Zawhna: Ka pu, kum 18 mi ka ni a, ka serh bulah hian bawl te reuh tete a hlawmin a awm a, durh hi a ang ka tia; mahse, a ni si lo, a tam lo, panga vel a ni ang. A changin a thak a; mahse, a thak reng lo. Engnge a chhan ni ang? A damdawite a awm em le? Chuan ka taksa hrim hrimah hian Vual tun hnai deuh khan a rawn awm a, a reh thei lo a vual lai hi a inthak chhawk a ni deuh ber mai. A changin ka nghawngte a thak a, khawngaih takin min pui hram teh. Chhanna: Serh bawr hi thlan a insiam hma a, enkawl fai leh uluk a ngai viau mai. Chutih rualin a vun a pan avangin tihpem pawh a awl viau mai. A bawr a awm niin i sawi a, a thak zeuh zeuh tih i sawi bawk a, hmun dangah a awm belh lo a nih hmel. A chhan ni thei awm zingah sex hman atanga inkai theih natna avanga awm a ni thei a; chuvangin, doctor en chiantir chu a tha viau. Sex i la hmang lo anih chuan arngeng te pawh ani thei bawk. Chu bakah chuan kapthak hi fungal infection engemaw ber vang a ni duh viau a, kekawrte ro tha lo hak avanga lo awm te ani thei bawk. Vual i neih thin hi thil huat (allergy) engemaw ber vangin a awm anih duh hmel viau mai. Rulhut pai avangin vual hi a awm fo mai a; chuvangin, rulhut damdawite pawh lo ei ve hrim hrim phawt mai la, a bakah chuan skin allergy test te pawh tih a tha viau mai. Kan sawi tak sex atanga natna kai theih Syphilis i neih leh neih loh hi hriat a tha a; chuvangin, Laboratory-ah VDRL test lo ti thei la. Chuan, i kap bawl nen chuan Skin Doctor rawn bawk la, a taka entir ngeiin damdawi chawh ni thei se a tha berin a rinawm.   Zawhna: Ka pu, ka mit hi a thak nasa thei lutuk a, eng nge a chhan ni thei ang? Chuan ka hnar chhungah hian arngeng a awm reng a, a na thei bawk sia, ka hnar a za a, ka hahchhiau reng zel a, hritlang ang rengin ka awm thin. Khawngaihin a chhan min hrilh thei em? Chhanna: Mit thak te, hnar za te i sawi hi thil huat (allergy) eng emaw vang ani fo mai a. Chutih rualin mit thak hi mit hman rim vang te, infection (conjunctivitis) vang te pawhin a awm thei bawk. Hnar chhung arngeng awm fo, hahchhiau leh hritlang angte i neih fo avang hian i sinus lamah infection a awm te pawh a ni thei bawk. ENT Doctor lo inentir thei la, i hnar chhung te, i hrawk te leh i beng te thlengin check chiang thei se, a chhan ni thei awm ang chu an hrilh theih che ka beisei.   Zawhna: Ka pu, ka zak hi a pahnihin a lo duk ringawt a, tun hnai lawk atang khan ani a, ka ngaih a tha tawh lo, a duk hi a pung zel si. Chuan, ka hnungzang hi a sa thei lutuk a, ka ke pawh chuti tho. Engnge a chhan ni ang? Khawngaih takin ka zawhna min chhansak thuai turin ka ngen a che. Chhanna: Zak (armpit) hi powder hman nasat vang te hian a duk duh khawp mai a. Tin, vun pan lai a nih vang leh hmul to tamna a nih vang hian fungal infection te pawh a awm duh phian. A thak leh thak loh i sawi hran lo va, a duk lai a darh zau zel a nih chuan Skin Doctor entir chu a tha hle mai. Chuan, hnungzang leh ke sa i neih hi nerve lam fel lo emaw, hmeichhiaah chuan thyroid lam dik lo te; tin, pumpui lawng emaw pan (Gastritis or ulcer) vang te ani thei bawk ang. I kum zat, mipa nge hmeichhia, nupui pasal nei nge nei lo tih te rawn ziak lang tel thei la chuan a chhan ni thei awm chiang zawka sawi theih anih ka ring.