Kum tharah Sorkar thar – Kan hriselna ngai pawimawh thei se!Kum tharah Sorkar thar – Kan hriselna ngai pawimawh thei se! Chhiartu zawng zawngte, kum thar chibai ka buk vek a che u. Kan ramin inthlanpui kan hmachhawn hnuah sorkar thar kan nei ta a, hmachhawp tam tak an nei a, chumi tih hlawhtlin kawngah chuan mipuite’n mawh kan phur lian em em a ni tih kan hriat a pawimawh hle mai. Kan ram hruaitute fuih a, tawngtaisak a, an tih dik loh theihna laiah venpui a, an tih that leh fak an phu na laiah tlawn rilru tel lova kan fak thiam a pawimawh hle. Kan ram hian hmasawn a phu a, chumi tur chuan theihtawp i chhuah theuh ang u kan ti hmasa a ni e. Medical doctor ka nih avang hian mipuite hriselna hi ka ngaih pawimawh em em reng a ni a, ka zin leh veivah na lamah te hian eng ang kawngin nge hriselna lama hma kan sawn theih dan tur te ka phak ang tawkin ka ngaihtuah nasa ve thin hle. Thingtlang atanga khawpui a inentir leh inenkawl hautakzia te, chumi hriat avanga damlo tam takin khawpui an pan ngam loh dan te, natna thenkhat enkawl hma chuan dam mai thei; mahse, tlai vanga enkawl dam hleih theih tak lohte ka hmu ve fo thin. Kan rama kan enkawl theih loh vanga phai pan ngai te phei chu mi tam tak lu tihaitu a ni fo thin. |awng thiam loh te, inenkawl dan phung hriatthiam loh vang te, awmna leh ei leh in, zinna senso tam tak te avanga rilru hah ka tawng ve fo mai bawk. Rilru a ti hrehawm duh viau mai. India ram hi medical science thiamna lamah hma kan sawn nasa hle mai a, inenkawl man a tlawm zawk avangin foreign ram changkang zawk atanga pantute pawh an thahnem hle a, medical tourism ti zawnga an sawi mai lamah hian India ram hi a thang nasa hle a ni. Chutiang bawk chuan kan ram ngeiah pawh medical science thiamna lamah hma kan sawn nasa khawp mai a, tun hmaa kan tih theih loh vanga phai kan panpui natna tam tak hi kan ram ngeiah kan doctor thiam tak tak ten an enkawl dam thei tawh a. Tunah phei chuan Medical College MIMER kan lo nei ve ta hial a, damlo enkawl kawngah pawh hma kan sawn zual hle ka beisei a ni. Medical Science hi thang reng a ni a, damlo enkawltu doctor te pawh kan in-update reng a tul a. Chutiang avang chuan Mizorama medical doctor zawng zawng (deuhthaw) awmna Indian Medical Association (IMA), Mizoram State Branch pawh hian medical science lama kan hmasawn theih nan seminar leh workshop te kan buatsaih fo thin a, Hospital lian ho pawhin chutiang chuan zirhona an buatsaih fo bawk a ni. Private Hospital a rawn thang chho te hi a lawmawm khawp mai a, Mizorama damdawiin khum awm zawng zawng chanve aia tam mah hi Private Sector a awm a ni lehnghal a, an than zel hi a pawimawh hle. Damlo inenkawlna atan kan ramah Health Care Scheme tha tak kan nei a, BPL chhungkaw tan RSBY a awm thin bawk a. HCS atan hian Premium tam lo tak pekin chhungkaw damloh inenkawlna senso tam tak a phuhruk thei a, RSBY te phei chu chhungkaw khawsak harsa te tan a tangkai em em a ni. Chuti chung chung chuan a kalphung fel tawk loh vangte pawh a ni ang a, sorkarin Private Hospital-ah leiba a neih phah nasa a, damlo tan harsatna a thlen fo thin a ni. India sorkar laipuiin tunah hian scheme thar Ayushman Bharat-Pradhan Mantri Jan Arogya Yojana (AB-PMJAY) chu a rawn ti thar ta a. He scheme hi nuai 5 thleng bill theihna tur anga a vawrh lar avangin mipui tan a itawm hle mai. Kan ramah pawh kan han ti tan chho dawn a, a hmaa Health Care Scheme leh RSBY te kha he scheme-ah hian chhung lut vekin a tharin registration tih a lo ngai ta a. Mahse, bill tur chuan a kawng a thui ta phian mai a, tih tur tul a lo tam ta bawk nen, a mamawhtu mipuite tan a buaithlak tan ta hle. A chipchiarin hre lo mah ila, mipui nawlpuite ban phak, health insurance tha hi kan ram hian kan mamawh hle mai a, tuna AB-PMJAY te pawh hi lang itawm viau mah se a kalphungah buaithlakna lai a tam thei dawn nia a lan avang hian kan sorkar hian a hmaa kan Health Care Scheme hman than sa kha tidanglam zawk ta sela, mi zawng zawngin kan hman theih nan promote kawngah pawh chak sela, premium pek turah pawh category siam tam se, sum a luh that chuan a chhawrtu tur chu mipui tho kan ni a, mi harsa te tan a hlu hlei hlei dawn a ni. Keimah ngei pawhin ka lo tawn fo tawh a nih vangin in-register nachang hre lo, mamawh huna in-register chawp leh chuk chuk tum an awm fo bawk. Private Hospital tel lo hian kan awm thei lo tih an Bed Ratio atang hian a chiang reng a; mahse, a ba ngawta an inenkawl theih bik loh avangin chutiang chinfel hma dante chu sorkar hian ngaihtuah se, Private Hospital lam tan pawh a hun thlap thlapa an sum hmuh tur an hmuh theih chuan damlo tana awlsam chu an duh ngei ngei ang tih a rinawm. A thlawna enkawl, leiba an ngaihdamsakte pawh an ngah reng a ni. Heng ka han ziahte hi ka mi mal ngaihdan bakah mi dang ka biakrawn atangtea ka rawn ziah a ni a. Ka ngaih pawimawh ber chu a chhawrtu tur mipuite an ni a. Damloh inenkawlna kawnga neihin a tlin loh vanga tawrhna hi ka hmu ve ta fo a, a tuartu tan a hrehawm em a, a solution hi kan sorkar hian ngaihtuah rang thei se ka tih vangin ka han ziak ve a ni. Mipuite pawhin khawvel thil (material) lama intlansiak vak vak lo hian kan sum thawh chhuah ang ang te kan damloh mamawh huna inenkawl nan khawlte ching uar ila, sorkar ruahmanna siamte hi a theih ang angin tawiawm ila, mi thiam zawk te pawhin rawtna tha zawk siam nachang hria ila tiin thahnemngaih thu hlaah inthlahrung ang reng tak siin ka han ziak ve a ni e. Kum tharah hian kan hriselna i ngai pawimawh zual sauh sauh ang u.