Zawhna: Kum 53 ka ni a, ka kawng leh ka zâng a na a, ka khup a chak lo em em a, ka bânpuam lai hi a inkalh leh tlat thin a, a na thin khawp mai. Chuan ka dar vei lam leh nghawng hi herh tur ang hian a awm thin a, chet a nuam loin a na thin bawk. Ka inentir a, evion lc, ecalvit plus, racopause te min chawh a, thla hnih ka ei tawh hnuah pawh awmzia a awm lem lo. Pumpui lawng hnathawh an ti a, doctor hnenah a ni lo ka tih pawhin an tang tlat a, min puih theih chuan ka lawm khawp ang.

Chhanna: I harsatna hi a tam viau mai a, tihrawl leh thazam lam fel lo (neuro-muscular disorder) engemaw tak i nei a nih duh hmel viau mai. Hriat hmasak ngai ta chu thil dang natna i nei em tih hi a ni a. Zunthlum emaw thisen sang i nei a ni thei ang em? Zunthlum hian nerve lamah harsatna a thlen duh khawp mai a, thisen sang pawh hian chutiang harsatna chu a thlen ve fo bawk. I inentir hian investigation eng engte nge an tihtir che i sawi lo va, damdawi an chawh nual che avang hian eng test emaw ber chu an tihtir che a rinawm. Chung zingah chuan Blood Sugar, Liver function test, Hemogram (hetah hian Hb a tel nghal) te leh, kawng leh zâng na i sawi tel avang hian Spine MRI te pawh i la ti lo anih chuan a pawimawh hmel.
Mipa nge hmeichhia i insawi lo va, hmeichhia lo ni ta ang la, i thi a hul tawh emaw a hul tan turah kan ngai a (i kum atanga chhutin). Hmeichhe thi hul chhoah hian an hormones pawimawh tak mai Estrogen a lo tlahniam a, he hormone hi an ruh vawngtu pawimawh tak mai a ni a; chuvangin, ruh mawih (Osteoporosis) an neih phah fo thin a ni. Osteoporosis hian tha na ang chi harsatna hi a thlen fo mai bawk. Mipa ni ta la, zu in nasa thin i nih chuan thin lam fel loh vangin nerve lam chak lo leh i insawiselna ang zawng chi harsatna hi a thlen ve thei bawk ang. Pumpui lâwng hi chuan hnungzang na a siam duh viau a, chu bakah chuan dar kham te a thlen ve fo bawk.
MRI hi ti thei la chu duhthusam a ni a, i hnungzanga thazam thla Spinal Cord lamah fel lo a awm leh awm loh a hriat chian theih ngei ang. Chutiang i nei a nih chuan enkawl thuai i mamawh dawn a. Engpawhnise, Medicine Specialist tu emaw ber lo inentir leh thei la ka ti hle mai. Ka sawi tak test chi hrang hrangte hi an chawh tho che a rinawm. A tul a nih chuan ruh doctor lamah an refer leh mai che ka ring bawk. I damdawi ei lai hi a tha reng a; mahse, a chhan tak hmuh chhuah a, chutiang zawnga enkawl i nih loh chuan i ziaawm tak tak a rinawm loh. Tin, pumpui lawng an tih che hian Endoscopy an tih tir nghal che em i sawi hranpa lova. I la ti lo anih chuan chu pawh chu lo ti tel thei la a tha hle.

Zawhna: Ka pu, zawhna holam deuh, i hman hun a khawngaiha min chhansak atan. Ha (teeth) ka nawh pah hian ka lei (tongue) ka nawt tel lo thei thin si lo a, ka uak leh bur bur thin a, a chang phei chuan ka chaw eisate hi ka luak chhuak leh vek thin. Lei bal deuha awm ka thiam si lo va, uak vak vak te hi a that pawh ka ring chuang lo a, lei tihfai dan dangte hi a awm em?

Chhanna: I zawhna chu dental doctor-ten an chhang thiam viau chein ka ring a. Engpawhnise, min rawn zawh tak miau si chuan kan chhang phawt mai ang a. Kan ka chhunga dangmawn leh hrawk tawn tirh, lei (tongue) rawn zik chhuahna lai hi a sensitive khawp mai a, kan han inkawm luah pawh hian heng lai bawr vel va khawih khan Gag reflex (Pharyngeal Reflex) kan tih mai hian hrawk tihrawl a titang thut thin a, chumi chuan luak chhuak a rawn siam ta mai thin a ni. Ha nawh hian ha sensitive zual lai te a lo awm palh thei a, chutiang chuan hetiang reflex hi a siam ve thei bawk thin. Tin, thenkhat chu lei hrim hrim sensitive zualte pawh a awm thei bawk. Ha sensitive zual lai i neite a ni thei a; chuvangin, dental doctor-te lo inentir thei la a tha hle mai. Tin, lei tihfaina bikte pawh dawrah an zuar a, chutiang chu hmang ta la i harsatna hi a puih theih che ka beisei.