Drugs i nghei ta zel a. I fakawm e. Tan zui zel a ngai hle dawn a nia.&&&&DRUGS NGHEI ZUI ZEL DAN TUR (Part III) Mi dang tan i nun hmang rawh. Mahni hmasial thang, mahni nawmna dah pawimawh hmasa ber thin khan i nun i thlak a ngai. Mi tan inhmang la, mi nawmna ngaihtuah hmasa ve tawh la, mi tana hlawk turin i nun hmang ve tawh rawh. In chhungkaw tan tan hmasa ber la. Chumi piah lamah I luangchhuak zui zel dawn nia. Nun tangkai apiangin an nghei zui thei. Mahni hmasial, mahni nawmna dah hmasa, mi dang ngaihsakna reng reng nei lo nun hi a khawhar leh thuai a, a hlim rei thei lo a, rilru a vakvai a, drugs ah an lut leh fo. Khawtlangah inhmang rawh. Taksa lam hrisel fu, khawtlang nun ngaihsak miah lo hi an nun a awhawm lem loh. Chhiat that thu ngaihven ve la, thatnaah i kal hreh a nih pawhin chhiatna lamah erawh chuan in thlahrung hauh suh. Mihringte hi nungho tura duan kan nih avangin mi dang nena kan nun honaa thil tih tul ve apiang ti ve bawrh bawrh la. Engtikah emaw chuan khawtlang hi i la mamawh ve dawn tih hriain inhmang ve hram hram rawh. Sakhua ngaihsak rawh. Sakhaw ngaihsak lo nun hi a ro thuai mai. Nun ro, nun tuihal, tuihal chhawkna tur dang ngaihtuah chhuak leh thiam si lo ho hian an thiam chhun drugs bawk an bel leh chawk thin. Inkhawm la, tawngtai la, Pathian hnenah inhlan rawh. Pathian tel lo hian tu nun mah hi a fel reng thei hauh lo. Thlemna a tam zel dawn. Drugs hi tuman an benthlaksak dawn lo che. Invenpui theih chin awm mahse nangma mawhphurhna a lian ber reng. Thiante kan han puh ve thin bawk tak naa kan duh lo chung hi chu tuman min tulh luiin min chiu lui ngai lo. Pui theitu che an awm tih theihnghilh suh. Nghei nan chauh ni lo, inven nan puih i mamawh thei. Khawhar ni te, hlim loh ni te, chak nite i nei leh dawn khawp. I hneh zel thei tih hria la. Mahni theih loh china mi dang puihna zawn hi a puitling zia em em a ni tih hre rawh. Mahni chauhin engkim a hneh theih lo. Puitu zawng hreh suh. Drugs nghei tir puih zuina damdawi pawh a awm tha khawp asin! Mut a harsa rei thin fo. Mutna damdawi nangmahin zawng ngawt suh. Post withdrawal depression an tih mai, drugs nghei hnu lawka nun nguai tlat mai hi a awm chawk. Hlauhna (anxiety) te pawh a awm thei. Damdawia enkawl ve a ngai fo. Ruih theih tawh hauh lohna a awm bawk asin! Nakinah kan la sawi chiang lehzual dawn nia. Ruihtheih thil tel lo hian khawvel hi a nuam zawk tih hre reng rawh. Ruih bat lai hi a nuam ve a ni mai thei, mahse a nawm chhung a rei lo. Ruih loh lai zawng hrehawmin a zui thin. Drugs tel lo hian nun hi a hlim rei zawk a, a hlim famkim zawk. Tuman an lawm hluau che leh an tih hiam hiam che beisei suh. Beidawnna a thlen duh. Yma thila i kal te, Biak in leh a chhehvela hun i hman ve tum te, i len velnaah te ‘spcial attention’ beisei kher suh. Awm ve mai la, tel ve tawp la, ti ve zel la a tawk. Mi ngaihsak nih aiin mi ngaihsaktu nih tum mai rawh. Drugs nghei tak tak tur chuan rilru, taksa leh thlarau dam kim a ngai. Chumi neih dan kawng chu i hriat vek kha!