Zawhna: Ka pu, hmeichhia kum 30 ka ni a, fa pahnih ka nei tawh a, a nau zawk hi tunah kum 4 a ni a, ka fa tê zawk thla 9 a nih hian chhang khâtna (copper T) ang hi ka dahtir ve a. Vawi khat chu ka in-checkup ve a, kan awmnain a zir loh avangin ka in-checkup leh tawh miah lo. Pathian zarah buaina ka nei ngai meuh tawh lo, ka in-check-up loh pawh khan. Mahse, thla chanve vel kal ta atang khan na em em awm si lo hian ka serh atangin bawlhlawh pawh ni chiah lo, tuihnang hi a ni deuh ber, thi ni si lo sen ve deuh hi a lo chhuak thin a, a rim a chhiain a inthlahrunawm thin khawp mai, thiante zingah. Hetianga ka awm hi ka chhang khâtna hman vang hi a ni thei ang em? Lo ni ta se ka lak chhuahtir dawn nge, engtia tih chi nge ni ang, damdawi eiin a tha mai thei ang em? Puan thui thin ka ni a, khawl ka khawih deuh hian a zual thinin ka hria. Khawngaihin min tanpui thei ang em? Chhanna: Copper T kan tih hi naupai laka invenna tura T shape hmanrua tereuhte hmeichhe chhul chhunga an dah thin a ni a. He hmanruaah hian Copper a awm bakah a then, a thar chi-ah phei chuan hormones an dah tel bawk a, hei hian mipa chi a lo dan bakah naute insiam tur a veng bawk a, enkawl hran a ngai lo va, damdawi ei chi Oral Contraceptive Pills (OCP) ai mahin an hman nasat a ni.   Chutih laiin chhul chhunga dah a nih bakah taksa bung zinga mi ni lo, Foreign Body a nih vang hian insawiselna eng emaw neuh neuh chu an nei ve thei (a him viau chungin). Heng insawiselna an neih tam zawk pawh hi reilote hnuah chuan a reh ve leh mai bawk. A that dan an sawi chuan a hlawhchhamna hi za zelah pakhat (1%) aiin a tlem mah a ni. Lak chhuah hnuah hian nau an pai leh thei mai bawk.   Chutiang a nih rual chuan hmanrua reng reng chu sawisel bo a awm tak tak lo va, mihring an inan loh vangin a thenah engmah insawiselna nei lo an awm thei a, ngeih miah lo pawh an awm ve leh thei tho. Chhul lam fel lohna nei miah lo pawh ngeih lo a awm theih tho a ni. A him ang reng em avang hian hman pawh a hlawh reng bawk a, naupai venna an hman common ber pawl a ni.   Copper-T hi a in-fit dik chuan chhul chhung bang si chatin inrem fel takin a awm a, a nem bakah a awmna hmun a zir hian a in adjust theih avangin chhul kawi emaw thlep hretah pawh a insiam rem mai zel. Chutih laiin chhul inthlep te, thi neih mumal lo sa ah te chuan harsatna a siam ve thei a, a rawn tawlh thla thei bawk. Side effect a nei ve thei tih kan sawi a, chung zingah chuan thi chhuak tam vanga Hb hniam te, hnungzang emaw kawngbawr na emaw kham te, thi neih hunbi inkara a hun lova thi neih te, tai na leh ek chhuak emaw zun chhuak anga inhriat tlatna te, zun chhuak sek te, sex hman laia serh chhung na/nuam lo te, thi neih tam zual ta lutuk te leh, i rawn insawiselna serh bawlhhlawh chhuak tam ang te hi a awm thei ani.   I insawiselnaah hian bawlhhlawh/tuihnang chhuak hi a rim a chhia tih i sawi a, chuvangin eng infection emaw tak a awm a ni thei. Zun test leh serh tuihnang hrik totir (vaginal swab culture and sensitivity) te tih a tul hmel. Ultrasound hmangin chhul, chi bawm leh chhul bul vel te endik a tha hle bawk. Zunkawng hrik tihbuai (UTI) te hian serh lam a tibuai ve thei a, bakah eng emaw vangin chhul infection te pawh a awm thei bawk a, chuvang chuan enchiantir hmasak chu a tha hle mai. Tuna i dinhmunah in-check-up i harsat a nih chuan antibiotic ei ta la (Ornidazole + Ofloxacin inpawlh – O2 emaw Ornof te, Cefixime leh Ornidazole inpawlh – Ornicef ang te…. ni tin mum 1 vawi hnih in ni 7 tal), chubakah chuan thisen chakna (Hematinic) Dexorange ang te hi ni tin vawi 2 in (chhin 2) lo in ta bawk la, na i neih chuan na chhawkna eng emaw ber lo ei tel bawk la, i ziaawm theih ka beisei. Thenkhatah chuan serh a hnawh chi antibiotic/antifungal te pawh kan chawh tel bawk thin. I remchan thei chuan doctor lo inentir leh kha a tha ber ang.