Zawhna: Kum 18 mi chauh ka la ni a, ka ke veilam hi a za/kham deuh hian a awm thin a, a mak ka ti khawp mai, kawng chho vel kalte hian a na thei lutuk a, a mur chum chum thin bawk a, a chang chuan a mur nasa lutuk hi ka ding tha thei lo thin bawk a, ka tha lam chak lo nge ni ang? Tichuan kawngna hi kum naupang te ni si hian ka nei ve bawk a, ka period lai phei hi chuan a nasa thei khawp mai, ka period loh pawn a na tho a, inthiar tura thut rei pawh ka thei lova, a hreawm kher mai, naupangte ni siin hetiang harsatna hi ka nei a,a awm hlen thei em? Kawngna hi a awm reng thei em ni? Ka pu khawngaih takin min pui teh. Chhanna: I zawhna hi thil chi hnih thum inkawp ani a, a inkaihhnawih theihna lai a awm a, a chhan a hrang thei bawk ang. Ke kham i neih hi veilam chauh i rawn sawi a, a lehlam a kham ve ngai lo ni angah ngai ta ila. Kawngna i rawn sawi tel bawk avang hian hnungzang ruh kawng zawn lai engemaw fel lo vang te a ni thei. Sciatica chungchang hi kan rawn ziak tawhin ka hria a. Kawngruh inkara thazam rawn chhuak Sciatic Nerve nek tawm (compression) vanga awm thin a ni. A hriatna awl tak pakhat chu mu chungin khup char chungin ke na thin lam hi khai kanin a na thin ani. Sciatica ah hian nerve kalkawng zawh zawngin na a insiam a, ke kham ut ut te a thlen a, mawngtam te pawh a na thei bawk. Sciatica hi ani lo thei bawk a. Ke kham na khawp ang chi i neih vang hian calcium lam tlakchham vang te pawhin a awm thei a ni. Mur chum chum i sawi avang hian nerve lam fel lo vanga awm anih duh hmel viau. I kawngna hi i thi neih hun laiin a zual thin niin i sawi a. Chhul (uterus) awm dan fel lo, inthlep emaw te, bawk avanga thi chhuak tha thei lo te, chhul hmawr zim vang te pawhin kawngna hi a insiam fo thei a. Chu bakah chuan chi kawng leh emaw chi bawm lam fel lo vang te pawhin thi neih buai leh kawngna hi a awm thei bawk a ni. I kum a la naupan vang hian i kawng nat chhan hi hriat phawt a tha hle mai. Chumi atan chuan Lumbo-Sacral Spine X-Ray te leh, Ultrasound Pelvis te lo ti thei la. Chutiangah chuan fel lo a awm anih chuan Ortho lam emaw Gyne lam doctor te rawn ta la, a tha ang. Awm hlen tur chu ani hran lo, chu bakah kawngna hi a chhan azira enkawl a nih loh chuan a awm reng thei bawk.