Zawhna: Kapu, hmeichhia kum 23 ka ni a, ka taksa hmun hrang hrangah hian ringworm a tam em em a, a thakin a hrehawm thei em em a. Ka hmaiah te a awm a, chuan khawihli hi ka nei deuh reng a, doctor vawithum ka pan tawh a, damdawi ka ei chhung bak a reh ngailo a, engtia enkawl tur nge? Chhanna: Ringworm hi fungal infection ani a, a medical term chuan Pediculosis kan ti a, kap bawrah te, zakhnuai te leh nghawngah te a awm duh zual. Thawmhnaw ro chiang lo hak te hian a awm duh a, hmuar avang te in a awm duh hle bawk. Taksa natna dotu immune system function tha lovah a awm duh a, chutiang avang chuan HIV+ te hian an nei duh hle bawk. A dang leh ah chuan Zunthlum nei (Diabetes) te hian an nei duh viau bawk. Khawihli hi chu bacterial infection vanga awm ani thung a. A awm laklawh hian a reh mawh khawp a, antibiotic chak deuh hlek a inchiu te a ngai fo thin. Tin, khawihli chu a lo hnaiin a hnai kha a chhuah kim that loh chuan hmun dangah a insiam duh hle bawk. Chuvangin mahni a deh mai lo deuhin, surgical drainage (tihfai) a ngai thin a ni. Doctor i pan hian Skin doctor an ni kher em i sawi lo va. Skin Specialist (Dermatologist) lo inentir leh thei la, an puih theih che ka beisei. Chumi rual chuan test - Blood hemogram, Blood sugar leh HIV test te pawh chu lo ti thei la, i nat chhan hi a hriat theih ka beisei a ni. Zawhna: Mipa kum 22 mi ka ni a, ka ka chhung leh lei vel hi a pilh nasa thei lutuk a, hei hi engvang nge ni ang? Ha han nawh te hian ka ha hni te hi a thi hma em em bawk. Engtia enkawl chi nge niang? Chhanna: Ka chhung pilh hi ha hni fel lo leh ha rual rem lo vang te in a awm thei a. Ha hni thi i rawn sawi tel avang hian ha doctor chu lo inentir thei la. Chuan pum lam fel lo vang hian ka chhung pilh a awm fo bawk a, ei leh in fel lo (malnutrition emaw balanced diet ei mumal lo) vangin a awm thei bawk ani. Thenkhat chu Zinc tlakchham vangin a awm ve fo bawk a, multivitamin zinc content nei te kan chawh bawk thin. A chhan dang awm thei ani a, Dental Doctor i inentir hnuah Medicine Doctor lo inentir leh thei ta la, a chhan hriat hmasak phawt a enkawl chi a nih hmel.