Zawhna: Ka pu, ka kal ah hian lungte a awm fo mai a, vawi khat min zai tawh a, vawi thum lai ka zung chhuak tawh bawk a, a awm leh mai thin a, a ninawm duh khawp mai. A na a chhuah chang a nei a, in enkawl a ngai ngun bawk nen, engtia han tih chi nge mawni le? Tih dan min hrilh hriat theih chuan ka lawm hle ang. Mipa kum 35 mi ka ni a, nupui ka nei tawh bawk. - Awmpuia, Aizawl Chhanna: Kal a lung awm (Kidney stones) hi a chhan ni thei tam tak a awm a, chutih rual chuan chhan hriat loh, vanduai ve hrim hrim an awm fo bawk. A awm tawh laklawh hi chuan a awm nawn fo mai bawk a, kal na - nak nuam lo, zun kawng zawh thla, sazu emaw tilmu na tel ang chi te a thlen fo a, thenkhat chuan zun thi te an nei thei bawk. Zun kawnga lung awm hi chuan kal a insiam rawn tla thla ani a, zun kawngah a tan loh chuan zunkawng (Ureter) phing a zuk luhna lai (vesico-ureteric junction) ah hian a tang duh viau bawk. A lung a zirin a nat dan a in ang lo thei a, lung hriam chi anih chuan tereuhte pawhin na tawrh har khawp a thlen fo mai. Chutih laiin lung mam chi thenkhat chu na nei mang lem lo, mahse zun in ang deuh leka insawisel te an awm ve leh tho bawk. Kal a lung insiam hi a chhan ni thei tam tak chu tui in tlem vanga zun insiam tlem leh concentrate sang te, zun ah calcium, oxalate, leh uric acid awm tam te, infection (hrik) avang te a ni duh a. Tin, zun chhuahna pipe (ureter) inthlep (kink) vang te pawhin a awm duh bawk. Calcium ei tam vanga awm ni anga kan ngaih thin hi chu a dik ber lova, chu ai chuan Sodium tam ei vang hian a awm duh mah zawk a ni. Kan ei leh in lamah kan insum ngai emaw fimkhur deuh ngai te chu sa lam chi ei tlem a tul a, calcium tamna bawnghnute leh thlai hring ei tam te a pawimawh bawk. Tui in tam a tul hle a, ni khatah liter 2 aia tlem lo in ngei ngei a tha. Hna hram thawk leh thlan tam chi-ah phei chuan tui hi liter 4-5 te pawh in theih nise. A enkawlna kawngah hian infection a awm chuan enkawl phawt a tha a, chumi tur chuan zun culture te pawh tih hmasak theih nise a tha hle. Zunkawng X-Ray (IVU) la ti lo tan chuan tih ngei a tul a, zun chhuahna urinary tract lamah fel lo a awm leh awm loh chian hmasak a tul ang. Ultrasound hi a him a, insawiselna nei thin tan chuan in monitor nan hmang thei ila, a zia ber. Kal a lung awm tam tak hi chu zai kher a ngai lova, thenkhat chu ayurvedic damdawi Cystone hmangin a tih ral ve theih zauh zauh bawk. Zun kawngah a tlak thlak hian a lung a zirin an zung chhuak fo a, thenkhat erawh chu phih chhuah emaw chhut keh ngai te an awm bawk. Open Surgery (zai hawn) ai hian tunah chuan a verh chi PCNL te, Cystoscopy/Ureteroscopy te an hmang tam zawk tawh a. Lung lian ah chauh zai hawn hi chu an ti mah tawh zawk a ni.