Tun hnai hian chhungte damlo buaipuiin phai lam ka kal ta zauh zauh a. Ka kal hnuhnun ber hian ka haw lamah kan Finance Minister Pu Lalsawta nen thlawhnaah kan thu dun hlauh mai a, thil tam tak ka sawipui a. Health Care chungchang hi ka ngaih pawimawhna a rei tawh hle a, chumi chungchang chu ka sawipui bawk a. Pu Sawta hian Zalen chanchinbu lamahte rawn ziak ta che min tih avangin ka han thai lang ve dawn ani. Ka rilrua awm ang ka ziak chhuak thiam tawk lo mai thei a; tin, info ka dawn angte a kim tawk lo thei bawk a. Ka ziah sual palh a awm a nih pawhin min lo hrethiam dawn nia. Tun hnai hian chhungte damlo buaipuiin phai lam ka kal ta zauh zauh a. Ka kal hnuhnun ber hian ka haw lamah kan Finance Minister Pu Lalsawta nen thlawhnaah kan thu dun hlauh mai a, thil tam tak ka sawipui a. Health Care chungchang hi ka ngaih pawimawhna a rei tawh hle a, chumi chungchang chu ka sawipui bawk a. Pu Sawta hian Zalen chanchinbu lamahte rawn ziak ta che min tih avangin ka han thai lang ve dawn ani. Ka rilrua awm ang ka ziak chhuak thiam tawk lo mai thei a; tin, info ka dawn angte a kim tawk lo thei bawk a. Ka ziah sual palh a awm a nih pawhin min lo hrethiam dawn nia. Pu Sawta sawi dan chuan kum hmasa financial year-ah khan Medical Reimbursement atan ringawt hian cheng vaibelchhe sawmriat chuang (Rs. 80 crores) sawrkarin a hmang niin a sawi a. Mizorama enkawl theih loh phai pan ngai kan thahnem hle a, mamawh ngei vanga phai pan ngai kan awm laiin tul lem lova insenna pawh eng emaw zah a awm niin a sawi. |henkhat chu phai lama zin chhuanlama medical refer pawh an awm niin a lang. Aizawla enkawl theih ngei, phai pan kherte an awm bawk a. Kan sum sen hi a tam khawp mai a, hemi tihtlem nan hian sawrkarin ngaihtuahna pawh a seng hle niin ka hria. Kan state pachhiatzia kan hria a, sawrkar kan puih theihna a ni tih hriain sum kan sen tlem theih dan tur ngaihtuahpui hi mipui lamin kan tih ve tur pawimawh tak niin a lang. Medical thiamna lamah hma kan sawn zel a, tun hmaa phai pan ngai tam tak kha tunah chuan Aizawlah ngei kan lo enkawl ve thei ta zel a. Entirnan - Surgery Department te hi lo en ta ila. Chawkawng, pumpui, ril cancer zai ngai pawh tha tak takin an zai thei tawh a, Chemo leh Radiotherapy lamah nise Cancer hospital changtlung ang reng tak mai kan nei a, a enkawl thiam doctor tha tak tak kan nei tawh bawk nen. Phai pan ngai lovin Aizawlah ngei kan enkawl thei ta a, sawrkar sum tam tak kan save a ni. Chutiangin Cardiologist thiam tak tak kan nei a, hmannia Angiography (lung chawmtu thisen zam endikna tiin sawi ta mai ila) ti tura Kolkata-ah ka Pizawn ka zuk hruaite kha a tih chhung a rei loh tehreng nen kal man, thlen man leh veivah senso nen chuan tam tak sen ngai a ni leh lawi. Civil Hospital Aizawlah hian a room tur bik, bungrua leh hmanruate pawh a awm vek tawh a, technician lam awm loh vang nge kan la ti thei lo mai zawk a ni a, hengte hi han ti thei se phai pan ngai lovin a mamawhtu tam tak helai hmunah kan enkawl thei dawn ania. Sawrkar hnathawk tan chuan damloh inenkawlna senso hi reimbursement a tih theih avangin lo dah tha ta ila. Sawrkar hnathawk ve lo tan Mizoram State Health Care Scheme kan nei a, chhungkaw tam tak kan inziak lut a, a man sang berah pawh kum khat premium