Zawhna: Ka pu, hmeichhia kum 23 mi ka ni a, ka pasal nen hian kum khat kan innei tawh a, fa kan la nei lo a, thla tin chu ka period ve a. Fa hi ka awt ve lutuk a, keimahah hian engnge tha lo ni ang? Min chhan theih chuan ka lawm hle ang.Zawhna: Ka pu, hmeichhia kum 23 mi ka ni a, ka pasal nen hian kum khat kan innei tawh a, fa kan la nei lo a, thla tin chu ka period ve a. Fa hi ka awt ve lutuk a, keimahah hian engnge tha lo ni ang? Min chhan theih chuan ka lawm hle ang. Chhanna: Fa la nei lo niin i insawi a, vawi khat tal nau i pai tawh em, i chhiat nge emaw, enghelh tham lohin leh hriat lohin i chhiat tawh em (hetiang hi Missed Abortion an ti a, thi neih pangngai aia tam hlek, rei hret angtein an awm thin)? Heng zawhnate hi a chhanna han hre tel thei ila a tha hle mai. Engpawh nise, nau la pai miah lo i nih a, kum khat emaw, a aia rei emaw in innei tawh a, regular takin invenna hmang miah lovin nupa nun inhmang tawh a nih chuan naupai theih loh, Primary Infertility i nei tihna a ni ang. A chhhan ni thei awmte leh a inenkawl dan turte sawi ka’n tum ang e. Hmeichhiain fa a neih theih loh chhan common ber berte chu chibawm (Ovaries)-in chi (Ovum) a siam kawnga buai/fel lo te, chikawng (fallopian tubes) fel lo te, chhul lam dik lo te leh chhul hmawr (cervix) lam harsatna te an ni. Kum a tam hian, a bikin 30 hnu lamah fa neih a har tial tial bawk. Tin, mipa lamah a chhan common takte chu mipa chi tlem te (low sperm count), mipa chi che tha thei lo te (low sperm motility), mipa chi rawn chhuahna kawng chiangkuang lo (block emaw, zim emaw) te pawh a ni thei ang. Hetiang hi a nih vangin fa neih theih loh chuan hmeichhia mai ni lovin an pasalte pawh check tel vek an ngai thin a ni. Hmeichhe chi insiam kawnga harsatna thlentu common deuh deuhte chu – chibawm a chi insiam tam lutuk (Polycystic Ovaries) te, hormonal imbalance, chibawm bawk (cyst or tumour), ei leh in lam that lohna (anorexia kan tih mai, chaw ei châk hlawl lote hian a thlen duh hle), zu leh ruihtheih dang tih vang te, rih lutuk (obesity) emaw, rihna tlahniam nasa lutuk (excessive weight loss), thyroid gland lam that lohna te a ni. Chhul leh chi kawng lam fel lohna avanga naupai theih loh chhan common zualte chu – infection (TB hrik hian hmeichhe chikawng a tiping fo mai), chhul bawk, chhul chhung banga gland awm insawn (endometriosis) te, a hmaa chi kawnga naupai te an ni. Mipa lamah pawh hian zu leh/emaw ruihtheih dang tih nasat vang te, thau lutuk te, zunthlum neih vang te a ni thei bawk. Fel lohna i neih leh neih loh hre tur chuan investigation hrang hrang i tih a tul ang – infection i neih leh neih loh hriat nan Urine R/E, hormones lam fel lo i neih leh neih loh hriat nante thisen test (Hormonal analysis, Thyroid Function test leh Liver Function Test) te, Ultrasound hmangin chhul leh chibawm, chikawng leh chhul bul hnai (uterine adnexa) enchian te a tul ang a, chiangkuang zawka en theih duhthusam a ni dawn a; chuvangin, transvaginal ultrasonography (serh chhunga thun chi) pawh a tul thei bawk. Chhul chhung bang leh chikawng a pin leh pin loh emaw, ultrasound-a lang pha lo bawk hnawhtu a awm leh awm loh en nan Hysterosalpingography (HSG-X Ray) tih a tul mai thei bawk ang. I pasal hian blood test (LFT) leh sperm count and motility test (a baw exam) a ngai bawk ang. Engpawh nise, a chhan hriat tum phawt kha tih hmasak a ngai dawn a. Chuti chung chung chuan chhan hriat tur awm miah lova naupai thei lo an awm ve tho tih hriat a tha. I la naupang a, harsatna eng emaw tak in neih pawhin doctor-ten an enkawl dam theih ngei ka ring a, fa chu i pai a, i neih theih ngei beisei ang. Chhiartute hriat atana ka ngaih pawimawh chu fa neih chungchangah hian kan thu lo nasa mai tih hi a ni. Naupai pawhin a pai chhung thla kuaah hian harsatna thleng thei a tam em em a, fuke kima an lo piang ringawtte hi lawm ngawih ngawihna tur a ni a, Pathian ropuizia tilangtu a ni. Chuvang tak chuan fate hi nu leh pa tan kan hmuh theih ngeia Pathianin malsawmna min pek hlu ber an ni a, a enkawl kawngah i inthlahdah reng reng lo vang u.