Zawhna: Ka pu, nu kum 48 mi ka ni a, ka thi hi kum 2 vel a hul tawh a. Thla khat vel chu ka hnute veilam hi a nuam lo a, ka han khawih hian bawk awm ang deuhte hian ka hria a, kan pa ka dap tir a, engmah a ni lo min tihsak a. Doctor chu ka inentir a, bawk chu a ni chiah lo a ti a, damdawi min chawh a, mahse a ziaawm chuang lo. Cancer te hi a nih palh ka hlau a, engtia tih tur nge mawni le? Min puih theih chuan ka lawm hle ang. Chhanna: Hnute lam insawiselna hi a chhan hrang hrang a awm thei a. Hnute cancer pawh hi a tam ta viau mai a, chutih rualin cancer ni kher lo tam tak a awm bawk. I kum ngaihtuah chuan leh, i thi a hul tawh tih i rawn sawi avang hian cancer theihna chance chu a awm ngei mai. Mi thiamte sawi danah chuan hmeichhia thi hul tawh, Hormone Replacement Therapy enkawlna dawng lovah hnute insawiselna an neih chuan (bawk a nih kher loh pawhin) Cancer a nih leh nih loh hi assessment tih ngei ngei tur an ti a. Chuvangin chipchiar deuh zawkin hnute insawiselna, a chhan ni thei te leh, investigation an tih thin te, a enkawl dan chungchang te hi tarlan kan tum ange. Hnute na (pain) emaw nuam lo (uneasiness) awm theihna chhan hrang hrang te chu: Fibrocystic Disease (cancer ni lo, mahse bawk angin a feel theih), Premenstrual Syndrome or Cyclic Mastalgia (Thi neih dawna na), Puberty or Menopause (tleirawl thi nei tan tur emaw nu thi hul intan tur), Naupai vang te leh hnute pek vang te, Awmruh no vung (Costo-chondritis), Hnute tauh palh, Awmvel (Herpes Zoster), damdawi thenkhat vang te leh, infection eng emaw vang te a ni hlawm a. Fibrocystic Disease/Fibroadenoma hi a common ber pawl chu a ni a, rubber ang deuh hian a feel theih a, a insawn rulh rulh thei bawk. Cancer bik hi kum upa lam deuh, 50 pel tawh ah a common ber a, chuti chung chuan kum 20 bawr vel leka awm te pawh a awm zauh zauh bawk. Hnute hmur atanga tui rawn chhuak emaw thisen deuh reuh ang te pawh a awm thin a, chutiang ah chuan cancer chance a sang zual. Tin, cancer ah chuan hnute vun rawn danglam, sen deuh, vung deuh emaw phuhlip ang deuh te pawh a awm fo thin. Hnute bawk emaw insawiselna lam chi reng reng chu hmeichhia in thi an neih atanga a kar khatna velah doctor entir tur a ni a. A chhan pawh hormones vanga harsatna awm te anih chuan a chiang zual bik vang a ni. Engpawhnise, Mammogram tih hi a pawimawh hmasa chu a ni a, Civil Hospital-ah a tih theih a. Cancer 85% vel chu Mammogram hian a hmu thei a, 15% vel erawh normal anga hmuh; mahse, cancer tho si ang te a awm ve leh thei bawk. A dawt leh ah chuan Ultrasound a entir leh a ni. Ultrasound ah hian bawk an hmu anih chuan tui pai chi (cystic) nge sakhat (solid mass) tih an thliar hrang leh ang. Solid mass a nih chuan cancer nih theihna chance a sang leh a, hetiang a nih chuan hip chhuah exam (Fine Needle Aspiration Cytology-FNAC) tih a chawh leh bawk a ni. FNAC hian cancer tam ber chu a confirm thei a, hmuh sual zeuh erawh a awm ve thei tho bawk. Heta kan hriat tur chu investigation reng reng hi 100% dik a awm mang lo tih hi a ni. Chutih rualin Pathology lamah pawh hma kan sawn tawh hle a, cancer tam zawk hi chu an hre dik chat thei tawh a ni. Kan sawi tak Fibrocystic Disease hi a common kan tih kha. Cancer a ni lo tih an confirm chuan he natna hi a nih hmel ta ber ang a. Chutiang i lo nei a nih chuan coffee leh thingpui lam insum deuh te a tha a, chuan Vitamin E (ni khatah 600 mg aia sang lo) hi an chawh thin a ni. Hei hian Fibrocystic Disease tam zawk hi chu a enkawl dam theih a ni. Infection vang a lo nih chuan antibiotic ei ngei a tul ang a, hei pawh hi enkawl a ngeih hle bawk. Evening Primrose Oil te pawh an chawh tel bawk thin. Cancer a lo nih erawh chuan zai ngei a ngai a. Kan Surgeon te hi an thiam em em a, tha tak takin an zai thei a, phai pan ngai lovin Aizawlah a tam zawk chu an enkawl dam tawh a. Zai bakah hian Chemo leh a chang chuan Radiation te pawh a tul thin bawk. Chemo lak a ngaih pawhin Oncologist thiam tak kan nei a, phai lam ai mahin enkawlna an pe tha thei tawh a ni. Phai lam kan la mamawhna ber chu a darh leh darh loh confirm-na turin PET Scan tih hi ani. Thu belh duh ka neih chu cancer vanga hnute zai te hian mental depression an nei fo thin. Chemo an lak chhunzawm phei chuan an sam te a lo tla kawlh fo a, an hmeichhiatna tihdanglam a a lo awm avang hian rilru lamah harsatna an nei fo a ni. Chuvangin, Hnute cancer nei ten enkawlna an dawn hma hian Psychiatrist/Clinical Psychologist lamah te hruai hmasa thei ila, rilru lo inbuatsaih lawktirte hi a tangkai a, ram changkang zawkah chuan Pre-treatment Psychological Preparation Counseling te hi ngei ngeiin an pe thin a ni. Chhungte pawhin hrethiam tak chunga kan enkawl a pawimawh hle.