Zawhna: Ka pu, ka nu hi kum 56 mi a ni a, kum 6 dawn lai chu a thi a hul tawh a. Tun hnaiah hian thi a nei thar leh tlat mai a, a tam lem lo a, hunbi vak pawh a nei hran lo. Thil dang insawiselna hi a nei hran chuang si lo va, inentir a hreh riau mai bawk si a, eng nge a chhan ni thei ang? A enkawl dan deuhte a awm em? Min puih theih chuan ka lawm hle ang.

Chhanna: Kum a lo tam hian doctor inentir regular hi a pawimawh khawp mai a, chutih laiin thenkhat erawh chuan an hreh viau zel a, eng emaw tha lo an lo vei ruk reng an hlauh vangte a ni duh khawp bawk. Inentir hrim hrim peih lo hi an awm fo bawk a, an that lai huna hrisel, insawiselna vak nei lote phei hi chuan an ngaihthah duh phian bawk. Engpawhnise, a chhan ni thei awm te leh a enkawl dan chungchangte ziah ka’n tum ang e.
Thi hul tawh hnua thi nei lehte hi thil awm thei, chhan awm kher lova nei te pawh a awm thei nachungin Chhul hmawr cancer vang ani duh hle a, a chhan common ber zinga mi pawh a ni reng a. Cancer kan tih hian a rik dan a hlauhawm viau thei a, a la hma (early stage) pawh hi han sawi hran dan vak a awm loh avangin cancer tih term hi kan hmang hrih dawn a ni. Chhul hmawr cancer hi a tirah chuan timur (cells) rawn inthlak danglam atangin a intan a, hei hi Cancer in Situ (CIS) tiin kan sawi thin. Chumi inthlak danglam chu Pap Smear test hian a lo hmu thei a, chuvangin kum 40 ral kai tawh hmeichhia chuan kum khatah vawi khat tal hi chu Pap Smear test hi tih theih nise a tha hle. A chhan pawh hriat hma poh leh enkawl dam a awl vang a ni. Thi hul tawh hnuah phei chuan entir regular a pawimawh lehzual a ni.
Chhul hmawr cancer lan chhuah dan hrang hrangte chu: thi neih dan pangngai ni lova thi nei-thi neih hun inkar te, sex hman laia thi rawn chhuak te, thi hul tawh hnua thi nei leh te, taina emaw ek zawnga mawng leh tai bawr na thin te, sex hman laia na awm te, serh tuihnang danglam deuh te (a rawng inthlak emaw, rim danglam emaw) a ni. Hrik chi khat Hman Papilloma Virus (HPV) hian chhul hmawr cancer hi a thlen duh bik a, hetiang hrik hian serh bawrah singsihlit a siam duh viau bawk. Cancer intan a nih chuan enkawl vat a ngai a, doctor-in zai a chawh thei a, chemo leh radiation therapy te pawh lak a ngai thei bawk. Chumi hma chuan Pap Smear tih phawt chu a tul ang a, chhul hmawr leh serh chhung en chian (Colposcopy hmangin) te pawh a tul thei bawk ang.
A chhan dang ni leh thei chu chhul Polyp (bawk insiam) lo awm vang te a ni thei a, tin, chhul bang chhung ber endometrium hi thi hul hnuah a pan (atrophy) nasa thei bawk a, chu chuan thi a siam thei bawk a, a chhah lutuk a awm thei leh a (hypertrophy), thau lutukah te hian chutiang chu a awm duh bik bawk. Infection vangin a awm thei a, damdawi thenkhatin a thlen thei bawk.
A pawimawh ber chu doctor inentir kha a ni a. Hreh mah se enchian ngei a tul dawn a, hmeichhe doctor Gynecologist-ah lo hruai ngei thei la, a tul angin an lo pui thei ngei ang. A chhan hriat phawt loh chuan enkawlna inhrilh theih a ni tlat lo.