Zawhna: Ka pu, nula kum 25 mi ka nia, tun hma (kum 5 kalta) khan Tiranga hi ka ei thin a, tunah chuan ka ei ngai tawh lo hrim hrim. Mahse, tunlai hi ka pum a na thut thut thin a, a chang leh ka luak a; mahse chutiang chuan ka awm reng ngai lo, chhuah hun bik a nei thin. A na achhuah chuan a na thei khawp mai; mahse, a na rei lo thung. Kum 5 kal taa ka Tiranga ei vang kha a ni thei ang em?? Pumpui Ulcer a ni lo an ti bawk si a. Khawngaih takin min pui theih chuan ka lawm em em ang. Chhanna: Tiranga, Shikhar tih ang reng chi hi Gutka tiin an sawi bawk a, heng thilho hi mi thiamte sawi dan chuan a hlauhawm khawp mai a, chemical chi hrang hrang 4000 chuang inpawlh niin chung zinga 40 dawn lai chu cancer thlen thei niin an sawi hial. Ngawlvei theih thil zinga mi a ni a, mi tiphur leh hahdam thei anga ngaih a ni. Kan ramah pawh hian kan uar phian mai a, kuhva leh meizial hlang ai mah hian a hlauhawm hial niin an sawi bawk. Hetiang lam chi reng reng hian pumpui bang a tiro duh a, pumpui a tuihnang insiam a ti buai a, pumpui lawng (gastritis) leh pan (ulcer) bakah, a rei phei chuan cancer te pawh a thlen fo thei ani. A ei chi reng reng hian an ei ngawrh duh viau mai bawk a, chutiang avang chuan an nghei hian kuhva ei nasain an nghei thut a kawthalo an nei duh ang tho hian an nei ve fo mai bawk. Riltam laia ei hian pumpui a shock dan a nasa zual a, zan rei riltam laia ei te, zing thawh hlim a ei te hian pumpui tan a tha lo lehzual hle. Pumpui (stomach) hi kan Pathian hian a lo siam tlo khawp mai a, chuti chung chung chuan kan sawisa nasa tlauh tlauh em thin a, a zo ngang lo thin a ni. Tiranga pawh chu i khawih ve thin lai chuan i ti ve nasa viau turah kan ngai ngawt a. Chu chuan i pumpui tilawngin pan siam kher lo mah se a chet vel pawh a tibuai ngeiin a rinawm. Pumpui lawng hian acid insiam dante a tibuai a, chu mai bakah chuan chaw dawt (esophagus) lamah hian a irh let ta thin a, chu chuan chaw dawt a tilawng tel a (esophagitis), awm thip emaw nuam lo te, irh thur te, chaw lem harsa te, luak chhuak te a siam duh khawp mai (Acid Reflux Disease emaw Gastro-Esophageal Reflux Disease-GERD tiin an sawi thin). I insawisel dan hi ni tin a awm a ni lo i ti a; chuvangin, pumpui lawng mai lo deuh te pawh a ni thei ang. Duhthusamah chuan endoscopy lo tihtir thei la, chu bakah chuan ultrasound hmangin i thin (liver) leh mit (gallbladder) te lo entir la, mit-ah lungte awm vangin pum na thut thut hi a awm thei a, luak chhuak te, hnungzang na/nuam lo te a siam tel thei bawk a. A chhan hriat phawt kha a pawimawh lai chu a ni. Damdawi han chawh mai che ai chuan investigation ka rawn sawi ang te hi lo ti hmasa thei la chu a tha khawp mai. I remchang lo a ni palh thei a, chuvang chuan pumpui acid control-tu damdawi Proton Pump Inhibitors (PPI) kan tih mai, Omeprazole, pantoprazole, esomeprazole, rabeprazole angte hi kan hman nasat pawl chu ani a. GERD nei te ah hi chuan Domperidone telna (Omez-D, Pantop-DSR etc te, SR tih hian Sustained Release tihna a ni a) angte hi an hmang mah thung. Domperidone hi Prokinetic Drug chi khat ani a, pumpui chet dan ti mumal tu ani ber a, chu chuan acid irh let tur kha a veng thin a ni. Hetiang damdawi hi zan mut dawnah emaw zing thawh hlim kaw ruah laiin kan ei tir tlangpui. Heng damdawite hi lo ei ta la, ni 10 vel emaw i ei hnua a la ziaawm loh chuan investigation tih ngei chu a tul ang. PPI damdawi kan han tarlan takte hi a him viau chungin ei rei lutuk chuan ei loh veleh harsatna a rawn lang leh thei a, thla khat te emaw chu regular a ei a pawi lo thei ang. Chutih rualin hunbi mumal taka ei erawh a pawimawh viau. Hmeichhia i nih angin i thi neih lamah insawiselna te i neih tel leh tel loh i sawi lang lem lo va, i ek lamah buai a awm leh awm lohte pawh hriat tel theih nise a tha viau.