Zawhna: Ka thaw a hah a, ka zawi ngawih ngawiha, ka lung hi a phu dup dup a, doctor ka pan hian i chaw kawng ulcer min lo ti zel a, ka hnung hi a kham em em reng a, ka lu a hai a thisen ka nei lo a ka chau em em thin. Thi tur ang mai hian ka inngai thin bawk. Chuan thu thin thawng ka hriat hian ka thaw hah ka buai thin bawk. Ka kut leh ke te hi a mu chur chur thin bawk. Enge a chhan ni thei ang le? CHHANA : I insawiselna hi a tam hle mai a, doctor i lo inentir tawh a, pum damdawi an chawh che a, i ngeih lo niin a lang bawk a. Engpawhnise, thisen nei lo ni angin i rawn insawi a, investigation hi enge i tih tawh tih hriat a chakawm viau mai. Thisen tlem (Hb hniam, Anemia tiin medical term chuan an sawi) hian thawhah thaw kham lo a siam duh viau a, chutih rual chuan pum lam fel lo, a bikin pumpui acid chaw kawnga let (acid reflux disease) hian thawk harsat, âwm hnawh, thawk nuam lo ang te hi a siam duh viau bawk. Hnung kham, na ang te pawh pumpui lam fel lo vangin a awm fo a, mit a lung awm (gallstone) vangin a awm thei bawk. Mipa nge hmeichhia i rawn insawi hran lova, mahse i insawisel dan han ngaihtuah hi chuan hmeichhia i nih duh hmel viau mai (mipa pawh chu i lo ni reng thei tho a). I BP lam a that leh that loh i sawi tel lo bawk a, luhai i neih tel avang hian BP i la check loh chuan check tir thei la a tha hle. Chuan investigation i tih a tul viau mai; a bikin endoscopy, ultrasound leh blood test (Hb leh a dang, bakah Thyroid function test te pawh a tul mai thei bawk), ECG te nen pawh i tih a tul ang. Chuta tang chuan i natna hi a hriat chhuah theih chauh a rinawm. Investigation i tih vek hnu pawha fel lo an hmu lo anih chuan rilru lam fel lo (ât lam ni lo) engemaw tak, Psycho-somatic disorder an tih i nei a ni thei bawk. Chung zingah chuan Panic Disorder nei hi an awm ta nual mai. Chhan awm lovin an hlauthawng thut thut thin a, zan lam mut harsat nei an ni duh a, stress nei nasa ah a awm duh zual. He natna hi Psychiatrist enkawl chi a ni a, thil dangah fel lohna i nei lo anih chuan lo pan la, an puih theih ngei che ka ring.