Zawhna: Thak bawl lo chhuah apianga thawk nuam lo rawn keng tel ziah hi enge a chhan ni thei ang le? Allergy a nih hmel loh Dr in min tihsak si a, ka chuap chu a tha vek. Thin that loh vang te hian a awm thei reng em?

Chhanna: Thak bawl i han tih hian engvanga chutianga awm thin nge i nih tih hriat hmasak a ngai dawn a. Mipa nge i nih hmeichhia, kum engzat, eng hna nge i thawh tih te hriat tel theih nise a tha hle mai. Vun lam insawiselna hi kan chenna boruak lum zelah hian a tam tawlh tawlh niin a hriat a, a chhan common zual te chu infection vang te (fungal infection hi a common zual a), allergy (thil huat) vang te, natna dang lo lan chhuah dan te a ni fo thin. Tin, ni zung natna tia kan sawi mai vang thak bawl te pawh a common sawt viau. Personal hygiene lam uluk loh vangte pawh a ni thei bawk.
Allergy vanga thak bawl thin i nih chuan hunbi nei deuh ten a awm thei a, i ei leh in emaw thawmhnaw hak te, vawt leh sa vang te, thil hmuar huat te thlengin a ni thei ang. Allergy vang hian vun vual thak bawl te a awm thei a; tin, i rawn sawi ang hian thawhah te a awm tel thei bawk. Allergic asthmatic bronchitis an tih hi common ang reng tak a ni a, thil huat a lo awm khan an chuak a boruak kalkawng bronchus chu a lo zim ta thin a, chu chuan thawhah te a siam thei a ni. Asthma i neih leh neih loh hre tur chuan doctor in i awm (chest) a ngaihthlak ngei a ngai anga, X-Ray te pawh a tih tir che a rinawm.
Thawhah han tih hian chuap lam ni kher lovin awm hnawhtu engemaw vangin a awm thei bawk. Chung zingah chuan pumpui leh emaw chawkawng lawng vang hian a awm duh phian bawk. Thawchham ang deuh, a full-a boruak hip lut kim thei lo angte hian an feel thin. Tin, thin (liver) lam buai vangte pawhin thawhah a awm thei. Lung tha lo nei te hian thawhah an sawisel fo. Chuvang chuan Cardiology lam doctor-te inentir thei la, skin doctor pawh i la rawn lo a nih chuan lo inentir leh hrim hrim ta la, i thak bawl bakah thawhah i neih chhan hi hriat chian phawt a tha hle.

Zawhna: Tunah kum 52 ka ni a, ka tlangval lai aiin ka baw a tla hma daih mai a, kan nu pawh ka ti hrilhhai thin hle; nupa nun pawh kan hman loh phah a ni ber e. Engtia in enkawl chi nge le?

Chhanna: Baw tla hma (“chi tla” tih ai hian baw tla hi ka rawn hmang zawk a, hei hi a dik zawk niah ka ngai) hi mipa tam tak insawiselna a ni a. A bikin kum naupang lamah a awm duh zual hle. Premature ejaculation (PE) tia an sawi hi a chhan common ber chu rilru lam (psychological) vang a ni e an ti a. Primary leh Secondary PE an tih hi a awm bawk a, Primary chu sex hman tirh atanga tla hma reng hi a ni a, Secondary hi chu a hmaa awm ngai lo, a hnu lama an neih leh sawina a nit hung. Nangmahah chuan Secondary hi a nih hmel. A hma lama i neih ngai loh, tun hnua i sawisel tak hi a chhan ni thei hrang hrang han ngaihtuah ta ila.
Stress hi a chhan common tak mai a ni. Taksa hah, rilru hah vangin a awm duh khawp mai a. In destress an tih mai, inlak thawven te, ni tin nunphung han thlak danglam te, naupang tel lova nupa chauh a han zin khawthawn te hian a chhawk duh viau mai. Tin, natna eng emaw i nei a ni thei a, a chhan common zingah chuan BP sang te, zunthlum te hi a ni bawk a. Tin, heng natna vanga damdawi ei lai i neih chuan damdawi thenkhatte hian PE hi an thlen thei a, PE mai bakah hian sazu fuk tha thei lote pawh a awm thei bawk a, chung chu Erectile Dysfunction (ED) an ti. Chung ang natna te chu i neih leh neih loh hriat theih nise. Zu in nasa te, mei zu nasaah te hian a awm duh viau bawk. Liver function buai vang hian PE leh ED hi a awm fo mai a, chuvangin I liver lam dinhmun hriat te pawh a tul thei ang.
PE/ED te hi mipa tan a hrehawm thei khawp mai a, nupa inhriatthiamna neih a pawimawh hle mai. Nupa nun hman loh phah emaw, hman that ngam loh phah nana hmante phei chu a tizual duh viau bawk. Chuvang chuan inpawh takin i harsatna hi i nupui nen sawi dun thei ula, doctor (Medicine Specialist) te pawh rawn a tha hle. Stress emaw psychological disorder lam vang a nih theih vangin Psychiatrist te pawh rawn thei la, hma I sawn theih ka beisei. A enkawl kawngah hian damdawi ei mai aiin psychotherapy te pawh a tul thei a, chu bakah chuan taksa lak fit a pawimawh hle bawk. Ei leh in uluk te, zuk leh hmuam leh zu insum te, exercise lak regular te hi a enkawl kawngah chuan a pawimawh hle bawk a ni.