Zawhna: Nu kum 46 ka ni a, 2007 khan ka hrawk leh nghawng nat vangin a sir leh hma zawngin min xray a, 2013 khan nghawng nat vang bawkin vawi 2 min xray leh a, a \ha vek a. X-Ray hian cancer a thlen thei an ti bawk si a, ENT te pawh ka pan a, nghawngruh chuktuah na min ti a, damdawi ka ei nasa tawh a, a dam thei lo, a kham lai hi a sa vut vut \hin. Xray vang em ni ang? Eng damdawi nge ka ei ang? Khawngahin engtin nge ka inenkawl ang? Chhanna: X-Ray hi radiation ani nachungin tisa ti chhe khawp emaw cancer thlen tur khawpa tam ani ngai lem lo va, nu naupai laiah erawh fimkhur a ngai viau. Chuvangin naupai laiah hi chuan a \ul tawp anih loh chuan kan chawh ngai lo. Naupang \hang chho laiah hian X-Ray hi fimkhur hret a ngai bawk. X-Ray ai mah chuan CT Scan hian radiation a pe tam zawk a, chuvangin CT Scan pawh hi doctor te chuan a nazawngin kan chawh hran lo. I nghawng an X-Ray chhan chu nghawngruh (Cervical Spine) lamah fel lo a awm leh awm loh te, nghawnga ti leh organs pawimawh awm te lamah fel lo a awm em tih en nan te a ni ber ang. I X-Ray a normal vang hian nghawngruh emaw nerve lam fel lo a awm lo e a tih ngawt theih loh a, CT Scan hi i mamawh a rinawm viau; a nih loh pawhin MRI Scanning tal. Engpawhnise, ENT doctor i pan a, i nghawng leh hrawk lamah fel lohna an hmu lo anih hmel a; chuvangin, Ortho Doctor inentir leh la a \ha viau mai. Sawi tak angin nghawngruh chuktuah fel lo anih chuan Physiotherapy lam enkawlna i mamawh a rinawm viau mai. Cervical Spondylosis kan ti mai a, chutiang natna i nei te a lo nih chuan damdawi ei ringawtin a chhawk hlei thei lo va, CT Scan emaw MRI hmang hian chiang zawkin i nghawng ruh chu enchian a \ul hmel. A \hen phei chu zaite pawh an mamawh ve fo. Nachhawkna lam chi i ei nualin a rinawm a, i pum lam pawh a tilawng hman mai thei bawk. A chhan hriat hmasak loh chuan damdawi han inchawh mai a ngam awm loh a, i pum ven nan Pantoprazole lam chi damdawi regular takin lo ei phawt mai la. Chu bakah chuan lukham sang lutuk te, mutna mattress rualrem \ha lo te hi a haw hle a, dup lutuk te pawh a hua a, chu chu i lo hre dawn nia. Cervical Spondylosis hi kum tam lamin an nei duh zual a, chutih rualin hnathawh kaihhnawih vangin kum naupang lam pawhin an nei fo bawk. Rit chawi nasat ngai hna te hi nghawngin a ngeih lo hle a, hei bakah hian TV en nasa leh duhdah taka sofa-a \hut chin te hi a ngeih lo viau bawk. Nghawng a nerve kal te a nek tel \hin avangin kut leh ban tha zaw te pawh an nei tel fo a, kuthmawr chawmawlh te pawh an nei \hin. A \henah chuan lu na pawh a siam thei a, lu hai chuai chuai ang te pawhin an awm fo bawk. Office a \hutna chair dik lo vang te hian a awm duh viau mai a, chuvangin chair hman uluk a \ha hle.