Zawhna: Ka pu, kum 25 mi ka ni a. Vawihnih nau ka chhiat tawh a, ka chhul min ziah sak ve ve a. Doctor in thla 2 indang turin min ti a, thla 5 ka indang tawh a, pai leh tawh ila chhul tan leh keima tan a la pawi thei em? Tin, rai ta ila, rai tih inhre lo a indan na ei reng hi a pawi thei em? Chhanna: I kum ngaihtuah chuan nau la pai thei tur chu i ni ngei mai a. I nau chhiat (abortion) te chu a engtik thla ah nge i chhiat i sawi lang lova. Medical history hi damlo enkawl kawngah a pawimawh khawp mai a, zawhna kan nei anih pawhin chipchiar thei ang berin mahni insawiselna chungchang hi rawn zawt thin ula, thurawn pawh kan inpe tha thei zawk ngei ang. Nau i chhiat chhan hi hriat a pawimawh khawp mai a. Naupai hun chhung hi tla thum bi zelin then hran a ni a, 1st, 2nd leh 3rd Trimester tiin kan sawi thin. 1st trimester za a sawmsarih (70%) chuang dawn hi Chromosomal Anomalies vangin a awm thin a. Chumi awmzia chu chi inmil lo tite pawhin kan sawi thin a, mipa leh hmeichhe chi inmil fuh lo vanga awm thin a ni ber. 2nd Trimester abortion-ah pawh hian 20% lai mai chu chromosomal anomalies vang hian a awm bawk a ni. Nau chu a rawn insiam ngei a, mahse fel lo engemaw vangin a rawn puitling thei lo va, nu lama fel lohna awm hran si lovin a rawn chhiat ta mai thin a ni. A dang lehah chuan infection - hrik engemaw berin chhul leh chi kawng, chi bawm te a khawih buai hian nau chhiat a awm duh bawk. TB hi a chhan common tak zinga mi a ni a, chu bakah chuan sex hman atanga inkai theih natna te hian a thlen fo bawk. A then chuan chi kawng ping te a siam a, chhul chhung bang insiam fel thei lo te, chi bawm vung avanga chi chhuak tha thei lo te a thlen fo bawk. Nuin natna eng emaw a neih vangin nau chhiat a awm fo bawk. Chung zingah chuan zunthlum (diabetes), thyroid fel lo, hmeichhe hormones lam fel lohna te, immune disease an tih mai (SLE ang te hi), nu chhul dik lo engemaw vang te in nau chhiat hi a awm thei bawk. A thenah chuan naupai invenna Oral Contraceptive Pills (OCP) ei nasat vang te in a awm ve thei bawk. Nau vawi 2/3 lo chhiat tawh te hi an chhiat nawn duh lehzual a, nang pawhin vawi 2 lai i chhiat tawh avang hian i fimkhur deuh chu a ngai dawn a ni. A pawimawh hmasaah chuan i dinhmun hriat chian hi a ni. Chhul leh chi bawm, chi kawng lamte a fel leh fel loh hriat nan Ultrasound lo ti thei la, chuan blood sugar leh thyroid function test ti tel thei bawk la. Nau i pai leh theih mai chu a rinawm a, amaherawhchu i chhiat leh na chance hi a sang ang reng viau mai. I kum erawh a la naupan avangin pangngai takin i la nei leh thei turah ngai ang. I hriat loh a nau i lo pai anih a, invenna i ei reng bawk chuan a fel lo thei a, Preg test leh Ultrasound lo ti ngei thei la a tha khawp ang. Hmeichhe doctor i lo inentir leh dawn nia.