Zawhna: Kum 33 mi ka ni a, fa pahnih ka nei tawh. Ka fa pahnihna ka pai lai atangin ka ke dinglam ah hian varicose vein ka nei a, khel na ka nei bawk a. Ka nau neih hnuah pawh khel na chu a la reh tak tak lo. A chang leh a zawi ang deuh te hian a awm a, ka ke hnuai te a hit leh chum chum thin. Mut leh thut mai mai ten ka khel ding lam hi na ngut ngut thin. Tin, ka period hian ni 2 na vel atangin ka tai leh kawng a na thei lutuk a, a sa vung vung a, nachhawkna ei lo chuan awm ngaihna a awm lo. Gynae doctor ka pan a, damdawi te min chawh a, engmah a ni thei si lo, engtia enkawl chi nge?

Chhanna: Varicose Vein kan tih hi vein pawnlang taka rawn puar tihna ani a. A bikin ke leh chawn ah te a awm duh hle. A awm chhan hi a tlangpuiin din laia vein pressure a san vang ani. Vein pawnlang ho ah hian thisen a let zawnga a luan loh nan valve a awm a, chu valve chu a lo thawk tha tawh lo anih chuan thisen let khan pressure a ti sang a, a rawn puar ta thin a ni. Hlauhawm chu a ni lova, mahse na a siam thei a, a mawi lova, ke vung leh vun phuhlip te a siam thei bawk a ni. Hmeichhia in an nei duh zual a, a bik takin naupai lai te, thau lutuk ah te, thi hul hnuah te an nei duh viau. Naupai vanga khel na, kawng na nei hi an awm fo bawk a, naupai fuh loh vanga awm ani duh viau. Tin, naupai lai a len tawh hnua rit chawi fo te hian kawng leh khel na a siam duh hle. Leg exercise lak that te hian heng harsatna lakah hian a veng thei ani. Nau neih hnua khel na i sawi leh ke hnuai hit chum chum i han tih ang hi nerve lam fel lo, a bikin kawngruh lam fel lo atanga insiam anih duh hmel viau (nerve compression). Period laia tai leh kawng na i rawn sawi tel avang hian i chhul emaw chi bawm/kawng engemaw laiah fel lo a awm ani thei a, a chhan hre turin ultrasound tih tir la a tha hle. Kawngruh x-ray te pawh a tul in a rinawm. I chhul leh chi bawm/chi kawng (reproductive organs) lam fel lo anih chuan gyne doctor bawk chu i in entir leh a ngai anga. Kawngruh lam fel lo anih erawh chuan Orthopedic Doctor i inentir a tha ang. Zun kawng lam fel lo ani thei bawk a, i zun te pawh test tir a tha anga, Surgeon enkawl chi ani thung. A chhan a zira enkawlna i dawn loh a, nachhawkna i ei sek chuan i pum lamin a tuar anga, pumpui lawng leh ulcer lam i nei thuai bawk ang. Chuvangin, investigation lam kan tarlan te hi lo tih tir thuai la, a chhan hriat chhuah vat i lo tum dawn nia.