Zawhna: Kum 32 ka ni a, kum sawm liam ta khan ulcer hrik awm chi ka nei a, tunah a rawn lang chuak leh tawh a. Ka thinhnun bawr leh ka hnungzang te a rawn na vak a, eng damdawi nge ka ei ang? Chhanna: Ulcer hrik tia kan hriat hi a hming tak chu Helicobacter Pylori (H.Pylori) ani a, bacteria (hrik) chi khat a ni. He hrik hi ei leh in atanga kai theih a ni a, pumpui leh ril bangah rei tak a awm thin. Mi tam zawk chuan harsatna an neih phah lova, mahse thenkhatah chuan pumpui bang a ei pan a, chumi hnu chuan pumpui acid khan a ei pilh belh a, Ulcer (Pân) a rawn insiam ta thin a ni. Enkawl that loh chuan a rei hnuah Cancer a siam thei niin mithiamte chuan an sawi. Ulcer emaw pumpui lawng i neih hran loh chuan test tih a tul lem lova. Endoscopy tih rual hian test an ti nghal tlangpui. A lo positive chuan damdawi chi thum a ruala ei ngai a awm a, HP Kit, Pantop HP Kit etc ang te hi an chawh thin tlangpui chu a ni. Zawhna: Ka pu, hmeichhia kum 19 mi ka ni a. Ka serh atang hian thi ni si lo, a var leh sen inpawlh hi a chhuak thin a, ka serh hi a thak vak vak zel a, ka tai a na vak vak zel bawk si a, min lo pui hram. Chhanna: I rawn sawi tel si loh, mahse hriat tul tak mai si chu “I la virgin em?” tih hi a ni. Virgin tawh lo anih chuan sex hman atanga kai theih natna (sexually transmitted infections - STI) engemaw ber i vei anih ngei hmel a. Chumi awmzia chu sex in hman laiin invenna (condom) in hmang lo tihna anih a rinawm. Serh atanga tuihnang chhuak (vaginal discharge) hi hmeichhia, thi la hul lo chuan an nei deuh vek a, hetiang hi a awm dan pangngai ani a. A normal lo anga ngaih theih chu - a tam lutuk te, a rawng a inthlak te, a rim a lo danglam te hian a ni. Sex hman loh pawhin tuihnang chhuak nasa chuan fungal infection a awm duh ve hrim hrim bawk. Serh thak i nei a, tai na i neih tel avang hian STI chu anih a rinawm ber a (i virgin tawh lo anih chuan), chuvangin VDRL test leh Urine R/E test tih phawt a ngai ang. Chu bakah chuan ultrasound lo ti tel thei la ka ti hle; i chi bawm leh chi kawng te enchian a tha khawp. Ultrasound leh Urine test te hi chu i virgin anih pawhin tih tho chu a ngai ang. A damdawi lam hi chu chanchinbu kaltlanga inhrilh hi a fuh ber thin lova, inchawh sual palh te a awm thei a, bakah STI tam tak hi syndromic treatment (a lan chhuah dan azira treatment pek) hmanga enkawl an ni fo bawk a, chuvangin i nat dan chipchiar zawk hi hriat ngei chu a tha hle. Chuan, nangni ang rual tan hetiang insawiselna hi hmaichhanah doctor hnena sawi te a nuam lo ngeiin ka ring a, ZALEN chanchinbuah hian ka contact no lo dil la, min phone lovin message in min lo zawt mai dawn nia. (Hetiang harsatna neite puih theihna tur Helpline te hi kan mamawh ta hle mai!)