Zawhna: Nu kum 46 ka ni a, 2007 khan ka hrawk leh nghawng nat vangin a sir leh hma zawngin min x-ray a, 2013 khan nghawng nat vang bawkin vawi 2 min x-ray leh a, a tha vek a. X-ray hian cancer a thlen thei an ti bawk si a, ENT te pawh ka pan a, nghawngruh chuktuah na min ti a, damdawi ka ei nasa tawh a, a dam thei lo, a kham lai hi a sa vut vut thin a. X-ray vang em ni ang? Eng damdawi nge ka ei ang, khawngaihin engtin nge ka inenkawl ang? Chhanna: X-Ray hian radiation a hman avangin tih nasat chuan cancer te pawh thlen thei anga ngaih a ni thin a. Amaherawhchu, chutiang khawp tur chuan i ti nasa lo niin a ngaih theih. Tunlai khawlte phei chu a changkang tawh a, a ziaawm viau tawh niin a lang. Chutih rual erawh chuan X-Ray hi a nazawngin an chawh lo va, a tul bik thilah chauh an tihtir thin. I hrawk na i sawi a, ENT doctor i inentir chuan i hrawk chhung vel chu an en chiang ngei turah ngai ta ila, hlauhthawn awm tur thil an hmu lo niah ngai leh phawt ta ila. Kuhva leh meizial zu nasa mi i nih erawh chuan hrawk fel lo neih a awl viau thung. Tin, pumpui lam hnathawh vang hian hrawk insawiselna nei an awm fo bawk (acid reflux te pawh an ti). Nghawng na i sawi lai zawk hi a chhan ni thei awm chu nghawng ruh chuktuah lai fel lo, Cervical Spondylosis vang a ni thei ang. Motor chuang nasa te, lukham fuh lo kham vang tein a awm fo bawk a ni. Cervical spondylosis emaw chutiang lam harsatna chi i nei a nih chuan damdawi ei ringawtin a chhawk hlen thei lo va, Physiotherapy a ngai tel thin. Tin, zin mi i nih chuan emaw lirthei chuang nasa thin i nih chuan nghawng vengtu Cervical Collar te hi hmang thei la, chu chuan a chhawk viau bawk.