Dr Ka Zawhna

Doctor ka Zawhna (August 31, 2014)

Dr. Chawnglungmuana - Aug 30, 2014

Doctor ka Zawhna (August 31, 2014)

Zawhna: Ka pu, tunhma kha chuan doctor kan in entir hian uluk taka min en hnuah damdawi min chawh mai thin kha ani a, tunhnai chho ah hian eng eng investigation emaw hi min chawh tel duah ta zel mai a. Heng te hi a then chu a to theiin a hautak duh viau mai a, a tul kher emni? Heng investigation tel lo hian min en thiam ta lo tihna emni ang? Chhanna: I zawhna hi zawh awm tak a ni a, i sawi ang hian tun hnai chho hian investigation tel lo chuan doctor te hian damlo damdawi chawh emaw enkawlna pek hi kan ti tlem ta hle mai. Amaherawchu a chhan fel tak a awm a, sawi chian ka han tum ang e. Khawvel thiamna thang zelah hian natna hriat chhuah theihna hmanrua leh khawl te a lo changkang tial tial a, tunhmaa awm ngai lo emaw awm tawh te pawh upgrade zel a ni bawk a. Heng hmanrua leh khawl te hi Medical Science hmasawnna lian tak tak a ni. Tunhma lam kha chuan kan ram bik phei chu kan la rethei a, heng hmanrua neih kawngah pawh hian kan la chau hle. Chuvangin doctor te chuan clinical examination hmangin damlo an en a, enkawlna an pe thin a ni. Tih fuh chang tam tak an nei anga, tih fuh loh pawh a awm fo thei awm e. Tunah erawh chuan khawl leh hmanrua hmanga enna kan hman tam takah hi chuan tihsual a tlem ta khawp a ni. Entirna han pe ta ila. Pumpui lawng/ulcer leh mit a lung awm (gallstone disease) te hi a lan chhuah dan a inang khawp mai a. Thinhnun zawn emaw nakruh dinglam hnuai zawn na te, hnungzang na te a siam a, luak chhuak leh ra so te pawh a thlen thei ve ve a ni. Gallstone disease hi ultrasound khawl hmang lo chuan a hriat theih loh a, chutiang bawkin pumpui lawng/ulcer/cancer te pawh hi endoscopy hmang lo chuan a hriat mai theih loh bawk. Khawsik chhan hi a tam thei awm e. A common zualah chuan Malaria, Typhoid Fever, Zun kawng infection (UTI) leh chuap lam infection (Bronchitis/Pneumonia) etc te hi an ni ang. Chutiang chu damlo an insawisel dan atanga rin hriat theih tam tak a awm anga. Mahse thisen test, zun test leh X-Ray te kan tih tir hian a chhan tak kha kan hre hma a, a damdawi chawh tur dik tak kan chawh thei thin a ni. Khawl a changkang chho zel a, thluak lam fel lo te, hnungzang ruh leh thazam fel lo te, pum chhunga natna hriat har tam tak hi CT Scan hmang te, MRI Scan hmang te in a lo hriat theih ta a. Heng ang khawl te hi kan ramah a lo awm ve ta zel bawk a. A tih man to deuh mah se a tangkai em em a, natna khirh, a bikin Cancer zai ngai te-ah phei chuan Surgeon tan a tangkai em em a, zai theih a nih leh nih loh te, eng chin nge a zai theih tih te an lo hriat phah thei a ni. Kan tarlan tak investigation hrang hrang te hi an tangkai rual rualin a hmangtu leh a result lo entute thiamnaah a innghat thui em em a. Fimkhur pawh a ngai reng a ni. Doctor te kan in ang lo va, kan zir chhuahna institute-a an tih dan phung pawh a inang kher lovang. A then chuan investigation lam an uar thei a, a then erawh a tul chin chauh nia an hriat tih tir mai thinte pawh an awm bawk ang. Engpawh nise, investigation kan tih tir hian a hautak dan kan hrethiam a, a tul lo chu kan tih tir ngai mang lo ani tih hi hriat tel a tha hle. Chutih rualin damlo te pawhin doctor kan inentir a, investigation min lo chawh hian eng atana min chawh nge tih te hi zawh nachang hria ila, uluk taka min hrilhfiah hi doctor te pawhin an bat let ve ani tih te pawh sawi tel ta ila a tha awm e.
Share now