Zawhna: Ka Pu hi tun hnaiah hian a mizia a inthlak nasa ta viau mai a. Tunhmaa zaidam tak thin kha a thin a chhe hmain a chang phei chuan biak tawng hleih theih loh khawp te hian a awm leh tlat thin a. Inleng neih chang te hian a phun vak zel mai a, a zahthlak duh thin khawp mai. Taksa lam insawiselna hranpa a nei chuang bawk silova, inentir lah hi a duh lo bur mai bawk sia. Ka pi in a boralsan hnu hian a zual ni deuh te hian ka hria a. Min puih theih chuan ka lawm ngawt ang. Chhanna: He zawhna i rawn zawt hi i ti lawmawm hle mai. Chhungkaw tam tak hian upa te hi kan ngaihven tawk lova, tar phunchiar, tar a, ti tein kan sawi fo mai a. Hnawk kan ti fo mai bawk. He zawhna i rawn zawh atang hian i pu hi i ngaina a, i ngaihven a, puih i duh ani tih a ti lang bawk. Kum upa te hian harsatna chi hrang hrang an nei fo a, that lai huna an neih ngai loh te ani fo a, an dawngsawng thiam lova, chu chuan anmahni ah lungawi lohna a siam fo thin a ni. Engpawhnise, thiam ang tawka sawifiah kan tum ang e. Kum upa tawh te harsatna enkawl tur hian ram changkangah chuan department hran hlak an nei thin a, medical zawng chuan Geriatric Medicine tiin an sawi a. Kan ramah chuan a hranpa takin kan la nei lem lo thung. He department hian kum upa tawh te an enkawl bik a, chung zingah chuan mental health (rilru lam) hi an ngai pawimawh hle bawk a ni. A chhan pawh kum upa lam hian rilru lam harsatna an tawh fo vang a ni. Tunlai khawvel thiamna sang tawh takah hian kum upa te hi in adjust har an ti fo thin a. An thatlai hun nen a danglam nasat em avang leh, thiamna sang zawk te hi an ban phak ve mai tawh loh thin avangin mahni insitna an nei hma a. Chhungkuaah tangkai lova inhriatna an nei tam bawk nen, an chenpui tam zawkin an lo ngaihsak tawk lo fo bawk a. Chu chuan rilru lam harsatna "Depression" a thlen fo mai a ni. Chumi piah lamah chuan anmahni khawvel hman thiam (ti zawngin sawi ta mai ila) a la chen duh tlatna te pawh a thlen thei a. An tih duh ang zawng leh nuam tih zawng han ti turin an chakna in a tlin tawh lova, an tui zawng han sawipui turin thian kawm tur an van leh tawh bawk si a. Anmahni hrethiam tur ber an kawppui te an sun phei chuan heng harsatna hi a zual duh viau reng a ni. Kan ramah hian upa te enkawlna leh chhawmdawl lam hi kan la hrethiam tawk lo khawp mai a. Anmahni enkawlna tur Old Age Home te pawh awm ve bawk mahse "tar dahkhawmna, chhungte enkawl peih loh emaw enkawltu nei tawh lo te awmna tur bik" anga hriatna kan la nei te hian upa tam tak awm an hreh phah bawk a. Mahse chutiang ni lovin anmahni rilru mil tur zawnga chenna boruak environment pek hi a tum ber chu ani zawk a ni. Heng hmun anih loh pawhin an nitin hun an hman theihna tur Creche ang reng te pawh hi kan mamawh ta khawp mai bawk. Heng hmunah hian an kum rualpui kawm tur an nei a, thawktute pawh hetiang lama trained an nih vangin kawmhlim dan an thiam bawk a, ram changkang zawkah chuan an chhawr tangkai em em a ni. Remchang la in ka han peng kual lawk a. I rawn sawi hmang atang hian i pu hian rilru lam harsatna engemaw tak a nei niin a lang a. Depression bakah hian Alzheimer Disease an tih te pawh hi nei an awm ta nual bawk a. Chuvangin rilru lam doctor "Psychiatrist" emaw Clinical Psychologist te ruai/pan thei ta ula. Amahin a pan duh lo anih pawhin in lama koh dan te dap thei ula, i pu chu an puih theih ka ring a ni. Hemi piah lamah hian nangmah ngeiin i pu hi serious takin kawm thei la, dimdawi takin a harsatna neih te puih i duhthu leh puih dan kawng i dap ani tih te hrilh hria la, i bulah a sawi duh mai ka ring deuh. Chubakah chuan in ina cheng te zingah dah pawimawh ula, chhungkaw thu hla engah pawh rawn fo ula, a kawm peih tur a kum rualpui te zawn sak ula, hma in sawn theih ngei ka beisei a ni.