum ang hian a awm a, ka thu lai ka han ding tur te hi rawl thum ding tha thei lo ang hian ka awm a. Ka ke phah te hi min delh sak leh min rah sak vak te hian a nuam ka ti thin.A na hi awm reng a, a reh lo reng reng a, enge a chhan ni thei ang le?

Chhanna: Hmeichhia in nau an neih hian an tihrawl tam tak an hmang a, chu bakah chuan ruh chuktuah te pawh he nau neih (delivery) hian a nghawng ve thei thin a. Chu chuan kawng kham, tha kham te an neih phah ve fo thin a ni. Nau zai chhuah hi a tam berah chuan spinal anesthesia (hnungzang a kah hitna chiu luh tiin sawi ta mai ila) hmangin an zai thin a. Chu chuan nerve conduction kha a block a, nau neih hnua engemaw han reh fel lo te a awm ve fo bawk.

I insawiselna hi enge a chhan ber chu hriat a harsa duh viau a, bawngsa ei a zual thin i sawi avang hian gout (ruhseh chikhat) i nei tel a ni thei ang. Chumi hre tur chuan blood uric acid test a ngaih hmel. Nerve lam fel lo i nei te pawh ani thei a, engpawhnise, doctor ah i la inentir lo anih chuan lo in check tir thei la. Neurologist thiam tak ZMC lamah a awm a, amah saw lo va pan thei la, a puih theih ngei che ka beisei.