Zawhna: Ka pu, kan pa hi kum 47 mi ani a, zu hi regular takin a in ve a, mahse chaw a thlah ngai lova, zing zu pawh a in ngai lo. Ke vung leh mu chuah chuah hi a nei thin a, a hna a thulh phah lem chuang silova, thil dang insawiselna em em a nei bawk silova, inentir tura ka tih leh a duh bawk si lova, engtia han tih chi nge mawni le? Min puih theih chuan ka lawm hle ang. Chhanna: Tunlai chu zu in nasat vanga buai an tam malh malh hle mai. Thenkhat chu an in tam hrim hrim (a quantity a tam) vanga harsatna nei te an ni hlawm a, zing zu in chin tawh leh, chaw ei mumal lo bakah taksa insawizawi tha lo phei chu an kulcho hma thei khawp mai. A senchi a lei theih tawh nachungin local in an la tam phian bawk. Rs.20 man fun lek lek a funte zuar te hi an lo la ther fur lehnghal a, zu in rau rau chuan in dan system thlak a ngai viau niin a lang. Ka han kawi kual hmasa lawk a ni. Zu in nasat hian chaw ei tha mahse an taksa mamawh Vitamin B zinga pawimawh tak pakhat Thiamine tlakchham hi an nei duh khawp mai a. An zu in tam luat khan an taksa in Thiamine an mamawh zat hi a hip lut thei lova, chuvang chuan Thiamine Tlakchham (Deficiency) an lo nei ta thin a ni. Chutiang chu a medical term chuan Dry Beri Beri kan ti a. Thiamin hi kan thazam (nerve) hnathawh nan a pawimawh khawp a, tlakchham chuan nerve hnathawh a buai ta thin a ni. A lan chhuah dan tlangpui chu thawhah hma, a bikin taksa chet tam deuh a thawchham mai te, marphu rang te, ke vung te, ke mu chuah chuah te, mit chet mumal lo te, a nasa zual deuh ah phei chuan zeng te a awm thei bawk. Thluak function thlengin a khawih buai thei a, chu chuan hriatna buai te, thil hmuh sual (hallucination) te, taksa chet mumal thei lo te a thlen thei a ni. In pa insawisel dan pawh hi hetiang hi anih duh hmel viau mai a, a zu in hi a nghei mai thei lo anih si chuan a in zat (quantity) tal tih tlem tir a ngai ngei dawn a ni. Chu bakah chuan Vitamin supplements (B-Complex) double dose a pek a ngai bawk anga, mum 1 nitin vawi 2 in lo ei tir la. Digestion lamah fel lo a awm thei bawk a, Enzymes te pawh ei tir a tha ang. Ek that a pawimawh khawp mai a, Liver hnathawh a buai hian ek a ti buai bawk a, chuvang chuan Lactulose te pawh kan pe thin bawk. Liver function test tal chu lo tih tir thei la a tha hle mai. A liver a buai chuan a chaw ei ah Protein tih tlem a tul bawk ang. Artui leh sa lam chi lo insum thei se, thlai hnah hring a hel a ei tir te pawh a tha viau. Zu in nasa te'n doctor pan an hreh chhan common tak chu zu nghei hmak turin an hrilh dawna hriatna an nei a, an tlin an ring si lo thin a, chuvang chuan inentir loh law law an thlang fo thin a ni. Chutiang chu ani kher lova, tha ber chu zu nghei ni mahse an harsat dan azirin a inenkawl dan te kan lo hrilh zawk thin a, chuvang chuan doctor chu entir thei hrim hrim ula chu duhthusam a ni.