Zawhna: Kan nu hi chhul paih tawh a ni a, nupa nun kan hman hian a changin a tai hi a na thin a, a chang phei chuan kal pawh a kal tha thei lo va, enge a chhan ni ang? Mahse a hnua kan hman leh te hian a ni leh chuang silova, a vawrtawp (climax) a thleng ziah tho sia, sex hman a tai nat chang a nei thin hi enge a chhan ni ang? Sex kan hman khat vang te ani thei ang em, min lo tanpui hram teh.

Chhanna: Inzai (surgery) ah hian major a ni emaw minor deuh pawh nise tisa inchar leh khan ser a siam lo thei lova, thenkhat vannei deuh chu heng ser insiam hi a nep a, engmah pawh lang lem lovin an awm a. Thenkhat thung erawhchu sernung a insiam a, chu chuan harsatna tam tak a thlen phah fo thin. Chhul paih (hysterectomy) hi zai pui (major surgery) a ni hrim hrim a, chhul bul bawr tisa ah ser insiam engemaw tak chu a awm ngei ngei thin.

Chhul (uterus) zuk innghahna serhkaw tawp (vagina) lai kha an thui ping emaw, zai thenkhat ah chuan chhul them an dah tel bawk thin. Chuti lai bawrah chuan ser chu a insiam ngei ang. Hei bakah hian chhul bul (adnexa) a tisa awm ah hliam engemaw tak a awm ngei bawk anga, chumi han hil leh chuan ser chhe te te pawh a siam ngei bawk ang. Hengte hi chhul paih in a ken tel a ni.

Sex hman khan mipa sazu in serhkaw tawp a zuk nawr thlen chang chuan hmeichhia in na an feel ve thei a ni. Tin, chhul paih hnu chuan an thi a hul chawp-chilh nghal a ni mai a. Thi hul hian hmeichhe serh chhung tui-hnang a ti tlem a, sex hman kawngah pawh thenkhat chuan harsatna (nuam lo, na – dyspareunia an ti) an neih phah thin. Hmeichhe thi hul tawh te hi hetiang hian an awm vek chuang lova, mahse sex hman chakna erawh a tam zawkah a tlahniam thin thung.

Tin, engemaw infection vang a ni thei a. Serh bul bawr velah hrik a awm a ni thei a (reproductive tract infection), zunkawng lam infection (urinary tract infection) a ni thei bawk. Chuvangin zun test leh culture te, ultrasound a han enfiah te pawh tih theih chuan a tha ang. Engpawhnise, a awm reng lo i tih avangin thil hlauhthawnawm awm lo turah ngai ila. Insawiselna a nei ngun anih erawh chuan hmeichhe doctor lo inentir ta mai ula.