Zawhna: Hmeichhia kum 58 mi ka ni a, zuntlum ka nei a, pumpui ulcer ka nei bok a.ka thin-ah thau in a boh a, zunthlum leh pumpui ulcer chu ka inenkawll a.A bikin thin a thau boh hi engtia enkawl chi nge ni ang? A hlauhawm thei ang em? Chhanna:  Thin thau bawh kan tih hi "Fatty Liver" an ti a, thin (liver) ah thau inphum a lo tamin hetiang hi a lo thleng thin a ni. Thin-ah hian thau chu a awm tho a, mahse Fatty Liver kan tih hi chuan thau inphum (fat deposit) a lo tam lutuk a, thin rih lamah 5-10% lai thauin a luah thin a ni. A chhan hrang hrang a awm thei a, a tlangpui chuan chi hnihin an then a, Alcoholic Liver Disease (ALD) an tih, zu in vanga awm leh, Non Alcoholic Fatty Liver Disease (NAFLD) tih ani. ALD hi chu kan tarlan ang hian zu in mi ah bik a awm a, Zu in mi in an nei vek chuang lo. Zu in thin, Hepatitis C nei te, thau lutuk te, ei leh in mumal lo emaw thil mawm ei nasa ah te a awm duh bik. NAFLD hi chu a chhan tak sawi mai theih a ni lova, ni thei awma an sawi chu damdawi thenkhat vang te, Viral Hepatitis (B&C) te, rihna tlahniam thut vang te leh, ei in fel lo (malnutrition) ah te a ni. Kum valai lam (40 chunglam), zunthlum nei, cholesterol sang nei te hian an nei duh zual bawk. Hmeichhia hian an naupai laiin an nei thei bawk. Fatty Liver hian harsatna a thlen vek kher lova, mahse thenkhat chu an thin a ti lian a, enkawl loh phei chuan thin sawng (Cirrhosis) a thlen thei a ni. A lan chhuah dan hi a in ang lova, thenkhat chu insawiselna hranpa nei miah lo an awm laiin thenkhat erawh chauh ngawih ngawih, chaw ei tui lo, rihna tlahniam, luak chhuak fo te an nei thei. Tin, thin hnun zawnah hian Pumpui lawng ang deuhin a na thei bawk. A hriat chhuah danah chuan thisen test (Liver Function) atang te, Ultrasound hmang te leh, Liver Biopsy atang te in a ni a. A enkawl dan turah pawh hian specific tak chu a awm lo chungin nangmah bikah chuan Zunthlum control that te, ei leh in lam fimkhur (thau leh mawm lam insum te), regular exercise te a ni a. Zu in mi tan chuan insum a pawimawh hle. Liver function test hi thla thum emaw li danah te nei thei la (in monitor nan), thin khawih buai thei damdawi laka insum te a pawimawh hle; a bikin Paracetamol hian thin a ti buai fo a, ei tam loh a him.