Zawhna: Hmeichhia kum 16 mi ka ni a, ka taksa ah hian hmul hi a tam em em a, thiante zingah ka zah avangin ka ziat a, hmul tak a rawn to ta a, ka mangang lutuk a, tumah ka hrilh ngam bawk si lo a, a tih tlakna damdawi a awm em? Chhanna: Hmeichhe tan chuan hmul neih ngah hi malsawmna hrehawm tak a nih hmel. Mipa pawh hi hmul ngah lutuk chuan a ninawm lamah a kal thei a nih hmel, internet lamah hian ka hmu leh zauh thin. Engpawh nise, engvanga hmul ngah nge i nih? tih leh enkawl theih chi a ni em tih hi ngaihtuahpui i ngai tihna a ni a. I rilru a hrehawm viau tih a lang a, thian kawm kawngah pawh inkiltawihna i neih phah nasa ngei ang a, rilru lam thleng pawhin Depression harsatna te pawh a siam thei hial chein a rinawm. A hmasa bera i hriat tura ka duh chu nangmah ang hi tam tak an awm tih hi a ni. Hmul ngah hi a chhan hrang hrang a awm thei a, a chhan hriat loh hi a common ber te zinga mi a ni. Chhungkaw inthlah chhawn thil a ni duh viau mai a, chutiang a nih chuan han tih vak ngaihna a awm hran lo va, damdawi inchawh tur hranpa pawh a awm lem lo va, a tul anga hmul ziah kha a tih theih awm chhun chu a ni ber. Hmul ziahna hman a tul a nih pawhin company tha siam tal hi hmang thei la. A dang lehah chuan hmeichhe lam fel lohna, reproductive hormones buai vangin a awm duh leh bawk. Hetiangah hian natna chi khat, kan rawn tarlan fo tawh, Polycystic Ovarian Disease (PCOD) hi a chhan common tak a ni a. Chibawmah chi insiam fel lo tam tak a awm avangin mipa hormones a insiam nasa a, hmeichhe hormones nen a in-balance bawk si loh vangin hmul to nasa a rawn thlen thin a ni. He natna hi hre tur chuan Ultrasound tihte pawh a tul ngei ang. Damdawi hmanga enkawl theih a ni. A dang lehah chuan Hirsutism an tih mai, mipa hormones hmeichhia a insiam nasa hrim hrim a awm thei a, a nasat phei chuan hmeichhe serh hi mipa serh ang mai hian a rawn danglam thei a ni. Cushing's Syndrome tih natna a awm leh a, kan taksaa gland pakhat, Adrenal Gland fel lo vanga awm thei a ni. Steroid lam ei nasate hian an nei duh viau bawk. Engpawh nise, a chhan hre chiang tur hian doctor lo inentir hmasa phawt mai la. Hmeichhe doctor leh Medicine Specialist rawn a tul thei ang. A enkawl dan kawngah chuan hmul ziah hi a pawina a awm hran lo va, hmul pawh erawh chu a tha hran lo. Hmul to tur a stimulate thei a, chuvangin tih loh a tha. Skin treatment pek theihte a awm leh bawk a, Skin Doctor lo rawn thei la, an pui thei bawk ang che. Damdawi ei chi lamah chuan a him ber lo va; tin, damdawi an chawh thinte hi side effect buaithlak deuhte an neih tel avangin inchawh lo phawt mai ila, hemi atan hian Medicine Specialist te chu lo rawn la, a tha ang.