ZAWHNA : Kan thianpa in kum 60 pelh hnuah chuan vitamin ei reng a tha tiin Revital etc ang te hi a ei a, a dik hmel em? Eng vitamin nge tha ang thurawn min pe thei em?

Chhanna: Mihring hi kan kum a lo tam hian taksa khawl a lo muang tial tial a, kan ei leh in atanga kan taksa mamawh lak luh pawh a system a lo muang a. Stress (taksa leh rilru ti hah lam chi) kan zo lo hma tawh a. Chung hrang hrang te chuan kan taksa mamawh loh metabolites a lo inkhawl hma tawh thin a, chung kan taksa mamawh loh, kan taksa tana him lo te chu a paih chhuah kawngah pawh a khawl a lo muang ve tial tial bawk thin a ni.

Kan khawvel lo changkang zelah kan chenna environment a lo danglam a, boruak ti bal air pollutants a lo tam tial tial bawk a, chung te chuan kan taksa a nghawng chho ve tial tial bawk thin. Taksa a lo che tlem zual deuh a, calcium te pawh an tlachham hma bik a, ruh a chak lova, ruhtliak lakah pawh kum upa te hi an derthawng hma bik thin a ni.

Vitamins te leh Omega fatty acids te hi antioxidant property nei an ni a, kan taksa a metabolites tangkai lo paih fai kawngah an tangkai thei thin. Insawiselna hranpa an nei te anih loh chuan, leh an ei leh in an uluk a, taksa che tam tura an la insawizawi peih te anih chuan vitamin regular taka ei hi a tul kher lova. Mahse thla hnih khat te han ei a, han chawlh leh hlek chang te pawh a pawi lo awm e.