HRI LENG VANGA BUAINA – A NGHAWNGTE

Tun lai hri leng hian chiang taka min hriat chhuahtir chu khawvel zim tawhzia hi a ni. Nikum December 2019 ah Wuhan Market area, China ah he hrileng hi hmuh chhuah a ni a, kum a lo thar a, thla thum a liam meuh chuan khawvel a deng chhuak a, hriselna lama thuneitu sang ber World Health Organization (WHO) meuh pawhin loh theih lohin March 11 khan Pandemic (khawvel ram tam zawka hri leng darh)-ah a lo puang ta hial a ni.
Keini ram zim tê, kilkhawr tak, mihring pawh tlemte awmnaah hian eng emaw chen chu kan him thei mai lo maw tia kan lo beisei laiin vanduaithlak takin he hrileng hian min luhchilh ve ta reng mai. Kan nunphung, kan chezia, hnam tihdan leh inrelbawl dan thlengin min sawi danglam a, kan rinphak ngai loh tur, biakin meuh kharin mipuite kan inkhung (lockdown) ta rup mai chu ani a. Kan chhiat \hata in\awiawm let let \hin kha, he hri leng hian min ti\i zo tawh a, chhiat tawkte hnem tura inlenpui meuh pawh kan ngam ta lo.

He harsatna kan lo hmachhawn takah chuan zawhna pawimawh tak tak kan inzawh a \ul awm e. Chung zingah chuan hri leng lo hmachhawn tur hian kan inring tawk em tih hi a ni. Kan senior doctor pakhat sawi ka hriat reng chu thingtlang khaw pakhatah hri leng a awm a, a endik turin sorkarin team a tir a. An va kal a, investigation te nei a, a vei mekte endik a, engvanga chu hri chu leng nge a nih, a tihnep dan a awm em tihte va zirchiang tur an nih laiin Free Clinic kan va hawng a ni ber e a ti. Chu hri leng chu an vanneih a siamin a darh nasa hman lo hlauh zawk a, an va kal chhan chu an hlawhchham viau ni awm a ni.

He hri leng Novel Coronavirus (Covid-19) hi hrik thar tak a la nih vangin engtin nge a inkaichhawn dan kimchang, engtin chiah nge taksa peng a tihbuai, a test danah eng ang chiah a rintlak (specificity and sensitivity tiin kan sawi \hin) nge a nih, a vei tawh dam chhuakte hi an kai nawn thei em nge a hri an vei nawn thei tawh lo (immune), a invenna vaccine a awm em, a tihdamna damdawi a awm em tih te hi zirchian mek reng a la ni a. Tuna kan hriat chin hi a la tawk lo hle.

Mipuiin kan hriat atana pawimawh tak mai chu hrik laka invenna damdawi emaw, vaccine emaw, a tihdamna damdawi reng reng hi clinical trial (zirchianna) changtlung tak leh rintlak takin thu chiang an chhuah hma loh chuan a thawk ngei dawn em tih a la sawi theih loh hi a ni. Tuna malaria damdawi leh damdawi dang an hmante pawh hi tun atan chuan a veng ve thei niin a lang tih behchhan a, a dang a awm miau hrih loh vanga hmang mai zawk an ni. Chu pawh mipui nawlpui tana hman chi a la ni lova, a taka hri kai damlo enkawl mektute invenna atan an chawh hrih mai zawk chauh a ni.

He hri leng vang hian mipui kan chiai a, thubelh chian dawl lo leng vak a tam a, kan hmuh leh hriat hnuhnun apiang kan ring nghal titih mai zel bawk a. Chu chuan hmalakna kawngah harsatna a siam fo \hin a ni. India ramah chuan sorkar laipuiin National Disaster angah a puan tawh avangin a hmalakna kawngah pawh kalphung fel fai duan lawk kan zawm a ngai a, mahni remhriatna a hma lo lak ngawt chi ani lo. Sorkar thu kan ngaihchan a pawimawh hle a, sorkar lam pawhin mipuite tana hriat tur pawimawh apiang muangchang lova an hriattir zung zung a \ul hle.

He kan hun tawng mek hian kawng hrang hrangin min nghawng dawn a. Naupang leh zirlaite hmalam hun a nghawng thui hle dawn a. Chumi kawngah chuan kan hruaituten ruahmanna fel fai an neih a pawimawh hle ang. In lamah mipui kan tawm a, state dangte entawn tlak khawpin thu kan awih thei hi a lawmawm takzet a ni. Chutih rual chuan kan tih\han loh thil a nih vangin thil hrethiam lo naupang zawkte puitlingin thil awm dan kan hrilhfiah chian a pawimawh hle. Puitling zawk kan chiai a, thu leng vak apiang kan fate/naute hriat tura kan sawi fo hian nghawng \ha lo a nei thei a; chuvangin, fimkhur nachang i hria ang u.

Kan khawtlang hi intlawhpawh, inlenpawlh, inkawm dual dual \hin kan ni a. Inlengte leh mikhualte duhsak hi kan hnam zia pawimawh tak pakhat a ni. Tun hri leng hian he kan zia hi a sawi nghing ngei dawn a, kan fate leh naupang zawk te ah fimkhur pawimawhna kan zirtir thiam a tul hle ang. A tha zawngin thlir ta ila, thianghlim kawngah te, personal hygiene lamah te hma sawn phah nan hmang ila, khawlai kan chetzia ah pawh mipa leh hmeichhia inkuah thuak thuak mai te sim nan hmang ila, mawihnai taka inzah tawnte zir thar ila a lawmawm zual ngawt ang.

Ka han belh duh chu kan lo hriat tawh angin hri leng chi hian taksa chak lo, immune system chak lo a ti buai hma bik hle a, chutiangin kum lama upa zawk leh naupang lam te pawh an sihhnip fo thin. Kan nu leh pa, pi leh pute hriselna kan ngaihtuahpui fo atha ang. Kan hriselna hlutzia hi hre thiam ila, zuk leh hmuam leh ruihtheih thil lamah pawh insum nachang hre thar ila, ei leh in uluk pawimawhna te, taksa sawizawi pawimawhna te pawh i hre thar hlauh ang u.