atan Rs.1000 awrh kan seng a, chumi hmang chuan inenkawlna turin cheng nuai thum (Rs. 3 Lakhs) thleng a bill leh theih bawk a, a chhawrtu tan chuan hlu veng veng tak a ni. He scheme ngaihtuah chhuaktu kan sawrkar hmasate kha an fakawm hle mai. Chutih rualin he scheme hian natna thenkhat cover loh a la nei a, damdawi ina luh ngai a nih phei chuan khawsak harsa zawkte tan a hautak hle mai. Chu mai bakah phai pan ngai zingah pawh an inenkawlna man cover zawh loh (entirnan Open Heart Surgery) leh senso ngai hautakte hi a tawngtu tan lu a tihai duh hle ang. Thingtlang lamah IMA buatsaih Special/Free clinic-ah te ka lo kal ve tawh thin a. Aizawla chiang zawka check-up ngaite kan en fo a, chung zingah pawh chuan sum lam harsat vanga pan thei lo tur/pan ngam lo ka en fo mai bawk. Phai lamah chuan Vellore, Kolkata leh Delhi-ah te damlo buaipuiin ka lo kal ve tawh a. Heng hmunahte hian damlo harsa zual tak tak, tawng pawh thiam fumfe lo, vawi khat kalna tih hriat, loh theih loh vanga inenkawl tura pan ka tawng fo mai. A luhaithlak duh hlein ka ring. Kan vanneih asiamin sawrkarin awmna tur House te kan la nei tal a, a buaipui tur nurse-te pawh dahin an tangkai hle thin. Sawi tak angin zinna senso, thlen man leh veivahna te pawh a hautak duh hle. Aizawl ringawt pawh hi thingtlang lam unaute, khawsak harsa tan chuan pan huphurhawm tak tur a ni. Tuna kan Health Care Scheme hi a tangkai em em mai a. Kum khat chhung atana Premium kan pek hi a na lo hle. Kan hmang tangkai lo a nih pawhin a hmang tangkaitu tam tak an awm avang hian phur taka kan in-enroll hi a pawimawh hle mai. Chutih rualin hei aia changtlung zawka he scheme hi ruahman ni thei se. A enkawltute ka zawhnaah chuan duh anga an sum dawnin a daih tawk loh avangin damlo mamawhtu eng emaw zat chu an enkawlna senso an pe kim thei lo thin a ni. Tuna Premium pek theih zat leh a bill theih zat an then dan hi la siam tha leh se. Tier 4/5-ah te siamin kum khat chhung atan Premium a sang berah cheng singkhatte pek theihin ti se, chhungkaw tam tak hian kan pek hreh ka ring lo ani. Tin, a sum lu a lo pun theih nan sawrkar hnathawkah te hian Education Cess an lak ang hian Health Care Cess la ta bawk sela (chutiang rawtna chu an lo siam tawh a, a tlang lo niin an sawi), keimahni ram mi leh sa tan vek tho a ni a, a nat a rinawm loh. Duhthawhna rilru atangin ka ziak bawk a, Health Care hmang tangkaitute hi kawm se, TV leh chanchinbu lamahte advertisement atan hmang se; chutichuan, a thawhtu (premium petu)-ten thahnem kan ngai zual ang a, kan hman tangkai loh leh a lawmawm ting a ni mai a (kan dam tihna a ni mai a), a lo chhawrtuten an hlawkpuiziate mipuiin hre tam ila kan ti a ni. Tin, thingtlang lamah hian information inpe tha zual se, a kalphung hre chiang lova inziak lut an awm nual hmel a, a bikin RSBY-a inziak, Health Care premium pek nachang hre lote pawh an awm nualin a rinawm. Health mai ni lo hian Social telin Health/Social Security Policy te hi kan sawrkar hian duang thei se, rualbanlo, tar leh vanduai vanga hnathawk thei lote hi cover vek thei se. Kum tawp dawna Krismas thilpek lamah thahnemngai tak tak kan tamziate leh, kohhran thawhlawmah thahnem kan ngaih tlanzia han en hian premium pek lamah thlaphanna tur a awmin ka hre lo a ni.